អ្នកនាំពាក្យស្នងការដ្ឋាននគរបាលរាជធានីភ្នំពេញ បានឱ្យដឹងថា ចៅក្រមស៊ើបសួរសាលាដំបូង បានសម្រេចឃុំខ្លួនយុវជនខ្មែរថាវរៈចំនួន២នាក់ ដាក់ពន្ធនាគារជាបណ្តោះអាសន្ន ពីបទ ញុះញង់ឲ្យមានភាពវីកវរដល់សន្តិសុខសង្គម ខណៈយុវជន៤នាក់ទៀត ត្រូវបានដោះលែង។
កាលពីរសៀលថ្ងៃទី១៣ ខែសីហា អាជ្ញាធររាជធានីភ្នំពេញ បានចាប់ខ្លួនមនុស្ស ៦នាក់ ក្នុងនោះមានយុវជនខ្មែរថាវរៈចំនួន៥នាក់ ដែលជាអ្នកសកម្មក្នុងការតវ៉ាទាមទារឲ្យមានការដោះលែង លោករ៉ុង ឈុន សមាជិកក្រុមប្រឹក្សាឃ្លាំមើលកម្ពុជា។
អ្នកដែលត្រូវបានអាជ្ញាធរចាប់ខ្លួននោះ រួមមាន ឈ្មោះ ហ៊ុន វណ្ណៈ, ឈឿន ដារ៉ាវី, សំណាង, ថា ឡាវី, យ៉ង សៀងហៃ និងជា គន្ធីន។ បើតាមអាជ្ញាធររាជធានីភ្នំពេញ កញ្ញា ឈឿន ដារ៉ាវី ត្រូវបានសមត្ថកិច្ចចាប់ខ្លួនតាមដីការបស់តុលាការ និង៥នាក់ទៀត ជាបទល្មើសជាក់ស្តែង។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់វីអូឌីនៅម៉ោងជាង៧យប់ថ្ងៃសុក្រនេះថា យុវជនពីរនាក់ រួមមាន កញ្ញា ឈឿន ដារ៉ាវី និងលោក ហ៊ុន វណ្ណៈ ត្រូវបានបញ្ជូនទៅសាលាដំបូងរាជធានីភ្នំពេញ និងត្រូវបានចៅក្រមស៊ើបសួរសម្រេចឃុំខ្លួនជាបណ្តោះអាសន្ននៅពន្ធនាគារហើយ។
លោកបន្តថា ចំពោះយុវជន ៤នាក់ទៀត ត្រូវបានអាជ្ញាធរសម្រេចដោះលែងឱ្យមានសេរីភាពវិញ ក្រោយពីបានបញ្ចប់និតិវិធីសាកសួរ និងបានឲ្យពួកគេធ្វើកិច្ចសន្យាបញ្ឈប់សកម្មភាពតវ៉ា។
លោកថា៖ «៤នាក់នោះ សមត្ថកិច្ចបានដោះលែងហើយនៅល្ងាចនេះ ក្រោយពីពួកគេបានធ្វើកិច្ចសន្យាបញ្ឈប់សកម្មភាពតវ៉ា ចំណែកពីរនាក់ទៀតត្រូវបានតុលាការចេញដីកាឃុំខ្លួនបណ្តោះអាសន្នហើយ»។
យោងតាមដីកាឆែកឆេរលំនៅដ្ឋានរបស់ចៅក្រមស៊ើបសួរសាលាដំបូងរាជធានីភ្នំពេញ លោក ពេជ្រ វិជ្ជាធរ បញ្ជាក់ថា កញ្ញា ឈឿន ដារ៉ាវី ត្រូវបានចោទពីបទ «ញុះញង់ឲ្យមានភាពវីកវរដល់សន្តិសុខសង្គម» ប្រព្រឹត្តនៅក្នុងប្រទេសកម្ពុជា កាលពីខែសីហា ឆ្នាំ២០២០។
វីអូឌី ពុំអាចការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានទេ នៅល្ងាចថ្ងៃសុក្រនេះ។
នាយករងអង្គការការពារសិទ្ធិមនុស្សលីកាដូ លោក អំ សំអាត យល់ថា ការចាប់ខ្លួន និងការចោទប្រកាន់ទៅលើយុវជនទាំងនោះជាបន្តបន្ទាប់ ជាការបំបាក់ស្មារតី និងគំរាមកំហែងក្រុមយុវជនដទៃទៀត ដែលចង់ចូលរួមតវ៉ាទាមទារឱ្យមានយុត្តិធម៌ក្នុងសង្គម។ លោកបន្តថា បើសិនការចាប់ខ្លួនយុវជន និងពលរដ្ឋនៅតែបន្ត នោះកម្ពុជានឹងរងការរិះគន់ពីសហគមន៍អន្តរជាតិ ហើយអាចនឹងមានការបាត់បង់អត្ថប្រយោជន៍ផ្សេងៗ ក្រៅពីប្រព័ន្ធអនុគ្រោះពន្ធ EBA ២០ភាករយនោះ។
លោកថា៖ «ចង់មិនចង់វាអាចនឹងជះឥទ្ធិពលខ្លះសម្រាប់ស្រទាប់យុវជន ប៉ុន្តែខ្ញុំគិតថា ទោះជាយ៉ាងណា ក៏មិនអាចធ្វើឱយុវជនភ័យខ្លាច មិនចូលរួមក្នុងសង្គម ឬក៏ចូលរួមដើម្បីស្វែងរកយុត្តិធម៌ ឬចូលរួម ដើម្បីស្តារ ឬក៏ទាមទារ ឬការអភិវឌ្ឍនៅក្នុងប្រទេសកម្ពុជាយើងដែរ។ ខ្ញុំគិតថា យុត្តិធម៌នៅតែមានការចូលរួមជាបន្ត»។
ក្រោយពីលោករ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារ ពីបទ ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ ពាក់ព័ន្ធនឹងបញ្ហាព្រំដែន កាលពីដើមខែសីហារួចមក យុវជនទាំង៦នាក់នេះ បាននាំគ្នាធ្វើសកម្មភាពតវ៉ាមួយចំនួន ដូចជា ការប្រមូលផ្តុំនៅមុខសាលាដំបូងរាជធានីភ្នំពេញ និងធ្វើយុទ្ធនាការដើរតាមដងវិថីមួយចំនួនក្នុងរាជធានីភ្នំពេញ ដើម្បីទាមទារឱ្យមានការដោះលែង លោក រ៉ុង ឈុន៕
