អាជ្ញាធរ​ខណ្ឌឫស្សីកែវ​គ្រោង​រុះរើ​ផ្ទះពលរដ្ឋ​២០​គ្រួសារ​នៅ​ថ្ងៃ​នេះ​​

ប្រជាសហគមន៍បឹងឈូក​A  បានឲ្យដឹង​ថា អាជ្ញាធរ​ខណ្ឌ​ឫស្សីកែវ​​នៅក្នុង​រាជធានីភ្នំពេញ ជូនដំណឹងថា​ នឹងរុះរើផ្ទះពួកគេជាង២០គ្រួសារ ដោយចោទថា សង់ផ្ទះរស់នៅលើចំណីផ្លូវជាដីរបស់រដ្ឋ។

តំណាងសហគមន៍បឹងឈូកA លោក ឡាយ តារា រស់នៅភូមិទួលពពា សង្កាត់ទូលសង្កែទី២ ខណ្ឌឬស្សីកែវ រាជធានីភ្នំពេញ បានប្រាប់វីអូឌីនៅថ្ងៃនេះថា អាជ្ញាធរខណ្ឌឫស្សីកែវ កាលពីម្សិល​មិញ​បានចុះមកប្រាប់ប្រជាពលរដ្ឋថា នឹងរុះរើផ្ទះពួកគេនៅម្តុំផ្លូវ៥៩៨ ស្ថិតនៅសង្កាត់ទួលសង្កែ២ ខណ្ឌឬស្សីកែវ ភ្នំពេញ។ គម្រោងរុះរើ គ្រោងធ្វើនៅថ្ងៃនេះ ដោយចោទថា ពួកគាត់សង់ផ្ទះលើដីរបស់រដ្ឋ។ លោកថា ប្រជាពលរដ្ឋមិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ ប៉ុន្តែ ប្រជាពលរដ្ឋស្នើសុំទៅរដ្ឋជួយដោះស្រាយផ្តល់សំណងតាមទីផ្សារជាក់ស្តែង ឬអភិវឌ្ឍន៍នៅនឹងកន្លែង។

លោកនិយាយថា៖ «ពួកខ្ញុំមិនប្រឆាំងនឹងអាជ្ញាធរទេ ចាំតែអាជ្ញាធររដ្ឋរកកន្លែង និងផ្តល់សំណង​សមរម្យ ដើម្បីឲ្យពួកយើងអាចរស់នៅបាន កុំឲ្យអាជ្ញាធរដេញទៅអត់មានសំណង អត់មានការដោះដូរទីកន្លែងពិតប្រាកដ អញ្ចឹងបានកន្លែងណារស់នៅ»។

តំណាងសហគមន៍ម្នាក់ទៀត លោក ទូច សំអន និយាយថា បើអាជ្ញាធរខណ្ឌមិនដោះស្រាយឲ្យពួកគេទេ នៅថ្ងៃចន្ទដើមសប្តាហ៍ក្រោយនេះ ពួកគេនឹងនាំគ្នាយកញត្តិដាក់ទៅសាលារាជធានីភ្នំពេញ និងក្រសួងដែនដី នគររូបនីយកម្ម និងសំណង់ ដើម្បីឲ្យជួយរកដំណោះស្រាយជូនពួកគេផងដែរ។

លោកនិយាយថា «បើថ្ងៃហ្នឹងអត់មានដំណោះស្រាយទេ ខ្ញុំនិងពិភាក្សាគ្នាយកញត្តិដាក់ទៅសាលាក្រុង និងក្រសួងដែនដី នៅថ្ងៃច័ន្ទអាទិត្យក្រោយនេះ ដើម្បីសុំឲ្យជួយរកដំណោះស្រាយឲ្យបានសំណង​សមរម្យ»។

វីអូឌីមិនជាសុំការបំភ្លឺពីប្រធានការិយាល័យអន្តរ វិស័យខណ្ឌឫស្សីកែវ  លោក លឹម សាម៉ឺឌី ដែលកាន់រឿងនេះបានទេនៅថ្ងៃនេះ។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា សាលារាជធានីស្វាគមន៍ញត្តិរបស់ប្រជាពលរដ្ឋដែលមានបញ្ហារឿងដីធ្លី បើពួកគេមានបំណងដាក់សំណើសុំឲ្យថ្នាក់ដឹកនាំជួយអន្តរាគមន៍។

លោកមានប្រសាសន៍ថា៖ «បើសិនជាមានញត្តិដាក់មក យើងនឹងទទួលយកសិក្សាមើលរឿង ឬគិតគូមើលបញ្ហាទាំងអស់ហ្នឹង គ្រាន់តែដោះស្រាយយ៉ាងម៉េច យើងអត់ទាន់ដឹងរឿង អត់ទាន់ធ្វើបានទេ ប៉ុន្តែប្រាកដហើយបើបងប្អូនមានទុកធុរៈ មានការលំបាកដាក់ញត្តិមក ក្នុងនាមអាជ្ញាធរនឹងជួយរកដំណោះស្រាយ»។

ទោះយ៉ាងណារហូតដល់ម៉ោង១១ព្រឹកថ្ងៃសៅរ៍នេះ នៅមិនទាន់មានកម្លាំងសមត្ថកិច្ចចុះទៅរុះរើផ្ទះពលរដ្ឋតាមការជូនដំណឹងនោះនៅឡើយទេ។​

តំណាងសហគមន៍បឹងឈូកA បានអះអាងប្រហាក់ប្រហែលគ្នាថា អាជ្ញាធរខណ្ឌឫស្សីកែវ បាន​ជូនដំណឹងមកប្រជាពលរដ្ឋ២០គ្រួសារថានឹងចុះរុះរើផ្ទះប្រជាពលរដ្ឋ ដែលសង់ខុសច្បាប់លើចំណីផ្លូវរដ្ឋ ស្ថិតនៅសង្កាត់ទូលសង្កែ២ ខណ្ឌឬស្សីកែវ រាជធានីភ្នំពេញ។ ប៉ុន្តែតំណាងសហគមន៍ថា ពួកគេនាំគ្នាដាក់វេនប្រចាំការនៅតំបន់នោះ ដើម្បីតវ៉ាមិនឲ្យរុះរើផ្ទះពលរដ្ឋនោះទេ បើសិនជាមិនដំណោះស្រាយសមរម្យណាមួយ ពីព្រោះពួកគេរស់នៅលើដីនោះចាប់តាំងពីឆ្នាំ១៩៩៥ឆ្នាំ មិនដែលមានបញ្ហាអ្វីកើតឡើងនោះឡើយ៕​