ក្រសួងសុខាភិបាល បានលើកឡើងថា ជនជាតិវៀតណាមពីរនាក់ បានលួចចេញពីការធ្វើចត្តាឡីស័កនៅក្នុងមន្ទីរពេទ្យបង្អែកព្រះស្តេច ខេត្តព្រៃវែង ទៅកាន់ខេត្តកំពង់ឆ្នាំង ប៉ុន្តែក្រសួងបានរកឃើញវិញ និងតម្រូវឱ្យពួកគេធ្វើចត្តាឡីស័កឡើងវិញ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានប្រាប់ក្រុមអ្នកសារព័ត៌មានតាមតេឡេក្រាម កាលពីយប់ថ្ងៃអង្គារម្សិលមិញថា ជនជាតិវៀតណាមទាំងពីរនាក់នោះ មានស្ត្រី អាយុ ៣៧ឆ្នាំ និងកុមារ អាយុ ១៣ឆ្នាំ ជាអ្នករស់នៅភូមិប្រាសាទ ឃុំសែប ស្រុកកំពង់ត្រឡាច ខេត្តកំពង់ឆ្នាំ។
លោកស្រីបន្តថា ជនជាតិវៀតណាមទាំងពីរនាក់ ដែលត្រូវជាម្តាយនិងកូន បានលួចចេញពីមន្ទីរពេទ្យបង្អែកព្រះស្តេច ខេត្តព្រៃវែង ដែលជាកន្លែងធ្វើចត្តាឡីស័ក កាលពីមុនម៉ោង៥កន្លះព្រឹក ថ្ងៃទី១៦ ខែសីហា ដោយបានឡើងឡានក្រុងមករាជាធានីភ្នំពេញ រួចបន្តដំណើរដោយរថយន្តឈ្នួល ទៅកាន់ខេត្តកំពង់ឆ្នាំង រួចបន្តទៅកាន់ភូមិប្រាសាទដែលជាទីកន្លែងពួកគេរស់នៅដោយម៉ូតូ។
លោកស្រី ឱ វណ្ឌឌីន បានបញ្ជាក់ថា៖«លទ្ធផលតេស្តលេីកទី១ របស់គាត់ និងកូនគាត់[ជនជាតិវៀតណាមទាំងពីរនាក់] នៅថ្ងៃទី១៧ ខែសីហា ឆ្នាំ២០២០ គឺអវិជ្ជមានវីរុសកូវីដ-១៩ ទាំងពីរនាក់ តែក្រុមគ្រូពេទ្យនៃមន្ទីរសុខាភិបាលខេត្តកំពង់ឆ្នាំង កំពុងបន្តតាមដានសុខភាពគាត់ និងកូនគាត់ដោយយកចិត្តទុកដាក់បំផុត»។
អ្នកនាំពាក្យរូបនេះ បានឱ្យដឹងដែរថា នៅផ្ទះរបស់គាត់ក្នុងខេត្តកំពង់ឆ្នាំង ពួកគេពុំបានជួបជាមួយបងប្អូនទេ ដោយពួកគេត្រូវបានរថយន្តមន្ទីរពេទ្យបង្អែកកំពង់ត្រឡាច ដឹកទៅកាន់មណ្ឌលចត្តាឡីស័កកំរិត២សាលាគំរូក្រុងនៅម៉ោង៥កន្លះល្ងាចថ្ងៃទី១៦ ខែសីហា។
អ្នកស្រីបន្ថែមថា៖«ក្រុមការងារបានពិនិត្យកំដៅពួកគេ ឃេីញធម្មតា គ្មានសញ្ញាក្អក ឈឺ ក ឫ ហត់ ដែលគួរឲ្យចាប់អារម្មហ៌នោះឡេីយ។ ក្រុមការងារនៃមន្ទីរសុខាភិបាលខេត្តកំពង់ឆ្នាំង ក៏បានអប់រំ និងណែនាំពន្យល់ស្ត្រីរូបនេះ ក្នុងការអនុវត្តធ្វើចត្តាឡិស័កឲ្យគ្រប់ចំនួន ១៤ថ្ងៃ ដោយរាប់សារឡេីងវិញ និងដោយមានការសន្យាថាមិនរត់ទៀតទេ។ ក្រុមការងារ និងបន្តការអនុវត្តច្បាប់ដែលមានជាធរមានចំពោះបុគ្គលដែលមិនគោរពតាមវិធានការចត្តាឡីស័កនេះ»។
បើតាមអ្នកនាំពាក្យរូបនេះ ពួកគេបានចាកចេញពីកម្ពុជា មុនពេលចូលឆ្នាំខ្មែរ ទៅរស់នៅទល់ដែនកម្ពុជា-វៀតណាម ឌិញបា ហើយដោយសារមិនអាចរកស៊ីនៅទីនោះបាន ពួកគេក៏បានត្រឡប់មកកម្ពុជាវិញ នៅថ្ងៃទី១៥ ខែសីហា ឆ្នាំ២០២០ និងត្រូវបានក្រុមការងារមាត់ច្រកព្រំដែនអន្តរជាតិបន្ទាយចក្រី បញ្ជូនទៅធ្វើចត្តាឡីស័កនៅក្នុងមន្ទីរពេទ្យបង្អែកព្រះស្តេច ខេត្តព្រៃវែង។
កាលពីថ្ងៃទី៣ ខែសីហា មានបុរសខ្មែរពីរនាក់ដែលបន្តជើងហោះហើរមកពីប្រទេសម៉ាឡេស៊ី បានរត់ចេញពីមណ្ឌលចត្តាឡីស័កនៅវិទ្យាល័យ ហ៊ុន សែន កំពង់លាវ ខេត្តព្រៃវែង ប៉ុន្តែត្រូវបានអាជ្ញាធរខេត្តរកឃើញនៅផ្ទះរបស់ពួកគេនៅយប់ថ្ងៃដដែលនោះ។ ទោះយ៉ាងណា ពួកគេពុំត្រូវបានពិន័យជាប្រាក់នោះទេ ដោយសារជីវភាពក្រីក្រ ប៉ុន្តែក្រុមការងារក្រសួងបានតម្រូវឱ្យពួកគេធ្វើចត្តាឡីស័កឡើងវិញ១៤ថ្ងៃ។
ដោយឡែក កាលពីថ្ងៃទី១៧ ខែកក្កដា ក៏មានស្ត្រីខ្មែរសញ្ជាតិអាមេរិកម្នាក់ទៀត ធ្លាប់បានរត់ចេញពីមណ្ឌលចត្តាឡីស័កនៅសណ្ឋាគារមួយក្នុងរាជធានីភ្នំពេញនិងត្រូវបានមន្ត្រីសុខាភិបាលរកឃើញវិញនៅខេត្តកំពង់ចាម ហើយស្ត្រីរូបនោះត្រូវបានមន្ត្រីសុខាភិបាលខេត្តសម្រេចផាកពិន័យអន្តរការណ៍ចំនួន១លានរៀល៕
