អាជ្ញាធរខេត្តសៀមរាប បានអនុញ្ញាតឱ្យមានការលក់ដូរ និងការកម្សាន្តនៅទីតាំងផាប់ស្រ្ទីក(Pub Street) ក្បែរផ្សារចាស់ ក្រុងសៀមរាប ឡើងវិញ ប៉ុន្តែការបើកទីតាំងនោះធ្វើឡើងត្រឹមម៉ោង១២យប់ និងត្រូវអនុវត្តវិធានការសុវត្ថិភាព ដើម្បីបង្ការជំងឺកូវីដ១៩។
កាលពីម៉ោងជាង១១យប់ ថ្ងៃចន្ទម្សិលមិញ អាជ្ញាធរខេត្តសៀមរាប បានសម្រេចផ្អាកជាបណ្តោះអាសន្ននូវអាជីវកម្ម និងការកម្សាន្តនៅទីតាំងផាប់ស្ទ្រីក ដោយបារម្ភខ្លាចមានការឆ្លងរាលដាលនៃជំងឺកូវីដ១៩ ខណៈម្ចាស់អាជីវកម្មខ្លះមិនគោរពវិធានសុខាភិបាល ជាពិសេសការរក្សាគម្លាតសុវត្ថិភាព ស្របពេលដែលមានការប្រមូូលផ្តុំប្រជាពលរដ្ឋច្រើននៅទីនោះ។
ពាក់ព័ន្ធនឹងករណីនេះ អាជ្ញាធរខេត្តក៏បានជួបប្រជុំជាមួយម្ចាស់អាជីវកម្មទាំងអស់នៅទីតាំងផាប់ស្ទ្រីក នៅរសៀលថ្ងៃអង្គារនេះ ដើម្បីធ្វើការណែនាំ និងដាក់ចេញនូវវិធានការការពារមួយចំនួន។
អ្នកនាំពាក្យរដ្ឋបាលខេត្តសៀមរាប លោក សុខ ថុល មានប្រសាសន៍នៅរសៀលនេះថា ក្រោយពីបានជួបប្រជុំជាមួយអាជីវកររួច អាជ្ញាធរខេត្តបានសម្រេចឱ្យបើកឡើងវិញនូវទីតាំងកម្សាន្តផាប់ស្ទ្រីក ដើម្បីឱ្យភ្ញៀវទេសចរបានទៅកម្សាន្ត ប៉ុន្តែភ្ជាប់នូវលក្ខខណ្ឌមួយចំនួន ដើម្បីសុវត្ថិភាពពីការឆ្លងជំងឺកូវីដ១៩។
តែយ៉ាងណា លោកថា៖ «រដ្ឋបាលខេត្តបានសម្រេចឱ្យបើកឡើងវិញ ប៉ុន្តែបើកត្រឹមម៉ោង១២យប់ មិនឲ្យបន្តដល់យប់ជ្រៅជាងនេះទេ ហើយយើងបានសុំឱ្យអាជីវករទាំងអស់ ត្រូវអនុវត្តតាមការណែនាំរបស់ក្រសួងសុខាភិបាល និងក្រសួងទេសចរណ៍ ដោយរក្សាគម្លាតសុវត្ថិភាព ដូច្នេះក្នុងករណីភោជនីយ៍ដ្ឋានណាមួយមិនអនុវត្តតាមការណែនាំនោះ កម្លាំងសមត្ថកិច្ចនឹងចុះផ្អាកអាជីវកម្មតែម្តង»។
ជាមួយគ្នានេះដែរ លោក សុខ ថុល បានបញ្ជាក់ថា អាជ្ញាធរខេត្ត ក៏បានដាក់កម្លាំងនៅតាមច្រកចេញចូលចំនួន៤ផងដែរ ដោយតម្រូវឱ្យភ្ញៀវទេសចរ និងប្រជាពលរដ្ឋដែលចូលទៅកម្សាន្តនៅផាប់ស្ទ្រីក ត្រូវតែពាក់ម៉ាស់ និងមានការត្រួតពិនិត្យកម្តៅ និងផ្តល់អាកុលលាងដៃ។
លោកថា៖«កម្លាំងសមត្ថកិច្ចយើង នឹងរៀបចំសម្រួលចរាចរណ៍ផ្លូវចេញចូល ហើយប្រជាពលរដ្ឋដែលចូលកម្សាន្តទីនោះ ដាច់ខាតត្រូវតែពាក់ម៉ាស់ ទើបសមត្ថកិច្ចឱ្យចូល ហើយយើងក៏មានដាក់ឧបរណ៍វាស់កម្តៅ និងបាញ់អាល់កុលផងដែរ»។
បើតាមអ្នកនាំពាក្យរូបនេះ សមត្ថកិច្ចខេត្តប្រមាណជាង ១០០នាក់ នឹងត្រូវដាក់ពង្រាយនៅតំបន់ផាប់ស្ទ្រីក ដើម្បីសម្រួលចរាចរណ៍ ណែនាំពីវិធានសុខាភិបាល និងការពារសន្តិសុខសុវត្ថិភាពជូនភ្ញៀវទេសចរ។
របាយការណ៍របស់ក្រសួងទេសចរណ៍ដែលបានផ្សព្វផ្សាយលើហ្វេសប៊ុក នៅថ្ងៃនេះ បានឱ្យដឹងថា នៅថ្ងៃដំបូងនៃថ្ងៃសម្រាកសងបុណ្យចូលឆ្នាំខ្មែរ ថ្ងៃទី១៧ ខែសីហា ឆ្នាំ២០២០នេះ មានភ្ញៀវទេសចរ និងប្រជាពលរដ្ឋដើរកម្សាន្តនៅទូទាំងប្រទេសចំនួន ២៣៣ ៣២៩នាក់ ក្នុងនោះ នៅខេត្តសៀមរាប មានចំនួន ២៨ ១៤០នាក់។
ក្រសួងបន្តថា តាមការសង្កេតជាក់ស្តែង ប្រជាពលរដ្ឋមានការយល់ដឹងច្រើនពីការអនុវត្តតាមការណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍អំពីជំងឺកូវីដ១៩ ប៉ុន្តែ នៅមិនទាន់អនុវត្តបានពេញលេញនៅឡើយសម្រាប់ការរក្សាគម្លាតសុវត្ថិភាព។
ករណីនេះ ក្រសួងបានណែនាំដល់អ្នកគ្រប់គ្រងគោលដៅទេសចរណ៍ និងមន្ត្រីជំនាញ បន្តខិតខំណែនាំបន្ថែម ដើម្បីបង្វែរទស្សនកិច្ចរបស់ភ្ញៀវទេសចរ និងសម្រួលកុំឲ្យមានការផ្ទុកមនុស្សលើសពី ៥០%៕
