អាជ្ញាធរកូរ៉េខាងត្បូង បានតម្រូវឱ្យមនុស្សម្នាពាក់ម៉ាស់ទាំងនៅក្នុងផ្ទះនិងនៅពេលធ្វើដំណើរចេញទៅក្រៅផ្ទះ ដែលនេះគឺជាបទបញ្ជាកើតមានឡើងជាលើកដំបូងនៅទីក្រុងសេអ៊ូល ខណៈដែលប្រទេសមួយនេះកំពុងប្រឈមមុខនឹងកំណើននៃការឆ្លងរីករាលដាលនៃវីរុសកូរ៉ូណានៅតំបន់សម្បូរមនុស្សម្នា។
ទីភ្នាក់ងារព័ត៌មានរ៉យទ័រ បានរាយការណ៍ថា រដ្ឋាភិបាលក្រុងសេអ៊ូលកាលពីខែឧសភាកន្លងមកនេះ បានបញ្ជាឱ្យមនុស្សម្នាពាក់ម៉ាស់នៅពេលធ្វើដំណើរតាមយានជំនិះសាធារណៈនិងរថយន្តតាក់ស៊ី ប៉ុន្តែកំណើនករណីឆ្លងវីរុសកូរ៉ូណានាពេលចុងក្រោយនេះ បានជំរុញឱ្យមន្ត្រីសុខាភិបាលមានក្ដីបារម្ភថា ប្រទេសនេះអាចត្រូវដាក់កំហិតខ្ពស់បំផុតលើវិធានការរក្សាគម្លាតសុវត្ថិភាព។
មន្ត្រីក្រសួងសុខាភិបាល លោក យ៉ុន តេហូ ថ្លែងក្នុងសន្និសីទសារព័ត៌មានមួយថា ប្រសិនបើអាជ្ញាធរបរាជ័យក្នុងការកាត់បន្ថយកំណើននៃការឆ្លងរីករាលដាលនៅសប្ដាហ៍នេះ នោះកូរ៉េខាងត្បូងនឹងប្រឈមមុខនឹងវិបត្តិកាន់តែធ្ងន់ធ្ងរ ដែលមានន័យថា វីរុសនឹងរីករាលដាលទូទាំងប្រទេស។
មជ្ឈមណ្ឌលបង្ការ និងគ្រប់គ្រងជំងឺឆ្លងរបស់កូរ៉េ បានរាយការណ៍ចំនួនអ្នកឆ្លងវីរុសកូរ៉ូណា២៦៦ករណីថ្មីទៀតនៅត្រឹមយប់ថ្ងៃអាទិត្យម្សិលមិញនេះ ពោលគឺបានធ្លាក់ចុះពីចំនួន៣៩៧ករណីដែលត្រូវបានរាយការណ៍កាលពីថ្ងៃសៅរ៍កន្លងមកនេះ ប៉ុន្តែតួលេខនេះបង្ហាញពីការកើនឡើងនៃចំនួនឆ្លងដល់ទៅ៣ដងនៅក្នុងរយៈពេលជាង១សប្ដាហ៍កន្លងមក ពោលគឺបានកើនឡើងពីលេខ២ខ្ទង់ទៅ៣ខ្ទង់។
សរុបមក កូរ៉េខាងត្បូងបានរាយការណ៍ពីការឆ្លងវីរុសកូរ៉ូណា១៧,៦៦៥ករណីហើយ ហើយមានមនុស្សដល់ទៅ៣០៩នាក់បានស្លាប់ក្រោយពីឆ្លងវីរុសនេះ។
កូរ៉េខាងត្បូង ត្រូវបានគេកោតសរសើរយ៉ាងទូលំទូលាយចំពោះជោគជ័យក្នុងការដោះស្រាយការឆ្លងរីករាលដាលនៃវីរុសនេះតាមរយៈការធ្វើតេស្តនិងការតាមដានលើអ្នកឆ្លង ប៉ុន្តែលោក យ៉ុន និយាយថា ក្រុមមន្ត្រីអង្កេតរបស់ក្រសួងសុខាភិបាលពុំអាចរកឃើញប្រភពនៃការឆ្លងប្រហែល២០ភាគរយនៃករណីសរុប ដែលនាំឱ្យមានក្ដីបារម្ភជុំវិញអ្វីដែលគេហៅថា «ការរីករាលដាលដោយស្ងាត់ស្ងៀម»។
លោក យ៉ុន ក៏បានអំពាវនាវទៅមនុស្សម្នាកុំឱ្យចាកចេញពីផ្ទះសម្បែងនិងលុបចោលដំណើរទៅក្រៅមិនចាំបាច់នានាផងដែរ។
រដ្ឋបាលទីក្រុងសេអ៊ូល បានប្រកាសកាលពីថ្ងៃម្សិលមិញថា មនុស្សម្នានឹងតម្រូវឱ្យពាក់ម៉ាស់ទាំងនៅក្នុងផ្ទះនិងនៅតាមទីសាធារណៈនានាដែលមានមនុស្សម្នាកុះករ។
រដ្ឋាភិបាលកូរ៉េក៏បានពង្រីកវិធានការរក្សាគម្លាតសង្គមបែបនេះទៅដល់កន្លែងផ្សេងទៀតនៅក្នុងប្រទេសផងដែរ ដោយហាមឃាត់ការជួបជុំនៅតាមព្រះវិហារនិងដាក់បញ្ជាឱ្យបិទក្លិបកម្សាន្ត ហាងអាហារប៊ូហ្វេ និងហាងកាហ្វេអ៊ិនធឺណិតផងដែរ៕
