លោកនាយករដ្ឋមន្ត្រី ហ៊ុន សែន ប្រាប់មេដឹកនាំចិនថា ការស្រុះស្រួលគ្នារកដំណោះស្រាយទឹកទន្លេមេគង្គ ដែលលោកហៅថា «ទឹកឆ្លងដែន» គឺជាជោគជ័យដ៏សំខាន់បំផុតមួយទៀតនៃកិច្ចសហប្រតិបត្តិការមេគង្គ-ឡានឆាង។
វេទិកាមេគង្គ-ឡានឆាង គឺជាជំនួបកំពូលនៃមេដឹកនាំបណ្ដាប្រទេសចំនួន៦ ស្ថិតនៅក្នុងតំបន់ទន្លេមេគង្គ ដូចជា មីយ៉ាន់ម៉ា ថៃ ឡាវ វៀតណាម កម្ពុជា និងប្រទេសចិន។
ការថ្លែងរបស់លោក ហ៊ុន សែន ធ្វើឡើងក្នុងកិច្ចប្រជុំកំពូលមេគង្គ-ឡានឆាងលើកទី៣ ក្រោមមូលបទ«ពង្រឹងភាពជាដៃគូ ដើម្បីវិបុលភាពរួម» ដែលធ្វើឡើងតាមប្រព័ន្ធវីដេអូ មានការអញ្ជើញចូលរួមពីនាយករដ្ឋមន្ត្រីចិន លោក លី ឃឹឈាំង (Li Keqiang) ផងដែរ។
លោក ហ៊ុន សែន ថ្លែងថា៖ «ការស្រុះស្រួលមតិរួមគ្នាក្នុងការរកដំណោះស្រាយពាក់ព័ន្ធនឹងប្រធានបទរសើបបំផុតនៃការគ្រប់គ្រងទឹកឆ្លងដែន គឺជាជោគជ័យដ៏សំខាន់បំផុតមួយទៀតនៃកិច្ចសហប្រតិបត្តិការរបស់យើង»។
មេដឹកនាំកម្ពុជា រំឭកថា កិច្ចប្រជុំថ្នាក់រដ្ឋមន្ត្រីលើកទី១ ស្តីពីកិច្ចសហប្រតិបត្តិការធនធានទឹកឡានឆាង-មេគង្គ នៅប្រទេសចិន កាលពីខែធ្នូឆ្នាំមុន បានផ្តល់ទិសដៅច្បាស់លាស់សម្រាប់ការពង្រឹងនិងពង្រីកកិច្ចសហប្រតិបត្តិការពាក់ព័ន្ធទៅនឹងការចែករំលែកទិន្នន័យនិងព័ត៌មានជលសាស្ត្រ។
មេដឹកនាំរូបនេះ អះអាងទៀតថា លទ្ធផលជាក់ស្តែងនៃកិច្ចប្រជុំនោះ បានបន្តរួមចំណែកដល់ការលើកកម្ពស់ការយោគយល់ទៅវិញទៅមក ក្នុងការគ្រប់គ្រងធនធានទឹកក្នុងតំបន់។
ទោះជាយ៉ាងណា ការថ្លែងរបស់លោកនាយករដ្ឋមន្ត្រី ហ៊ុន សែន មិនបានបញ្ជាក់ថា ការគ្រប់គ្រងទឹកឆ្លងដែនរបស់ភាគីចិន វាបានបង្កផលប៉ះពាល់អ្វីខ្លះដល់ប្រទេសកម្ពុជាទេ។
តាមរយៈអ្នកបកប្រែក្នុងកិច្ចប្រជុំកំពូលមេគង្គ-ឡានឆាងនោះ នាយករដ្ឋមន្ត្រីចិន លោក លី ឃឹជាំង បង្ហាញការប្តេជ្ញាចិត្តថា ចិននឹងខិតខំប្រឹងប្រែងបន្ថែមទៀត ដើម្បីឱ្យវិស័យធនធានទឹកក្លាយជាយន្តការស្នូលសម្រាប់ពង្រឹងកិច្ចសហប្រតិបត្តិការជាមួយប្រទេសជាសមាជិកនៅអាងទន្លេមេគង្គក្រោម រួមទាំងការផ្តល់ព័ត៌មានទាក់ទងនឹងជលសាស្ត្រផងដែរ។
លោក លី ថ្លែងថា៖ «ចិននឹងខិតខំបន្ថែមទៀតក្នុងការបញ្ចេញទឹកក្នុងរដូវប្រាំងដល់អ្នកនៅខាងក្រោមទន្លេមេគង្គ ដើម្បីដោះស្រាយបញ្ហារាំងស្ងួត។ កិច្ចសហការក្នុងវិស័យធនធានទឹកនេះជាស្នូលនៃកិច្ចសហប្រតិបត្តិការនៃយន្តការនេះ»។
ប៉ុន្តែបើតាមរបាយការណ៍ប្រចាំឆ្នាំរបស់ខ្លួនចេញដោយគណៈកម្មាធិការជាតិទន្លេមេគង្គកម្ពុជាកាលពីខែមករាដើមឆ្នាំនេះ គណៈកម្មការទន្លេមេគង្គ (MRC) លើកឡើងពីកង្វល់ជុំវិញការអភិវឌ្ឍធនធានទឹកនៃទន្លេមេគង្គ ដែលបានបង្កឱ្យមានផលប៉ះពាល់ជាអវិជ្ជមានមកលើបរិស្ថាននិងសង្គម «ជាពិសេសផលប៉ះពាល់ឆ្លងដែន ដែលត្រូវគិតគូរដោះស្រាយឱ្យបានគ្រប់ជ្រុងជ្រោយ»។
