មន្ត្រីសុខាភិបាលខេត្តត្បូងឃ្មុំ អះអាងថា បុរសជនជាតិខ្មែរម្នាក់នៅខេត្តត្បូងឃ្មុំ ត្រូវបានបញ្ជូនទៅព្យាបាលជំងឺកូវីដ១៩ឡើងវិញ ២សប្ដាហ៍ក្រោយពីបុរសរូបនេះត្រូវបានអនុញ្ញាតឱ្យចាកចេញពីមន្ទីរពេទ្យ ហើយមនុស្ស៤៧នាក់ត្រូវបានដាក់ឱ្យនៅដាច់ដោយឡែកក្រោយប៉ះពាល់នឹងបុរសម្នាក់នេះ។
ប្រធានមន្ទីរសុខាភិបាលខេត្តត្បូងឃ្មុំ លោកវេជ្ជបណ្ឌិត កែវ វណ្ណៈ ប្រាប់វីអូឌីនៅថ្ងៃនេះថា បុរសជនជាតិខ្មែរម្នាក់អាយុ២៩ឆ្នាំ ត្រូវបានដាក់ឱ្យស្ថិតក្រោមការព្យាបាលនៅមន្ទីរពេទ្យស្រុកពញាក្រែក ក្រោយពីត្រូវបានធ្វើតេស្តនិងរកឃើញផ្ទុកវីរុសកូរ៉ូណាជាថ្មីនៅថ្ងៃទី៩ ខែសីហា។
មន្ត្រីសុខាភិបាលរូបនេះបានឱ្យដឹងទៀតថា ពលរដ្ឋខ្មែររូបនេះត្រូវបានព្យាបាលជាសះស្បើយនិងអនុញ្ញាតឱ្យចាកចេញពីមណ្ឌលសុខភាពចាក់អង្រែកាលពីថ្ងៃទី២៦ ខែកក្កដាកន្លងមកនេះ ក្រោយពីត្រូវបានរកឃើញឆ្លងវីរុសកូរ៉ូណាបន្ទាប់ពីធ្វើដំណើរវិលត្រឡប់ពីប្រទេសអារ៉ាប៊ីសាអ៊ូឌីត។
លោក កែវ វណ្ណៈ មានប្រសាសន៍ថា៖ «គាត់ចេញមន្ទីរពេទ្យចាក់អង្រែកាលពីថ្ងៃទី២៦ ខែកក្កដា។ គាត់អាយុ២៩ឆ្នាំ គាត់មកពីប្រទេសអារ៉ាប់ប៊ីសាអ៊ូឌីត។ ដោយសារការតាមដានរបស់ក្រុមគ្រូពេទ្យ គេទុកឱ្យនៅរយៈពេល១៣ថ្ងៃ ត្រូវពិនិត្យមើលឡើងវិញរាល់អ្នកជំងឺវិជ្ជមានដែលបានព្យាបាល គឺត្រូវតែតាមដាននិងស្នាក់នៅផ្ទះ១៣ថ្ងៃទៀត។ ក្រុមគ្រូពេទ្យនឹងខលទៅមកជួប ដើម្បីពិនិត្យសំណាកឡើងវិញ យើងពិនិត្យសំណាកឡើងវិញនៅថ្ងៃទី៨»។
លោកវេជ្ជបណ្ឌិត កែវ វណ្ណៈ បន្តថា មនុស្ស៩នាក់ដែលប៉ះពាល់នឹងបុរសខ្មែររូបនេះដោយផ្ទាល់ ត្រូវបានដាក់ឱ្យនៅដាច់ដោយឡែកនៅវិទ្យាល័យសម្ដេចតេជោ ហ៊ុន សែន នៅក្រុងសួង ហើយមនុស្ស៣៨នាក់ទៀតដែលប៉ះពាល់ប្រយោល ត្រូវបានដាក់ឱ្យនៅដាច់ដោយឡែកក្នុងសាលារៀនមួយស្ថិតនៅភូមិទួលថ្មី ឃុំគរ ស្រុកត្បូងឃ្មុំ។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន អះអាងថា បើតាមការសិក្សារបស់អ្នកវិទ្យាសាស្រ្តនិងអង្គការសុខភាពពិភពលោក អ្នកជំងឺកូវីដ១៩ដែលត្រូវបានព្យាបាលជាសះស្បើយហើយ អាចលាប់ជំងឺនេះឡើងវិញ ដោយសារការនៅសេសសល់នៃសំណល់នៃវីរុសកូរ៉ូណា។
អ្នកស្រី ឱ វណ្ណឌីន ប្រាប់ថា៖ «ការនៅសេសសល់នៃសំណល់នៃវីរុសកូវីដ១៩ បានថមថយ ការតតាំងនៃសរីរាង្គរបស់បុគ្គលនោះ មានន័យថា ភាពផ្ស៊ាំនៃបុគ្គលនោះបានវាយតបជាមួយវីរុសនោះ មានកម្លាំងខ្លាំងជាង ក៏ប៉ុន្តែវីរុសនោះវាថយទៅហើយ ចាញ់ទៅ ក៏ប៉ុន្តែនៅសល់សំណល់វីរុសកូវីដ១៩ហ្នឹង[ទើបកើតឡើង]»។
នេះគឺជាករណីលាប់ទីពីរហើយ បន្ទាប់ពីបុរសខ្មែរម្នាក់នៅរាជធានីភ្នំពេញ បានលាប់ជំងឺកូវីដ១៩ឡើងវិញ ហើយត្រូវបានបញ្ជូនទៅព្យាបាលសារជាថ្មីកាលពីខែមេសាកន្លងមក ១៥ថ្ងៃក្រោយពីត្រូវបានអនុញ្ញាតឱ្យចាកចេញពីមន្ទីរពេទ្យ។
គិតត្រឹមព្រឹកថ្ងៃអង្គារនេះ មនុស្សចំនួន២៦៦នាក់ហើយត្រូវបានរកឃើញឆ្លងវីរុសកូរ៉ូណានៅក្នុងប្រទេសកម្ពុជា ក្នុងនោះអ្នកជំងឺ២២០នាក់ត្រូវបានព្យាបាលជាសះស្បើយ ហើយត្រូវបានអនុញ្ញាតឱ្យចាកចេញពីមន្ទីរពេទ្យ ខណៈមនុស្ស៤៦នាក់ទៀតកំពុងស្ថិតក្រោមការព្យាបាលនៅក្នុងមន្ទីរពេទ្យ៕
