បទ​​យក​ការណ៍​៖​ វត្ត​​មួយ​​នៅ​​ត្បូង​ឃ្មុំ​​ស្វែង​រក​​ដី​​ប្តូរ​​ទី​តាំង​​ព្រោះ​​ប្រឈម​​នឹង​​ការ​​បាក់​​ចូល​ទន្លេ​​

លោកតាអាចារ្យ ម៉ៃ វ័យ៧៦ឆ្នាំ ឈរនៅមាត់ច្រាំងទន្លេមេគង្គទីតាំងដីវត្ត​រកាធំ ឬវត្ត​ឧទុម្ពរ​វនា​រាម​រកាធំ នៅក្នុង​ភូមិ​រកា ស្រុក​ត្បូងឃ្មុំ ខេត្ត​ត្បូងឃ្មុំ កាលពីថ្ងៃទី១៥ ខែកក្កដា ឆ្នាំ២០២០។ (ពេញ ចំរើន)

ខេត្ត​ត្បូងឃ្មុំ៖ វត្ត​រកាធំ ឬវត្ត​ឧទុម្ពរ​វនា​រាម​រកាធំ នៅក្នុង​ភូមិ​រកា ស្រុក​ត្បូងឃ្មុំ ខេត្ត​ត្បូងឃ្មុំ បាន​បាត់បង់​បន្ទប់ទឹក​ចំនួន៥រួចមក​ហើយ​ចូល​ក្នុង​ផ្ទៃ​ទន្ល​មេគង្គ​ជាបន្តបន្ទាប់។ ចំណែក​ឯកុដិ​ដែល​ព្រះសង្ឃ​គង់នៅក៏​ត្រូវ​បាន​រំកិល​ជាច្រើន​សារ​មក​ហើយ​ដែរក្នុងរយៈពេល​ប៉ុន្មាន​ឆ្នាំ​ចុងក្រោយ​នេះ ដោយសារតែ​បាក់​ច្រាំង​ដងទន្លេ​មេគង្គ​ ដែល​អ្នកស្រុក​បាន​និយាយ​ថា​មាន​ស្ថានភាព​អាក្រក់​ក្នុង​ឆ្នាំនេះ។

វត្ត​រកាធំ ឬវត្ត​ឧទុម្ពរ​វនា​រាម​រកាធំ នៅក្នុង​ភូមិ​រកា ស្រុក​ត្បូងឃ្មុំ ខេត្ត​ត្បូងឃ្មុំ កាលពីថ្ងៃទី១៥ ខែកក្កដា ឆ្នាំ២០២០។ (ពេញ ចំរើន)

ដោយ​បាន​ចង្អុល​ទៅ​បន្ទប់​អនាម័យ​ដែល​រៀបនឹង​បាក់​ចូលទន្លេ​មេគង្គ អ្នកស្រី ពេជ្រ ស៊ន់ វ័យ៧០ឆ្នាំ​ ដែល​ជា​គណៈ​កម្មការ​វត្ត​រកាធំ បាន​ប្រាប់​ថា៖ «គ្រាន់តែ​បន្ទប់​អនាម័យ៥ហើយ […] អា​ពីរ​ជាន់​ក៏​មាន។ អានេះ​ក្រោយ​ទេ ទើបតែ​ធ្វើ​អស់២ពាន់​ដុល្លារ ឥលូវទន់​កហើយ»។ 

អ្នកស្រី​ ពេជ្រ ស៊ន់ អង្គុយផ្អែក​សសរ​សាលាឆាន់​និង​ពាក់​ស្បែកជើងសង្រែក បាន​និយាយ​បន្ត​ដូច្នេះ​ថា៖ «ដំបូង​កុដិ​នៅ​នេះ រួចហើយ​រុញ​មក​ទីនេះ ហើយ​ទើបនឹង​ទឹកស្រក រុញ​មក​ដាក់​ហ្នឹង»។

អ្នកស្រី​លើកឡើង​បន្ត​ទៀត​ថា ​សម្រាប់​រោងដាក់​ទូក​​ប្រណាំង​របស់​វត្ត​វិញ គឺ​នៅសល់​តែ​ប្រមាណ​ជា៥ជំហាន​ទៀត​ប៉ុណ្ណោះ​នឹង​ដល់​ច្រាំងទន្លេ​ដែល​បាន​បាក់​ហើយ។ អ្នកស្រី​បាន​ប្រាប់​ថា ​មន្រ្តី​ធនធានទឹក និងឧតុនិយម ក៏បាន​ដាក់​បាវ​ខ្សាច់​ការពារ​កាលពី​ខែមិថុនា ​ឆ្នាំ២០២០នេះ​ ដើម្បី​កុំឱ្យ​បាក់​ថែមទៀត​ដែរ ក៏ប៉ុន្តែ​គណៈ​កម្មការ​វត្តនៅតែ​មានការ​ព្រួយបារម្ភ​ខ្លាំង​ដដែល។