របាយការណ៍នោះ និយាយថា ស្ថាប័នអន្តររដ្ឋាភិបាល MRC បានទទួលស្គាល់ថា វារីអគ្គិសនី គឺជាបញ្ហាប្រឈមមួយនៅក្នុងចំណោមបញ្ហាប្រឈមដទៃទៀត ដូចជា បម្រែបម្រួលអាកាសធាតុ គ្រោះមហន្តរាយធម្មជាតិ កំណើនប្រជាជន និងសកម្មភាពដទៃទៀត។
មន្ត្រីសម្របសម្រួលបណ្ដាញសម្ព័ន្ធទន្លេកម្ពុជានៃវេទិកាអង្គការមិនមែនរដ្ឋាភិបាល (NGO-Forum) លោក ម៉ក់ ប៊ុនធឿន បានបង្ហាញក្ដីបារម្ភថា ផលប៉ះពាល់មកលើសង្គមនិងប្រព័ន្ធអេកូឡូស៊ីតាមអាងទន្លេមេគង្គ នឹងកាន់តែរីកធំឡើងថែមទៀតនាពេលអនាគត នៅពេលណាគម្រោងសាងសង់ទំនប់វារីអគ្គិសនីកាន់តែច្រើន ត្រូវបានសាងសង់រួចរាល់និងដាក់ឱ្យដំណើរការទាំងនៅផ្នែកខាងលើនិងផ្នែកខាងក្រោមនៃអាងទន្លេមេគង្គ។
មន្ត្រីសង្គមស៊ីវិលរូបនេះបានលើកឡើងបែបនេះ បន្ទាប់ពីមើលឃើញថា កម្ពស់ទឹកទន្លេមេគង្គបានធ្លាក់ចុះពីកម្រិតមធ្យម៨.៥ម៉ែត្រនៅក្នុងខែសីហា ឆ្នាំ២០១៨ មកនៅត្រឹមកម្ពស់មធ្យម៥ម៉ែត្រប៉ុណ្ណោះរយៈពេល២ឆ្នាំចុងក្រោយនេះ ដែលលោកថា មួយផ្នែកបណ្ដាលមកពីទំនប់វារីអគ្គិសនីស្ថិតនៅក្នុងប្រទេសចិននិងប្រទេសឡាវ។
មន្ត្រីសង្គមស៊ីវិលរូបនេះនិយាយទៀតថា កម្រិតទឹកទន្លេថយចុះនេះបង្កផលប៉ះពាល់ដល់សន្តិសុខស្បៀងនៃពលរដ្ឋប្រមាណជាង៦០លាននាក់ដែលរស់នៅតាមដងទន្លេមេគង្គ ដោយសារផលប៉ះពាល់ទៅលើរបរនេសាទនិងកសិកម្ម។
លោក ម៉ក់ ប៊ុនធឿន ប្រាប់ថា៖ «បើសិនជាទន្លេមេគង្គត្រូវបានសាងសង់ទំបន់គ្រប់កន្លែង រួមទាំងនៅក្នុងប្រទេសកម្ពុជាផង ផលប៉ះពាល់ទៅលើត្រី ផលប៉ះពាល់ទៅលើលំហូរទឹក ផលប៉ះពាល់ទៅលើដីល្បាប់ គឺមានទំហំធំធេង ដែលទាមទារឱ្យប្រទេសនៅតាមដងទន្លេមេគង្គត្រូវធ្វើការពិចារណាឱ្យបានម៉ត់ចត់ មុននឹងដាក់ឱ្យមានគម្រោងសាងសង់វារីអគ្គិសនីនៅតាមទន្លេមេគង្គហ្នឹងឯង»។
យ៉ាងនេះក្តី នាយករដ្ឋមន្ត្រីកម្ពុជា និយាយទៀតថា ក្នុងស្ថានភាពបច្ចុប្បន្ន ដែលកំណើនសេដ្ឋកិច្ចសកលមានការធ្លាក់ចុះ វាចាំបាច់ត្រូវខិតខំពន្លឿនការរៀបចំនិងសម្រេចឱ្យបាននូវខ្សែក្រវាត់អភិវឌ្ឍន៍សេដ្ឋកិច្ចមេគង្គ-ឡានឆាង ដែលនឹងក្លាយជាក្បាលម៉ាស៊ីនថ្មីនៃកំណើនសម្រាប់អនុតំបន់។
បើតាមសហប្រធាននៃកិច្ចប្រជុំមេគង្គ-ឡានឆាង កិច្ចសហប្រតិបត្តិការមេគង្គ-ឡានឆាងជាក្របខ័ណ្ឌមួយដែលបង្កើតឡើងនៅឆ្នាំ២០១៥។
ក្របខ័ណ្ឌនេះ មានគោលបំណងលើកកម្ពស់និងជំរុញកំណើនសេដ្ឋកិច្ច ឈរលើមូលដ្ឋានកិច្ចសហប្រតិបត្តិការ រក្សាសន្តិភាព សាមគ្គីភាព ស្ថិរភាព ឆ្ពោះទៅរកវិបុលភាពរួមក្នុងតំបន់មេគង្គ៕
