អនុក្រឹត្យនានា បង្ហាញថា ផ្ទៃដីទំហំជាង ៥០០ហិកតានៃផ្ទៃបឹងតាមោកដែលជាបឹងធម្មជាតិសម្រាប់ស្តុកទឹកស្អុយ ស្ថិតនៅភាគខាងជើងនៃរាជធានីភ្នំពេញ ត្រូវបានរដ្ឋាភិបាលសម្រេចកាត់ប្រគល់ទៅឱ្យស្ថាប័នរដ្ឋចំនួន៣ សម្រាប់សាងសង់អគារ ឬហេដ្ឋារចនាសម្ព័ន្ធផ្សេងៗ និងក្រុមហ៊ុនឯកជនចំនួន៣ទៀត។
ក្នុងអនុក្រឹត្យចុះថ្ងៃទី២២ ខែមិថុនាកន្លងមកនេះ លោកនាយករដ្ឋមន្ត្រី ហ៊ុន សែន បានសម្រេចកាត់ដីបឹងតាមោកទំហំជិត ៣០០ហិកតា (២៩៨.៥៤) ប្រគល់ទៅឱ្យក្រសួងការពារជាតិ។ ការសម្រេចនេះ ត្រូវបានធ្វើឡើងទៅតាមការស្នើឡើងរបស់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា។
វីអូឌីបានស្វែងរកការបកស្រាយបន្ថែមពីអ្នកនាំពាក្យក្រសួងរៀបចំដែនដី លោក សេង ឡូត និងរដ្ឋមន្ត្រីក្រសួងរៀបចំដែនដី លោក ជា សុផារ៉ា នៅថ្ងៃនេះ ប៉ុន្តែ មិនទទួលបានការឆ្លើយតបនោះឡើយ។
បើតាមអនុក្រឹត្យដដែលនេះ ផ្ទៃដីទំហំជិត ៣០០ហិកតាដែលត្រូវកាត់ចេញពីផ្ទៃបឹងតាមោកនេះ នឹងត្រូវរៀបចំទៅជាអគ្គបញ្ជាការដ្ឋានកងយោធពលខេមរភូមិន្ទ និងប្រើប្រាស់ជាទីកន្លែងដឹកនាំបញ្ជាយុទ្ធសាស្ត្រយូរអង្វែង។
អ្នកនាំពាក្យក្រសួងការពារជាតិ លោក ឈុំ សុជាត មានប្រសាសន៍ថា ក្រសួងបានដាក់សំណើទៅក្រសួងរៀបចំដែនដី ដើម្បីសុំកាត់ផ្ទៃដីនៅបឹងតាមោកសម្រាប់គោលបំណងខាងលើនេះ ប៉ុន្តែ លោកបដិសេធបកស្រាយលម្អិតអំពីគម្រោងសាងសង់សំណង់នានារបស់យោធានៅលើផ្ទៃដីបឹងនោះ។
លោក ឈុំ សុជាត ប្រាប់ថា៖ «ធ្វើទីតាំងបញ្ជាការកងទ័ព ដោយឡែកលម្អិតទៀត ខ្ញុំអត់និយាយកើតទេ គ្រាន់តែដឹងថា ជាកន្លែងកងទ័ព។ [ក្រសួងការពារស្នើទៅក្រសួងដែនដី] ធម្មតាដីរបស់រដ្ឋ ធ្វើទៅតាមឋានានុក្រម ខ្ញុំយល់មិនច្បាស់ទេរឿងហ្នឹង ប៉ុន្តែគ្រាន់តែដឹងថា រដ្ឋាភិបាលសម្រេចឱ្យមកកងទ័ពដើម្បីសង់បន្ទាយទាហាន ហើយសង់ថ្ងៃណា បន្តិចទៀតឃើញហើយ ព្រោះរឿងយោធា យើងមិនអាចនិយាយបានទូលំទូលាយបានទេ»។