ទិដ្ឋភាពបាក់ច្រាំងទីតាំងដីវត្ត​រកាធំ ឬវត្ត​ឧទុម្ពរ​វនា​រាម​រកាធំ ចូលទៅក្នុងទន្លេមេគង្គ ដែលស្ថិតនៅក្នុង​ភូមិ​រកា ស្រុក​ត្បូងឃ្មុំ ខេត្ត​ត្បូងឃ្មុំ។ (ពេញ ចំរើន/ ១៥ កក្កដា ២០២០)

អ្នកស្រី​ ពេជ្រ ស៊ន់ ដែល​មិន​ចេះ​ហែលទឹក បាន​ស្នាក់នៅ​វត្ត​រកាធំ​នេះ​រយៈពេល១០ឆ្នាំ​មក​ហើយ​ជាមួយនឹង​ស្រ្តី​ម្នាក់ទៀត​ឈ្មោះ​ សាំ សុខុម អាយុ៧៥ឆ្នាំ ដើម្បី​ធ្វើ​ចង្ហាន់​ប្រគេន​លោក។

ស្ថិតនៅ​ក្បែរ​ស្ពាន​គីហ្សូណា វត្ត​រកាធំ​ដែល​កសាង​ឡើង​ក្នុង​ឆ្នាំ១៩៥៧ នៅ​ជាប់នឹង​សាលារៀន​ផង​នោះគឺ​មាន​សភាព​ស្ងប់ស្ងាត់ ​ហើយ​បច្ចុប្បន្ន​នេះ​មាន​ព្រះ​សង្ឃ​តែ២អង្គ​ទេ បន្ទាប់ពី​ព្រះ​សង្ឃ៥អង្គបាន​លាចាក​សិក្ខាបទ​កាលពី​ខែ​មីនា ឆ្នាំ២០២០នេះ ដើម្បី​ទៅ​ជួយ​ក្រុម​គ្រួសារ​របស់​ពួក​គាត់​ដែល​មានជីវ​ភាព​ក្រីក្រ។

អ្នកស្រី​ សាំ សុខុម អង្គុយ​លើ​ស្បែកជើងសង្រែក ឱប​ក្បាលជង្គង់ បាន​រៀបរាប់​ថា ​ក្នុងរយៈពេល៣ឆ្នាំ​ចុងក្រោយ​នេះ ​ច្រាំងទន្លេ​បាន​បាក់​ប្រមាណ​ប្រវែង​ជា១០០ម៉ែត្រ​ ហើយ​ការ​ព្រួយបារម្ភ​នៅតែ​មាន​ ខណៈ​ដែល​គណកម្ម​ការ​វត្ត​បាន​ស្វែងរក​ដី​ថ្មី​ដើម្បី​បម្លាស់​ទីវត្ត​នេះ​ដែរ។

អ្នកស្រី​ សាំ សុខុម​ បានឱ្យ​ដឹង​ថា ​ចៅអធិការវត្ត​បាន​កក់​ទិញ​ដី​គេ​កាលពី​បី​ខែមុន​នៅ​ភូមិ​ទួល​កែវ ឃុំ​ជីរោទិ៍​ទី១ ស្រុក​ត្បូងឃ្មុំ មាន​ទំហំ​ជាង២ហិក​តា ដែល​មាន​ចម្ងាយ​ប្រហែល៨គីឡូម៉ែត្រ​ពីវត្ត​រកាធំ​នេះ ក្នុង​តម្លៃ២ម៉ឺន​ដុល្លារ ក៏ប៉ុន្តែ​មិន​មាន​ថវិកា​គ្រប់​គ្រាន់​នៅឡើយ​ទេ។

អ្នកស្រី​ សាំ សុខុម​ បាន​អះអាង​ដូច្នេះ​ថា៖ «លោក[ព្រះសង្ឃ] មុនគេ​មក​ទប់​ច្រាំង​ហ្នឹង លោក​ភ័យ​ពេក មិនដឹង​ទៅ​ខាងណា បើ​បាក់​អស់​ទៅ មិនដឹង​ទៅ​ខាងណា​ អញ្ចឹង​លោក​ទិញ​ដី​គេ​នៅ​ភូមិ​ទួល​កែវ [..] អត់មាន​ពីណា​ជួយ​ទេ​ […] កក់​គេ អត់​ទាន់​មាន​លុយដុំ ចេះតែ​រក​ឱ្យ​គេ​បន្ត ១០០ ​, ២០០អញ្ចឹង​ទៅ ហើយ​គេ​យល់​ដែរថា​រក​អី​អត់​បាន»។

