ក្រសួងសុខាភិបាលបានប្រកាសពីការរកឃើញករណីវិជ្ជមានជំងឺកូវីដ១៩ថ្មីចំនួន១៥នាក់ទៀត ក្នុងនោះមានជនជាតិចិន១៣នាក់និងមានអ្នកជាសះស្បើយចំនួន១នាក់។
យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃអង្គារនេះ បុរសនិងស្ត្រីជនជាតិចិនទាំង១៣នាក់បានធ្វើដំណើរមកពីប្រទេសហ្វីលីពីនរួមជាមួយនឹងជនជាតិចិនផ្សេងទៀតសរុបចំនួន១១៩នាក់ តាមជើងហោះហើរដែលមកដល់កម្ពុជាកាលពីថ្ងៃទី០៩ ខែសីហា។
ក្រសួងបន្តថា អ្នកជំងឺទាំងនោះត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ ខណៈអ្នកដែលមានលទ្ធផលតេស្តអវិជ្ជមានទាំងអស់ត្រូវបានដាក់ឱ្យធ្វើចត្តាឡីស័ក(ដាក់ឱ្យនៅដាច់ដោយឡែក)ចំនួន១៤ថ្ងៃ នៅសណ្ឋាគារមួយក្នុងរាជធានីភ្នំពេញ។
ក្រសួងបញ្ជាក់ថា ចំពោះពលរដ្ឋខ្មែរចំនួន២នាក់ដែលត្រូវបានរកឃើញវិជ្ជមានជំងឺកូវីដ១៩ដែរនោះជាកុមារីជនជាតិខ្មែរអាយុ១៣ឆ្នាំ ស្នាក់នៅសង្កាត់បឹងកេងកង ខណ្ឌចំការមន រាជធានីភ្នំពេញ និងស្ត្រីអាយុ៤៨ឆ្នាំ នៅខណ្ឌដង្កោ រាជធានីភ្នំពេញ។
ក្រសួងបន្ថែមថា កុមារីនិងស្ត្រីខ្មែរទាំងពីរនាក់ជាអ្នកធ្វើដំណើរមកពីសហរដ្ឋអាមេរិក ដោយឆ្លងកាត់ប្រទេសចិន(តៃវ៉ាន់) តាមជើងហោះហើរមកដល់កម្ពុជា នៅថ្ងៃទី០៩ ខែសីហា ដោយមានអ្នកដំណើរសរុប៧៥នាក់។ ក្រសួងថា អ្នកដែលមានលទ្ធផលតេស្តអវិជ្ជមានត្រូវបានដាក់ឱ្យធ្វើចត្តាឡីស័កនៅសណ្ឋាគារចំនួន៣និងនៅមណ្ឌលចត្តាឡីស័កទ័ពអាកាសពោធិ៍ចិនតុង ក្នុងរាជធានីភ្នំពេញ។
ចំពោះអ្នកជាសះស្បើយវិញ ក្រសួងសុខាភិបាលបានឱ្យដឹងថា ជាបុរសជនជាតិខ្មែររស់នៅខេត្តត្បូងឃ្មុំ ដែលបានធ្វើដំណើរមកពីប្រទេសរុស្សី ដោយឆ្លងកាត់ប្រទេសម៉ាឡេស៊ី មកកាន់កម្ពុជា។
បើតាមក្រសួងសុខាភិបាល គិតត្រឹមព្រឹកថ្ងៃ១១ ខែសីហា ឆ្នាំ២០២០នេះ មានមនុស្សចំនួន ២៦៦នាក់ហើយត្រូវបានរកឃើញឆ្លងជំងឺកូវីដ-១៩ នៅក្នុងប្រទេសកម្ពុជា ក្នុងនោះអ្នកជំងឺ២២០នាក់ បានព្យាបាលជាសះស្បើយនិង៤៦នាក់កំពុងសម្រាកព្យាបាលនៅក្នុងមន្ទីរពេទ្យរដ្ឋនិងឯកជន៕
