សមាជិក ៨នាក់របស់សហគមន៍ជនជាតិដើមភាគតិចកួយនៅស្រុកត្បែងមានជ័យ ខេត្តព្រះវិហារ បានរួចផុតពីការចោទប្រកាន់របស់តុលាការ ក្រោយរងបណ្តឹងក្រុមហ៊ុនចិនមួយអស់រយៈពេលជាង ៥ឆ្នាំមកហើយនោះ។
ក្នុងដីកាកោះហៅឱ្យចូលសវនាការចុះថ្ងៃទី២៦ ខែឧសភា តំណាងអយ្យការអមសាលាដំបូងខេត្តព្រះវិហារ លោក ភី ស៊ីថង បានកោះហៅជនជាតិដើមភាគតិចកួយ ៨នាក់ នៅភូមិបុស្សធំ ឃុំប្រមេ រួមមាន លោក ប៉ាវ សែវ លោក ផុន រុំ លោក ភូ ភេន លោក ណម ថុល លោក ហោ ធាន្នី លោក ថី ហឿន លោក យន់ សន និងលោក ស្រាល សុឃី ឱ្យចូលរួមសវនាការនៅថ្ងៃទី១០ ខែមិថុនាកន្លងមកនេះ ក្រោមការចោទពីបទ«ចាប់ឃុំឃាំង និងបង្ខាំងដោយខុសច្បាប់» ដែលធ្វើទៅតាមបណ្តឹងរបស់ក្រុមហ៊ុនចិនឈ្មោះ ឡានហ្វេង និងក្រុមហ៊ុន រ៉ូយហ្វេង។
លោក ថី ហុន ដែលអះអាងថា ជាតំណាងប្រជាសហគមន៍ជនជាតិដើមភាគតិចកួយ ប្រាប់វីអូឌីថា សាលក្រមរបស់តុលាការត្រូវបានប្រកាសនៅព្រឹកថ្ងៃនេះ ខណៈអ្នកភូមិជនជាតិដើមភាគតិចជិត ១០០នាក់ បានទៅប្រមូលផ្តុំមុខសាលាដំបូងខេត្ត ដើម្បីរង់ចាំលទ្ធផលនៃសាលក្រម។
តំណាងសហគមន៍ជនជាតិដើមភាគតិចកួយរូបនេះ ឱ្យដឹងថា តុលាការបានប្រកាសសាលក្រមដោយសម្រេចទម្លាក់ចោលបទចោទលើជនជាតិដើមភាគតិចទាំង ៨នាក់នោះ។
លោក ថី ហុន រំលឹកថា កាលពីឆ្នាំ២០១៤ ប្រជាសហគមន៍ជនជាតិដើមភាគតិចកួយនៅឃុំប្រមេ បាននាំគ្នាទៅរារាំងគ្រឿងចក្ររបស់ក្រុមហ៊ុន ឡានហ្វេង និងក្រុមហ៊ុន រ៉ូយហ្វេង មិនឱ្យឈូសឆាយដីព្រៃសហគមន៍ជនជាតិដើមភាគតិចនៅក្នុងឃុំប្រមេ ហើយថា ក្រោយមក នៅឆ្នាំ២០១៥ ក្រុមហ៊ុនចិនមួយនេះបានប្តឹងសមាជិក ៨នាក់របស់សហគមន៍ទៅតុលាការ ដោយចោទថា សមាជិកសហគមន៍ទាំងនោះ បានឃុំឃាំង និងបង្ខាំងគ្រឿងចក្រក្រុមហ៊ុនដោយខុសច្បាប់។
លោក ថី ហុន អះអាងថា ប្រជាសហគមន៍មិនបានឃុំឃាំង ឬបង្ខាំងគ្រឿងចក្រក្រុមហ៊ុនដូចការចោទប្រកាន់ឡើយ ដោយលោកថា ពួកគេគ្រាន់តែរារាំងគ្រឿងចក្រក្រុមហ៊ុនមិនឱ្យឈូសឆាយប៉ះពាល់ដីព្រៃសហគមន៍ប៉ុណ្ណោះ។
លោក ថី ហុន លើកឡើងថា សំណុំរឿងនេះត្រូវបានតុលាការខេត្តព្រះវិហារដំណើរការសវនាការជាច្រើនលើកមកហើយ ប៉ុន្តែ មិនដែលទម្លាក់ការចោទប្រកាន់ដូចលើកនេះទេ បើទោះបីសហគមន៍បង្ហាញភស្តុតាង និងអះអាងថា មិនបានប្រព្រឹត្តកំហុសដូចការចោទប្រកាន់របស់ក្រុមហ៊ុននោះទេ៕