ក្រៅតែ​ពី​វត្ត​រកាធំ​ដែល​ទទួលរង​ការ​បាក់​ច្រាំងទន្លេ​នេះ ប្រជាពលរដ្ឋ​រាប់​រយ​គ្រួសារ​នៅក្នុង​ភូមិ​ពីរ​ជាប់គ្នាគឺ​ភូមិ​ព្រែក​តូច​និង​ភូមិ​រកាធំដែល​នៅ​មិន​ឆ្ងាយ​ប៉ុន្មាន​ពី​វត្ត​នេះ ក៏បាន​ទទួលរង​គ្រោះ​ផង​ដែរ។ 

លោកតាអាចារ្យ ម៉ៃ និងពុទ្ធបរិស័ទចំណុះជើងវត្ត​ ជួបជុំពិភាក្សាគ្នា នៅវត្តរកាធំ ឬវត្ត​ឧទុម្ពរ​វនា​រាម​រកាធំ ក្នុង​ភូមិ​រកា ស្រុក​ត្បូងឃ្មុំ ខេត្ត​ត្បូងឃ្មុំ កាលពីថ្ងៃទី១៥ ខែកក្កដា ឆ្នាំ២០២០។ (ពេញ ចំរើន)

បណ្តើរ​កង់ ស្លៀ​កខោ​ពណ៌​ត្នោត អត់​អាវ មានតែ​ក្រមា​បង់ក​មួយ លោក ម៉ៃ វ័យ៧៦ឆ្នាំ គឺជា​អាចារ្យ​ប្រចាំ​នៅ​វត្ត​រកាធំ​នេះ ​បាន​ប្រាប់​អ្នកសារព័ត៌មាន​ថា ​គាត់​បាន​រុះរើ​ផ្ទះ​របស់​គាត់២ដង​ហើយដោយ​សារ​ការ​បាក់​ច្រាំងទន្លេ។ 

លោក ម៉ៃ រៀបរាប់​ថា៖ «ខ្លះ​សែង​ទាំង​យប់​ក៏​មាន​ដែរ សែង​ៗរលំ​ផ្ទះ​ទៀត។ អា​ណា​សែង​ៗ អាណា​ដាក់​ទូ​កៗ។ បាក់​ច្រាំង​នេះ​មិន​ស្រួល​ទេ។»

បើ​ទោះជា​ប្រឈម​នឹង​គ្រោះថ្នាក់​បាក់​ច្រាំង​យ៉ាងណាក៏ដោយ ​ក៏​ប្រជាពលរដ្ឋ​នៅ​ទីនោះ​មិន​មាន​ជម្រើស​ក្នុង​កា​របម្លាស់​ទីនោះ​ទេ។ នេះ​បើ​យោង​តាម​អតីត​មេភូមិ​រកាធំ លោក​ ប៉ុន ឈន អាយុ៦៥ឆ្នាំ។

លោក ​ប៉ុន ឈន បាន​និយាយ​ដូច្នេះ​ថា៖ «បើ​និយាយ​ពី​រឿង​ភ័យ​ហ្នឹង វា​ភ័យ​ហើយ ប៉ុន្តែ​គ្រាន់តែ​ថា ចុះបើ​ភ័យ​ម៉េច​ក៏មិន​រត់ ម៉េចក៏មិន​រក​កន្លែង​ផ្សេងទៀត អ្នកខ្លះ​គ្នា​គ្មាន​ជម្រើស ដូច​ខ្ញុំ​ក៏​គ្មាន​ជម្រើស​ដែរ ​គ្រាន់តែ​កើតមក​នៅ​នេះ ចោលស្រុក ចោល​ទេស វា​អត់​កើត»។

ប្រជាពលរដ្ឋ​ជាច្រើន​នាក់​ដែល​ត្រូវ​បាន​សម្ភាស​ ​អះអាង​ថា​ ពួក​គាត់​មិនដឹង​ពី​មូលហេតុ​ចម្បង​នៃ​ការ​បាក់ច្រាំង​ទន្លេ​នេះ​ទេ។

