តំណាងសហគមន៍ឡពាងមួយរូប ត្រូវបានតុលាការខេត្តកំពង់ឆ្នាំង កោះហៅឲ្យចូលសវនាការ នៅពាក់កណ្តាលខែកក្កដានេះដោយចោទថា ពាក់ព័ន្ធញុះញង់ប្រជាពលរដ្ឋឲ្យចូលធ្វើស្រែលើដីក្រុមហ៊ុន ខេ.ឌី.ស៊ី។
នៅលើហ្វេសប៊ុក ឈ្មោះ សហគមន៍ ឡពាង បានឲ្យដឹងកាលពីម្សិលមិញនេះថា តុលាការខេត្តកំពង់ឆ្នាំង នឹងបើកសវនាការនៅថ្ងៃទី១៤ ខែកក្កដា ឆ្នាំ២០២០ លើអ្នកស្រី អ៊ុំ សុភី ពាក់ព័ន្ធនឹងរឿងញុះញង់ពលរដ្ឋឲ្យចូលធ្វើស្រែលើដីក្រុមហ៊ុន ខេ.ឌី.ស៊ី របស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។
ករណីនេះ តំណាងសហគមន៍ឡពាង អ្នកស្រី អ៊ុំ សុភី បានច្រានចោលការចោទប្រកាន់នេះ ដោយអ្នកស្រីថា ក្រុមហ៊ុនប្តឹងគាត់មិនចំគោលដៅ ហើយថែមទាំងសរសេររបាយការណ៍មូលបង្កាច់ទៀតផង។
អ្នកស្រីនិយាយថា៖ «រឿងនេះប្រជាពលរដ្ឋចូលធ្វើស្រែ ដោយសារតែជួបគណបក្សប្រជាជន ដឹកនាំដោយលោកសួស សុខផៃ និងលោកជំទាវ សិន សេរី ដោយមានសំណាចា ពីលោកនាយករដ្ឋមន្ត្រី ហ៊ុន សែន សុំធ្វើស្រែបណ្ដោះអាសន្នសោះ ព្រោះពេលប្រជុំនោះខ្ញុំមិនបានដឹងទេនោះ គឺលោកស្រី តូច លី ជាតំណាងប្រជាពលរដ្ឋ រួមទាំងលោក ផេង រុំ ព្រោះនាងខ្ញុំបង្រៀនសិស្ស មិនដឹងរឿងនេះប៉ុន្មានទេ ហើយនាងខ្ញុំមិនមែនជាតំណាងប្រជាពលរដ្ឋទេ? ហេតុអ្វីបានជាលោកចៅក្រមមិនពិនិត្យទៅលើភស្តុតាងឲ្យបានច្បាស់លាស់រឿងនេះ»។
ជម្លោះដីធ្លីរវាងពលរដ្ឋឃុំតាជេសស្រុក កំពង់ត្រឡាចនិងក្រុមហ៊ុន ខេ.ឌី.ស៊ី របស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអូសបន្លាយរយៈពេលជាង១០ឆ្នាំមកហើយ ហើយជម្លោះនេះបានឈានដល់ការចាប់ខ្លួនពលរដ្ឋដាក់គុក និងប្រើហិង្សាបណ្ដាលឲ្យរបួសជាច្រើននាក់។
កាលពីថ្ងៃទី១៧ ខែមិថុនា ឆ្នាំ២០១៤ ក្រុមអ្នកភូមិ និងកម្មករស៊ីឈ្នួលធ្វើរបងឲ្យក្រុមហ៊ុន បានប៉ះទង្គិចគ្នាដោយចម្ពាមកៅស៊ូប្រើគ្រាប់ដែក និងដុំថ្ម បណ្ដាលឲ្យរបួសទាំងសងខាងជាង២០នាក់។ ក្រោយមក តុលាការខេត្តកំពង់ឆ្នាំង បានចេញដីកាតាមចាប់ខ្លួនពលរដ្ឋជាច្រើននាក់ដាក់ពន្ធនាគារ តាមបណ្ដឹងរបស់ភាគីកម្មករក្រុមហ៊ុន៕
