ក្រសួងសុខាភិបាលបានប្រកាសរកឃើញអ្នកជំងឺកូវីដ១៩ថ្មីម្នាក់ទៀតជាស្ត្រីខ្មែរធ្វើដំណើរមកពីសហរដ្ឋអាមេរិក និងមានករណីជាសះស្បើយចំនួន២នាក់ ដែលនាំឱ្យអ្នកជំងឺកូវីដ១៩នៅកម្ពុជាកើនដល់២៧៣នាក់។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី១៤ ខែសីហានេះ បានលើកឡើងថា ស្ត្រីខ្មែរដែលរកឃើញវិជ្ជមានជំងឺកូវីដ១៩នោះ អាយុ៥១ឆ្នាំ មានស្រុកកំណើតនៅស្រុកថ្មគោល ខេត្តបាត់ដំបង បានធ្វើដំណើរមកពីសហរដ្ឋអាមេរិក ហើយបន្តជើងហោះហើរនៅប្រទេសកូរ៉េខាងត្បូង មកដល់ប្រទេសកម្ពុជា កាលពីថ្ងៃទី៣១ ខែកក្កដា ឆ្នាំ២០២០ និងត្រូវបានធ្វើតេស្តរកឃើញវីរុសនេះកាលពីថ្ងៃទី១៣ ខែសីហា។
ក្រសួងបន្តថា បច្ចុប្បន្ន ស្រ្តីរូបនេះត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
ចំពោះករណីជាសះស្បើយវិញ ក្រសួងបានបញ្ជាក់ថា ជាបុរសជនជាតិខ្មែរ អាយុ២៦ឆ្នាំ នៅខេត្តកណ្តាល និងអាយុ២២ឆ្នាំ នៅខេត្តត្បូងឃ្មុំ ត្រូវបានព្យាបាលជាសះស្បើយដោយទទួលបានតេស្តអវិជ្ជមានវីរុសកូវីដ១៩ចំនួន២ដង និងត្រូវបានអនុញ្ញាតឱ្យចេញពីមណ្ឌលសុខភាពចាក់អង្រែ រាជធានីភ្នំពេញ។
ក្រសួងបានបន្ថែមថា អ្នកជាសះស្បើយទាំងពីរនាក់នេះជាអ្នកធ្វើដំណើរតាមជើងហោះហើរមកពីប្រទេសអារ៉ាប៊ីសាអូឌីត និងបានបន្តជើងហោះហើរនៅប្រទេសម៉ាឡេស៊ី។
បើតាមក្រសួងសុខាភិបាល គិតត្រឹមព្រឹកថ្ងៃ១៤ ខែសីហា ឆ្នាំ២០២០នេះ មានមនុស្សចំនួន២៧៣នាក់ហើយដែលត្រូវបានរកឃើញឆ្លងវីរុសកូវីដ-១៩នៅក្នុងប្រទេសកម្ពុជា ក្នុងនោះអ្នកជំងឺ២២៥នាក់ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅក្នុងមន្ទីរពេទ្យរដ្ឋនិងឯកជនចំនួន៤៨នាក់៕
