ក្រសួងសុខាភិបាល បានប្រកាសរកឃើញអ្នកឆ្លងវីរុសកូវីដ១៩ចំនួន២នាក់បន្ថែមទៀត ដែលនាំឱ្យករណីកូវីដ១៩នៅកម្ពុជាកើនដល់២៤៨នាក់។
យោងតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី៩ ខែសីហានេះ បានលើកឡើងថា អ្នកឆ្លងវីរុសកូវីដ១៩ថ្មី ជាស្ត្រីជនជាតិខ្មែរ មានអាយុ២៧ឆ្នាំ ដែលជាក្រុមមួកខៀវ អង្គការសហប្រជាជាតិរបស់កម្ពុជា ទើបវិលត្រឡប់មកពីប្រទេសម៉ាលី មកកាន់កម្ពុជា និងមានអាស័យដ្ឋាននៅភូមិព្រែកត្រែង សង្កាត់សិត្បូ ក្រុងតាខ្មៅ ខេត្តកណ្ដាល ។ គាត់ត្រូវបានរកឃើញថាមានកូវីដ១៩ នៅពេលធ្វើតេស្តលើកទី៥។ ស្រ្តីរូបនេះកំពុងសម្រាកព្យាបាលនៅមន្ទីរពេទ្យជ័យជំនះ ក្រុងតាខ្មៅ ខេត្តកណ្តាល។
រីឯអ្នកឆ្លងជំងឺកូវីដម្នាក់ទៀត ជាស្ត្រីជនជាតិកាណាដាអាយុ ៤១ឆ្នាំ រួមដំណើរមានកូនប្រុស០១នាក់ និងកូនស្រី០១នាក់ បានធ្វើដំណើរមកពីប្រទេស Ubekiztan ឆ្លងកាត់តាមឌូបៃ និងបន្តជើងហោះហើរ នៅប្រទេសកូរ៉េខាងត្បូង មកដល់កម្ពុជា កាលពីថ្ងៃទី០៧ ខែសីហា ឆ្នាំ២០២០។ស្រ្តីរូបនោះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។
ដោយឡែក អ្នកដែលទើបព្យាបាលជាសះស្បើយ២នាក់ ជាបរុសជនជាតិខ្មែរ អាយុ៣០ឆ្នាំ មានអាស័យដ្ឋាននៅភូមិព្រៃខ្ជាយ ឃុំបារាយណ៍ ស្រុកព្រៃឈរ ខេត្តកំពង់ចាម និងបុរសអាយុ ២៩ឆ្នាំ មានអាស័យដ្ឋាននៅភូមិ១ ឃុំឡាមិញ ស្រកបរកែវ ខេត្តរតនគិរី។ បុរសទាំង០២នាក់នេះ បានធ្វើដំណើរមកពីប្រទេសប៉ាគីស្ថាន បន្តជើងយន្តហោះនៅ ប្រទេសម៉ាឡេស៊ី មកប្រទេសកម្ពុជា។
បើតាមក្រសួងសុខាភិបាល គិតត្រឹមព្រឹកថ្ងៃ៩ ខែសីហា ឆ្នាំ២០២០នេះ មានមនុស្សចំនួន ២៤៨នាក់ហើយ ដែលត្រូវបានរកឃើញឆ្លងវីរុសកូវីដ-១៩ នៅក្នុងប្រទេសកម្ពុជា ក្នុងនោះអ្នកជំងឺ២១៧នាក់ ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅក្នុងមន្ទីរពេទ្យរដ្ឋ និងឯកជនចំនួន ៣១នាក់៕
