ក្រសួងសុខាភិបាលបានប្រកាសរកឃើញអ្នកជំងឺកូវីដ១៩ ចំនួន៤នាក់ថ្មីទៀតនិងមានករណីជាសះស្បើយចំនួន៣នាក់ ដែលនាំឱ្យអ្នកជំងឺកូវីដ១៩នៅកម្ពុជាកើនដល់២៧២នាក់។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី១៣ ខែសីហានេះ បានលើកឡើងថា អ្នកជំងឺកូវីដ១៩ថ្មីទាំង៤នាក់នេះ រួមមាន បុរសអាយុ២៤ឆ្នាំ មានអាសយដ្ឋាននៅខណ្ឌសែនសុខ រាជធានីភ្នំពេញ, បុរសអាយុ៣០ឆ្នាំ នៅក្រុងសៀមរាប ខេត្តសៀមរាប, បុរសអាយុ៣០ឆ្នាំ នៅស្រុកសំពៅលូន ខេត្តបាត់ដំបង និងបុរសអាយុ២៧ឆ្នាំ នៅស្រុកក្រូចឆ្មារ ខេត្តត្បូងឃ្មុំ។
ក្រសួងបន្តថា ក្នុងចំណោមពួកគេ មាន៣នាក់ជាអ្នកដំណើរតាមជើងហោះហើរមកពីប្រទេសរុស្សី ដែលបានបន្តជើងហោះហើរនៅប្រទេសម៉ាឡេស៊ី មកដល់កម្ពុជា កាលពីថ្ងៃទី១៩ ខែកក្កដា ឆ្នាំ២០២០ និងម្នាក់ទៀត ជាអ្នកដំណើរមកពីប្រទេសឥណ្ឌូនេស៊ី តាមជើងហោះហើរមកដល់កម្ពុជា នៅថ្ងៃទី២៣ ខែកក្កដា ឆ្នាំ២០២០។
ដោយឡែក ចំពោះករណីជាសះស្បើយវិញ ក្រសួងបានបញ្ជាក់ថា ជាបុរសជនជាតិខ្មែរចំនួន៣នាក់ ក្នុងនោះមានពីរនាក់ដែលធ្វើដំណើរតាមជើងហោះហើរមកពីប្រទេសរុស្សី ដែលបានបន្តជើងហោះហើរនៅប្រទេសម៉ាឡេស៊ី និងម្នាក់ទៀត ជាក្រុមមួកខៀវអង្គការសហប្រជាជាតិរបស់កម្ពុជា ដែលបានវិលត្រឡប់មកពីប្រទេសម៉ាលី តាមជើងហោះហើរមកកាន់កម្ពុជា។
បើតាមក្រសួងសុខាភិបាល គិតត្រឹមព្រឹកថ្ងៃ១៣ ខែសីហា ឆ្នាំ២០២០នេះ មានមនុស្សចំនួន២៧២នាក់ហើយដែលត្រូវបានរកឃើញឆ្លងវីរុសកូវីដ-១៩ នៅក្នុងប្រទេសកម្ពុជា ក្នុងនោះអ្នកជំងឺ២២៣នាក់ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅក្នុងមន្ទីរពេទ្យរដ្ឋនិងឯកជនចំនួន៤៩នាក់៕