ក៏ប៉ុន្តែ​អ្នក​ពិគ្រោះ​យោបល់​ឯករាជ្យ​ផ្នែក​ធនធាន​ទន្លេ និង​បរិស្ថាន លោក​ ហែម ឧត្តម ​បាន​លើកឡើង​ថា បណ្តា​ខេត្ត​ដែល​នៅ​ជាប់​បឹង​ទន្លេ​មេ​គង្គ​បាន​ទទួល​រង​ការ​បាក់​ច្រាំង​គួរ​ឱ្យ​ព្រួយបារម្ភ​ក្នុងរយៈពេល៥ឆ្នាំ​ចុងក្រោយ​នេះ ​បន្ទាប់ពី​មានការ​កើនឡើង​នូវ​ទំនប់​វារី​អគ្គិស​នី​នៅ​ផ្នែក​ខាងលើ​ទន្លេនៅ​ខាង​ប្រទេស​ចិននិង​ឡាវ។ 

លោក​ ហែម ឧត្ត​ម និយាយ​ថា៖ «នៅពេល​ដែល​ភក់ល្បាប់​មាន​ជីជាតិ​ទាំងអស់​ហ្នឹង ត្រូវ​បាន​រាំង​ខ្ទប់​ដោយ reservoir [អាងស្តុកទឹក​] នៃ​ទំនប់​វារីអគ្គិសនី​នៅ​ផ្នែក​ខាងលើ​ហ្នឹង ឃើញថា ​ខ្វះ​ភក់ល្បាប់​នេះ ដូច្នេះ​ទឹក​ហ្នឹង​វា​ហូរ​មក​មាន​ល្បឿនខ្លាំង​ ហើយវា​អាច​ធ្វើឱ្យ​បាក់​ច្រាំងទន្លេ​ហ្នឹង ​គេ​ហៅថា​ជា hungry water ដោយសារ​វា​ខ្វះ​អា​ភក់ល្បាប់​មាន​ជីជាតិ​ហ្នឹង»។

អភិបាលខេត្ត​ត្បូងឃ្មុំ លោក ជាម ច័ន្ទ​សោភ័ណ្ឌ មិន​អាច​ទាក់​ទងសុំ​ការ​អត្ថា​ធិប្បាយ​ជុំវិញ​បញ្ហា​នេះ​បានទេ។

អភិបាលរងខេត្ត​ត្បូងឃ្មុំ លោក ហាក់ សុខ​មករា បាន​ទទួលស្គាល់​ថា វ​ត្ត​រកា​រធំ​នេះ​ពិតជា​រង​ការ​ប៉ះពាល់​ពី​ការ​បាក់​ច្រាំង ដោយ​ថា​ វា​បាន​បាក់​ចូល​ដល់​ចំនុច​ពាក់កណ្តាល​វត្ត​ហើយ ​ប៉ុន្តែ​លោក​មិនបាន​បញ្ជាក់​ពី​វិធានការ​នោះ​ទេ ដោយ​ទុក​វិធានការ​ដោះស្រាយ​ឱ្យ​មន្ទីរ​ធនធានទឹក និងឧតុនិយម​ខេត្ត​ត្បូងឃ្មុំ​វិញ។

ប្រធានមន្ទីរ​ធនធានទឹក និង​ឧតុ​និយម​ខេត្ត​ត្បូងឃ្មុំ លោក ​យា វឿន បាន​និយាយ​ថា ​ការ​បាក់​ច្រាំង​ជា​រឿង​ធម្មតា​ ហើយ​ខាង​ក្រសួង​បាន​ចេញ​វិធានការ​ដោយ​ដាក់​បាវ​ខ្សាច់​ដើម្បី​ទប់​រួចហើយ។ ទោះ​យ៉ាងណាក៏ដោយ ​លោក​មិន​ច្បាស់​ថា ​អាច​ទប់​ជាប់​ឬអត់ទេ ប៉ុន្តែ​លោក​អះអាង​ថា ប្រហែលជា​លែង​បាក់​ទៀតហើយ។

លោក​ យា វឿន​ មានប្រសាសន៍​ថា៖ «ឥលូវខាង​ក្រសួងធនធានទឹក មក​ទប់​បាវ​ប៉ុណ្ណឹង​ហើយ ប្រហែលជា​លែង​បាក់​ហើយ តាមមើល​នៅ​ទីតាំង​ហ្នឹង។ វិធានការ​ដាក់​បាវ បានន័យ​ថា អាហ្នឹង​ជួយ​កុំ​ឱ្យ​បាក់​ច្រាំង វិធានការ​របស់​យើង»៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered