ក្រុមសហជីពបានធ្វើយុទ្ធនាការទាមទារបើកប្រាក់អតីតភាពការងារនិងស្នើទៅរដ្ឋាភិបាលលុបចោលលិខិតមួយរបស់ក្រសួងការងារ ដែលពួកគេអះអាងថា ធ្វើឱ្យប៉ះពាល់និងបាត់បង់អត្ថប្រយោជន៍ជាច្រើនរបស់កម្មករ។
សហជីពជាង២០បានធ្វើសន្និសីទកាសែតរួមគ្នាមួយនៅរាជធានីភ្នំពេញនាព្រឹកនេះ ដើម្បីទាមទារទៅរដ្ឋាភិបាលឱ្យបើកប្រាក់អតីតភាពការងារជូនកម្មករនិងលុបចោលលិខិតចំនួនពីរចញដោយនាយកដ្ឋានអធិការកិច្ចការងារ។
ក្នុងសេចក្តីជូនដំណឹងកាលពីថ្ងៃទី២ ខែមិថុនា ក្រសួងការងារបានប្រាប់ទៅម្ចាស់រោងចក្រសហគ្រាសនានានិងកម្មករទាំងអស់ថា ការបើកប្រាក់អតីតភាពការងារសម្រាប់កិច្ចសន្យាមុនឆ្នាំ២០១៩និងនៅឆ្នាំ២០២០នេះ ត្រូវបានលើកពេលទៅអនុវត្តនៅឆ្នាំ២០២១វិញ។
កាលពីថ្ងៃទី២៩ ខែមិថុនា ប្រធាននាយកដ្ឋានអធិការកិច្ចការងារ លោក អ៊ុក ចាន់ធូ បានចេញចេញលិខិតមួយដោយធ្វើការបកស្រាយច្បាប់ ពាក់ព័ន្ធនឹងការទូទាត់ប្រាក់សោហ៊ុយជំងឺចិត្តនិងប្រាក់បំណាច់ទូទាត់ជួសការជូនដំណឹងមុន។ ដោយក្នុងលិខិតនោះ លោក អ៊ុក ចាន់ធូ បានអនុញ្ញាតឱ្យថៅកែអាចបញ្ឈប់កម្មករពីការងារភ្លាមៗ ដោយពុំបាច់ផ្តល់ប្រាក់សំណងជំងឺចិត្តនិងប្រាក់ជូនដំណឹងមុនឡើយ។
ក្នុងញត្តិដាក់ទៅក្រសួងការងារ ក្រុមសហជីពបានលើកឡើងថា ការបកស្រាយរបស់លោក អ៊ុក ចាន់ធូ នោះ បានរំលោភលើដែនសមត្ថកិច្ចមុខងាររបស់ខ្លួនយ៉ាងធ្ងន់ធ្ងរ ដោយថា មន្ត្រីរូបនេះគ្មានសិទ្ធិចេញលិខិតនិងបានបកស្រាយច្បាប់ផ្ទុយពីខ្លឹមសារដើមនៃច្បាប់ថែមទៀត។
ញត្តិដដែលនេះបន្ថែមថា សេចក្ដីសម្រេចទាំងពីរនេះបានធ្វើឱ្យប៉ះពាល់និងខាតប្រយោជន៍របស់កម្មករយ៉ាងច្រើន ខណៈក្រុមកម្មកររាប់ម៉ឺននាក់កំពុងបាត់បង់ការងារនិងជួបបញ្ហាក្នុងការចំណាយផ្សេងៗ។
ក្រុមសហជីពបានស្នើទៅរដ្ឋាភិបាលឱ្យលុបចោលលិខិតទាំងនោះនិងបានជំរុញឱ្យបើកប្រាក់អតីតភាពការងារជូនកម្មករឡើងវិញ ប៉ុន្តែរហូតពេលនេះពុំមានការឆ្លើយតបឡើយ។
ក្នុងសន្និសីទសារព័ត៌មាននាព្រឹកនេះ ប្រធានសហភាពចលនាកម្មករ លោក ប៉ាវ ស៊ីណា ថ្លែងថា លិខិតរបស់លោក អ៊ុក ចាន់ធូ បានការពារផលប្រយោជន៍និងផ្តល់ឱកាសឱ្យនិយោជកគេចវេះពីការដោះស្រាយសំណងត្រឹមត្រូវតាមផ្លូវច្បាប់ជូនកម្មករ។
លោក ប៉ាវ ស៊ីណា បន្ថែមថា៖ «អ៊ីចឹងហើយ ខ្ញុំគ្រាន់តែចង់បង្ហាញថា ការចេញប្រកាសនេះ បានធ្វើឱ្យប៉ះពាល់ទៅដល់ផលប្រយោជន៍បងប្អូនកម្មករច្រើនមែនទែន ហើយការបកស្រាយច្បាប់នេះគឺផ្ទុយពីច្បាប់ស្តីពីការងារថ្មី»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃសណ្ឋាគារណាហ្គាវើល កញ្ញា ឈឹម ស៊ីថរ និយាយថា ការបកស្រាយច្បាប់របស់មន្ត្រីក្រសួងការងារ គឺជា«ទង្វើអមនុស្សធម៌»។
កញ្ញាបន្ថែមថា៖ «ហេតុអីបានជាខ្ញុំថាជាទង្វើអមនុស្សធម៌? នៅពេលដែលបងប្អូនកម្មករបាត់បង់ការងារទាំងស្រុងដោយសាររោងចក្របិទទ្វារ ដែលសំណងត្រូវទូទាត់តាមច្បាប់ មិនមែនទូទាត់ក្រៅច្បាប់ដោយសារលិខិតមួយច្បាប់នោះទេ ប៉ុន្តែដោយសារការបកស្រាយច្បាប់លើលិខិតមួយសន្លឹកនោះ បានធ្វើឱ្យបងប្អូនរាប់ម៉ឺននាក់បាត់បង់អត្ថប្រយោជន៍ ហើយត្រូវបាត់បង់បន្ថែមទៀតនៅពេលខាងមុខ»។
ប្រធានសហភាពការងារកម្ពុជា លោក អាត់ ធន់ ប្រាប់ថា ការរីករាលដាលនៃជំងឺកូវីដ១៩មិនមែនចាត់ចូលជាប្រធានសក្តិនោះទេ។ មេសហជីពរូបនេះបញ្ជាក់ថា តាមផ្លូវច្បាប់ ន័យដែលចាត់ចូលជាប្រធានសក្តិ គឺជាគ្រោះមហន្តរាយ មានរញ្ជួយដី ផ្ទុះភ្នំភ្លើង ទឹកជំនន់ ដែលមិនអាចគ្រប់គ្រងឬស្តារស្ថានភាពបាន។
លោក អាត់ ធន់ ប្រាប់ថា៖ «បើតាមខ្ញុំចាំ នៅពេលដែលកើតជំងឺកូវីដភ្លាម គឺអ្នកបញ្ជាទិញជាង១០មិនទទួលយកទំនិញពីកម្ពុជាដោយសារតែនេះជាប្រធានសក្តិ ប៉ុន្តែនៅពេលដែលពួកសហជីពប្តឹងទៅមេធាវីអន្តរជាតិបកស្រាយ គឺអ្នកបញ្ជាទិញទាំងនោះបានលុបចោលថាមិនមែនជាប្រធានសក្តិ ហើយបានចាប់ផ្តើមកុងត្រាយកទំនិញវិញ កុំអីមានបញ្ហាច្រើន។ បើមិនមែនជាប្រធានស័ក្តិ ហេតុអីបានជាកម្មករមិនត្រូវបានគេផ្តល់ឱ្យនូវប្រាក់ជូនដំណឹង»។
ក្នុងលិខិតមួយនៅថ្ងៃនេះ ក្រសួងការងារបានបកស្រាយបំភ្លឺចំពោះការទូទាត់ជួសការឱ្យដំណឹងមុននិងសោហ៊ុយជំងឺចិត្តនៅពេលបញ្ចប់កិច្ចសន្យាការងារដែលប្រើប្រាស់កិច្ចសន្យាមិនកំណត់។
លិខិតដដែលនេះបានលើកឡើងថា នៅពេលនិយោជកបញ្ចប់កិច្ចសន្យាការងារដោយបានជូនដំណឹងមុនត្រឹមត្រូវទៅតាមដំណាក់កាលកំណត់ គឺនិយោជកមិនមានកាតព្វកិច្ចបង់ប្រាក់បំណាច់ទូទាត់ជួសការឱ្យដំណឹងមុននោះទេ ហើយប្រាក់បំណាច់ទូទាត់ជួសការឱ្យដំណឹងមុននេះ ក៏មិនត្រូវបានអនុវត្តដែរក្នុងករណីរោងចក្រត្រូវបានបិទដោយសារថៅកែរត់ចោល។
ក្រសួងការងារបញ្ជាក់ទៀតថា តាមមាត្រា៩១ថ្មីនៃច្បាប់ស្តីពីការងារ គឺក្នុងករណីមានការថយចុះនៃសង្វាក់ផលិតកម្មជាសកលឬដំណើរឈានទៅរកភាពក្ស័យធន ដែលតម្រូវឱ្យរោងចក្របញ្ឈប់សង្វាក់ផលិតកម្មទាំងស្រុងឬផ្នែកខ្លះនោះ ថៅកែមិនចាំបាច់ផ្តល់ប្រាក់សោហ៊ុយជំងឺចិត្តនោះដែរ។
ក្រសួងការងារបានចាត់ទុកស្ថានភាពនៃការរីករាលដាលនៃជំងឺកូវីដ១៩ ដែលបណ្តាលឱ្យរោងចក្រមួយចំនួនជួបការលំបាកដោយសារការលុបចោលការបញ្ជាទិញ ការមិនទូទាត់ប្រាក់តាមកិច្ចសន្យាទិញលក់ទាំងស្រុងដោយម្ចាស់ម៉ាក រហូតរោងចក្រក្ស័យធន និងបិទទ្វារអាជីវកម្មនោះ គឺជាហេតុផលត្រឹមត្រូវមួយចំពោះការរំលាយកិច្ចសន្យាការងារនិងរួចផុតពីការទូទាត់ប្រាក់ជួសការឱ្យដំណឹងមុននិងសោហ៊ុយជំងឺចិត្ត៕
