អាជ្ញាធរស្រុកព្រៃនប់ ខេត្តព្រះសីហនុ បានចាប់ខ្លួនពលរដ្ឋ២នាក់ដោយចោទប្រកាន់ថាពួកគេបានចូលទន្រ្ទានកាន់កាប់ដីរដ្ឋ។
សេចក្តីប្រកាសព័ត៌មានរបស់មន្ទីរបរិស្ថានខេត្តព្រះសីហនុដែលចេញកាលពីថ្ងៃទី២៤ ខែកក្កដា ឱ្យដឹងថាក្នុងពេលថ្មីៗនេះមានសកម្មភាពចូលទន្រ្ទានដីរដ្ឋកំពុងកើតឡើងនៅចំណុចភូមិសាស្ត្រភ្នំត្រង៉ោល ភូមិចំណោមរាម ឃុំបិទត្រាង ស្រុកព្រៃនប់ ខេត្តព្រះសីហនុ។ ប្រភពដដែលឱ្យដឹងថាកាលពីម្សិលមិញ អាជ្ញាធរស្រុកព្រៃនប់ បានជួបប្រទះជាមួយពលរដ្ឋមួយក្រុមមានគ្នា៣០នាក់ធ្វើសកម្មភាពកាប់ទន្រ្ទាន ឆ្ការព្រៃ ដាំដំណាំថ្មីៗ សង់ខ្ទម ទិញ-លក់ដី និងធ្វើរបងហ៊ុំព័ទ្ធយកដីនៅទីតាំងនោះ។
ប្រភពដដែលបានបន្ថែមថាបន្ទាប់ពីបានជួបពលរដ្ឋទាំងនោះ អាជ្ញាធរនិងមន្រ្តីឧទ្យាននុរក្ស បានធ្វើការណែនាំ ប៉ុន្តែប្រជាពលរដ្ឋចំនួន៣០នាក់បានធ្វើការរារាំងតវ៉ា ទើបអាជ្ញាធរស្រុកព្រៃនប់ឃាត់ខ្លួនពលរដ្ឋ២នាក់ បញ្ជូនទៅស្នងការដ្ឋាននគរបាលខេត្តព្រះសីហនុដើម្បីធ្វើការសាកសួរ។
លោក នេត្រ ភក្ត្រា រដ្ឋលេខាធិការនិងជាអ្នកនាំពាក្យក្រសួងបរិស្ថាន បដិសេធមិនធ្វើការអត្ថាធិប្បាយបន្ថែមជុំវិញបញ្ហានេះទេ។
លោកបានប្រាប់ថា៖«រឿងរ៉ាវហ្នឹងដោះស្រាយចប់ហើយ ចប់តាំងពីម្សិលមិញម្ល៉េះ។ខ្ញុំមិនអាចឆ្លើយបានទេសូមយោងតាមលិខិតចុះផ្សាយទៅ»។
អធិការរងនគរបាលស្រុកព្រៃនប់ លោក សេង ចំរើន បានប្រាប់វីអូឌីនៅព្រឹកថ្ងៃសៅរ៍នេះថាលោកមិនអាចឆ្លើយទៅនឹងសំណួររបស់អ្នកសារព័ត៍មានបានទេព្រោះលោកមិនទាន់បានទទួលបានព័ត៌មានទាក់ទងនឹងបញ្ហានេះទេ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ឱ្យដឹងថាអ្នកស្រីមិនទាន់បានចុះទៅពិនិត្យផ្ទាល់នោះទេ ដោយសារអ្នកស្រីមានភារកិច្ចមកភ្នំពេញ។ ក៏ប៉ុន្តែអ្នកស្រីបញ្ជាក់ថាតំបន់មួយចំនួនក្នុងភូមិសាស្ត្រខាងលើប្រជាពលរដ្ឋកាន់កាប់ដីនេះតាំងពីយូរមកហើយ ដោយមិនមានការគ្រប់គ្រងពីក្រសួងបរិស្ថាននោះទេ។
លោកស្រី សុធាវី ថ្លែងថា៖« ខ្ញុំមិនទាន់បានជួបជនរងគ្រោះទេ។ ប៉ុន្តែខ្ញុំនឹងអាចសាកសួរគាត់នៅក្នុងតុលាការបាន ព្រោះនៅតុលារអង្គការសង្គមស៊ីវិលមានសិទិ្ធសួរជនរងគ្រោះផ្ទាល់»៕
គិតត្រឹមម៉ោង៥រសៀលថ្ងៃនេះ វីអូឌី មិនទាន់អាចសុំការឆ្លើយតបពីក្រុមពលរដ្ឋដែលមានរងការចោទប្រកាន់ពីអាជ្ញាធរបាននៅឡើយទេ៕