សេចក្ដីជូនដំណឹងដាច់ដោយឡែកមួយទៀតចុះថ្ងៃទី១៣ ខែមីនាកន្លងមកនេះ បានឱ្យដឹងថា រដ្ឋាភិបាលបានសម្រេចកាត់ផ្ទៃដីបឹងតាមោកទំហំ ៨ហិកតាទៀត ស្ថិតនៅក្នុងសង្កាត់គោករការ ខណ្ឌព្រែកព្នៅ ប្រគល់ទៅឱ្យក្រសួងមហាផ្ទៃសម្រាប់សាងសង់អគារ និងហេដ្ឋារចនាសម្ព័ន្ធរបស់នាយកដ្ឋានកណ្ដាលសន្តិសុខ ស្ថិតក្រោមចំណុះអគ្គស្នងការនគរបាលជាតិ។
ចំណែកឯសេចក្ដីជូនដំណឹងចុះថ្ងៃទី២៧ ខែមេសា បានឱ្យដឹងថា រដ្ឋាភិបាលបានសម្រេចកាត់ដីទំហំ ៣០ហិកតាពីផ្ទៃដីបឹងតាមោក ស្ថិតនៅក្នុងសង្កាត់គោករការ ប្រគល់ទៅឱ្យអ្នកស្រី គឹម ហ៊ាង ជាថ្នូរទៅនឹងការដោះដូរដីទំហំសរុប ៩.៨ហិកតានៅក្នុងរាជធានីភ្នំពេញ។
ផ្អែកតាមសេចក្ដីជូនដំណឹងនេះ រដ្ឋាភិបាលបានសម្រេចកាត់ដីប្រគល់ទៅឱ្យអ្នកស្រី គឹម ហ៊ាង ជាថ្នូរទៅនឹងការដោះដូរដីទំហំ ៣ហិកតា ស្ថិតនៅខាងកើតវិមានឈ្នះ-ឈ្នះ ដីទំហំ ២ហិកតាស្ថិតតំបន់ទីក្រុងរណបហ្គាឌិន ស៊ីធី ឬតំបន់អភិវឌ្ឍន៍របស់លោកឧកញ៉ា លី យ៉ុងផាត់ និងដីទំហំ ៤.៨ហិកតាទៀត ស្ថិតនៅអតីតទីលានចាក់សំរាមស្ទឹងមានជ័យ។
នៅក្នុងដំណោះស្រាយនៃការដោះដូរនេះ អ្នកស្រី គឹម ហ៊ាង ដែលជាភរិយាលោក លី យ៉ុងផាត់ ត្រូវបានតម្រូវឱ្យផ្ដល់សំណងទៅម្ចាស់កម្មសិទ្ធិដែលកាន់កាប់ដីលើផ្ទៃបឹងទៅតាមគោលនយោបាយរបស់រដ្ឋាភិបាលនូវតម្លៃ ៥ដុល្លារក្នុងមួយម៉ែត្រការ៉េ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់ថា កំពុងជាប់ប្រជុំ នៅពេលវីអូឌីស្វែងរកការបកស្រាយបន្ថែម ជុំវិញការកាត់ផ្ទៃបឹងតាមោកប្រគល់ទៅឱ្យក្រុមហ៊ុនឯកជន។
នៅក្នុងអនុក្រឹត្យចុះថ្ងៃទី២៣ ខែមេសាកន្លងមកនេះ រដ្ឋាភិបាលក៏បានសម្រេចកាត់ដីផ្ទៃបឹងតាមោកទំហំជិត ៤៦(៤៥.៧៥)ហិកតា ស្ថិតក្នុងសង្កាត់ពន្សាំង ប្រគល់ទៅឱ្យអ្នកស្រី ស៊ុយ សុផាន ហើយដីទំហំជិត ៨(៧.៧១)ហិកតាទៀត ស្ថិតនៅសង្កាត់គោករការ ប្រគល់ទៅឱ្យបុគ្គលឈ្មោះ ម៉ែន សុខ។
បឹងតាមោកដែលមានផ្ទៃក្រឡាសរុបដល់ទៅ ៣,២៣៩ហិកតា នៅសង្កាត់គោករការ ក្នុងខណ្ឌព្រែកព្នៅ ត្រូវបានរដ្ឋាភិបាលសម្រេចដាក់ជាសម្បត្តិរបស់រដ្ឋទៅតាមសេចក្ដីសម្រេចក្នុងអនុក្រឹត្យចេញកាលពីខែកុម្ភៈ ឆ្នាំ២០១៦ ដើម្បីរក្សាទុកបឹងធម្មជាតិមួយនេះ ជាកន្លែងស្តុកទឹកកខ្វក់ និងរំដោះជំនន់ទឹកភ្លៀងចេញពីរាជធានីភ្នំពេញ។
វីអូឌីបានស្វែងរកការបកស្រាយបន្ថែមពីអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ផងដែរនៅថ្ងៃនេះ ប៉ុន្តែ លោកមិនទទួលទូរស័ព្ទនោះឡើយ។
នាយកប្រតិបត្តិនៃសមាគមធាងត្នោត លោក សឿង សារ៉ន សង្កេតឃើញថា រដ្ឋាភិបាលបានសម្រេចកាត់ផ្ទៃបឹង និងធ្វើអនុប្រយោគទ្រព្យសម្បត្តិរបស់រដ្ឋដោយគ្មានការពិគ្រោះយោបល់ជាមួយអង្គការសង្គមស៊ីវិលពាក់ព័ន្ធ ហើយក៏មិនបានសិក្សាផលប៉ះពាល់ទៅលើសង្គម សេដ្ឋកិច្ច ឬបរិស្ថានដែរ។
លោក សឿង សារ៉ន ប្រាប់ថា លោកចង់ឱ្យរដ្ឋាភិបាលធ្វើការសិក្សាឱ្យបានច្បាស់លាស់ មុននឹងសម្រេចកាត់ផ្ទៃបឹងតាមោក ឬផ្ទៃបឹងទំនប់កប់ស្រូវទៅឱ្យក្រុមហ៊ុន និងស្ថាប័នរដ្ឋ ដើម្បីធ្វើការអភិវឌ្ឍនោះ។
លោក សឿង សារ៉ន ប្រាប់ថា៖ «បឹងតាមោក វាជាបឹងមួយដែលធំក្នុងរាជធានីភ្នំពេញ វាមានតួនាទីសំខាន់ក្នុងការរំដោះទឹក មួយទៀតគឺផ្ដល់ផលនេសាទទៅដល់ប្រជាសហគមន៍ដែលរស់នៅជុំវិញបឹងហ្នឹង។ បើសិនជាអាច រាជរដ្ឋាភិបាលគួរតែរក្សាបឹងហ្នឹងទុកសម្រាប់មនុស្សជំនាន់ក្រោយ ហើយកែលម្អទៅជាតំបន់ទេសចរណ៍មួយនៅក្នុងក្រុង ដែលវាអាចជួយដល់ជីវភាពប្រជាពលរដ្ឋ ហើយមែនទែនទៅ ប្រជាពលរដ្ឋនៅទីក្រុងភ្នំពេញ ហាក់បីដូចជាខ្វះទីសាធារណៈលំហែកាយដែលនៅជិតៗក្រុង»។
កាលពីខែមិថុនា ឆ្នាំ២០១៨ រដ្ឋាភិបាលបានសម្រេចកាត់ផ្ទៃបឹងតាមោកទំហំ ២០ហិកតាតាមសំណើរបស់សាលារាជធានីភ្នំពេញ ដើម្បីអភិវឌ្ឍធ្វើផ្សារបន្លែ និងចំណតរថយន្ត មុននឹងកាត់ផ្ទៃបឹងទំហំ ៧៥ហិកតាបន្ថែមទៀតសម្រាប់យកទៅអភិវឌ្ឍធ្វើជាឧទ្យានធម្មជាតិសាធារណៈ។
របាយការណ៍ដែលចេញផ្សាយដោយសមាគមធាងត្នោតកាលពីថ្ងៃទី២៦ ខែធ្នូ ឆ្នាំ២០១៩ បង្ហាញថា បឹងធម្មជាតិទាំងអស់នៅរាជធានីភ្នំពេញ កំពុងប្រឈមនឹងការចាក់ដីលុបអស់ទាំងស្រុង។ របាយការណ៍បញ្ជាក់ថា គិតចាប់ពីឆ្នាំ១៩៩០មក បឹងចំនួន ១៦ហើយត្រូវបានចាក់ដីលុបទាំងស្រុង ខណៈបឹងចំនួន ១០ទៀត ត្រូវគេចាក់លុបមួយផ្នែកៗជាបណ្ដើរៗ៕
