ក្រសួងមហាផ្ទៃ គ្រោងពិនិត្យខ្លឹមសារនៃមាត្រាចំនួន១៤ នៃច្បាប់ស្តីពី «សមាគម និងអង្គការមិនមែនរដ្ឋាភិបាល» ដែលស្នើសុំវិសោធនកម្មដោយតំណាងអង្គការសង្គមស៊ីវិល នៅថ្ងៃសុក្រចុងសប្តាហ៍។
ក្នុងសេចក្តីប្រកាសព័ត៌មានរបស់ក្រសួងមហាផ្ទៃ ចុះផ្សាយកាលពីថ្ងៃ២៥ ខែសីហា បានឱ្យដឹងថា ក្រសួងនឹងរៀបចំកិច្ចប្រជុំក្រុមការងាររបស់រដ្ឋាភិបាល ដើម្បីសម្របសម្រួលដោះស្រាយសំណើនិងសំណូមពររបស់អង្គការសង្គមស៊ីវិល ដើម្បីពិនិត្យខ្លឹមសារនៃមាត្រាចំនួន១៤ នៃច្បាប់ស្តីពី «សមាគម និងអង្គការមិនមែនរដ្ឋាភិបាល» ដែលស្នើសុំវិសោធនកម្មដោយតំណាងអង្គការសង្គមស៊ីវិល នៅទីស្តីការក្រសួងមហាផ្ទៃ។
មាត្រាទាំង១៤ដែលសង្គមស៊ីវិលបានស្នើសុំធ្វើវិសោធនកម្មច្បាប់នោះ រួមមាន មាត្រា១, ៧, ៨, ៩, ១០, ១១, ២០, ២៤, ២៥, ២៦, ៣០, ៣១, ៣២ និងមាត្រា៣៥ ។ ដោយឡែក មាត្រាចំនួន៣ផ្សេងទៀត រួមមាន មាត្រា៣ មាត្រា៤ និងមាត្រា២៧ តំណាងអង្គការសង្គមស៊ីវិលស្នើសុំរក្សាទុកនូវខ្លឹមសារដើមដដែល។
រដ្ឋលេខាធិការក្រសួងមហាផ្ទៃ និងជាអ្នកដឹកនាំសម្របសម្រួលកិច្ចប្រជុំនេះ លោក ប៊ុន ហុន មានប្រសាសន៍បន្ថែមលើសេចក្តីជូនដំណឹងថា ក្រុមការងាររបស់រដ្ឋាភិបាលនឹងប្រជុំជាមួយក្រុមការងារបច្ចេកទេសរបស់ខ្លួន ដើម្បីពិនិត្យលើសំណើសុំវិសោធនកម្មដោយតំណាងអង្គការសង្គមស៊ីវិល ឱ្យស្របតាមរដ្ឋធម្មនុញ្ញនិងស្តង់ដារច្បាប់អន្តរជាតិ។
លោកបានថ្លែងថា៖ «មានក្រុមការងារបច្ចេកទេស អ្នកជំនាញរបស់រដ្ឋាភិបាល គាត់ចូលពិនិត្យ រៀបចំខ្លឹមសារឱ្យគ្រប់ទៅតាមស្តង់ដារអន្តរជាតិ ជាពិសេសធានាបានសេរីភាពដែលរដ្ឋធម្មនុញ្ញយើងទទួលស្គាល់»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង បង្ហាញការសាទរចំពោះការរៀបចំប្រជុំក្រុមការងាររដ្ឋាភិបាលដឹកនាំដោយក្រសួងមហាផ្ទៃនេះ ដើម្បីសម្របសម្រួលដោះស្រាយសំណើនិងសំណូមពររបស់សង្គមស៊ីវិល។ លោកសង្ឃឹមថា ក្រសួងនឹងធ្វើវិសោធនកម្មមាត្រាទាំងនោះ ដើម្បីកុំឱ្យប៉ះពាល់ដល់សេរីភាពបញ្ចេញមតិនិងស្របតាមគោលការណ៍ប្រជាធិបតេយ្យ។
លោកមានប្រសាសន៍ថា៖ «ពាក់ព័ន្ធនឹងមាត្រាទាំងអស់ហ្នឹង គួរតែមានការធ្វើការកែលម្អ បានអាចជួយលើកកម្ពស់ការអនុវត្តសិទ្ធិសេរីភាពដែលបានចែងនៅក្នុងគោលបំណងនៃច្បាប់[សមាគម និងអង្គការមិនមែនរដ្ឋាភិបាល]»។
លោក ស៊ឹង សែនករុណា មានប្រសាសន៍ថា បើសិនក្រសួងមហាផ្ទៃមិនធ្វើតាមការស្នើសុំកែសម្រួលមាត្រាទាំង១៤នៃច្បាប់នេះទេ នឹងធ្វើឱ្យសេរីភាពបញ្ចេញមតិនិងលទ្ធិប្រជាធិបតេយ្យដើរថយក្រោយ។
លោកបន្តថា៖ «គេបង្កើតច្បាប់ដើម្បីទ្រទ្រង់ ដើម្បីលើកតម្លៃទៅលើសិទ្ធិសេរីភាពរបស់ប្រជាពលរដ្ឋដែលរស់នៅក្នុងសង្គមប្រជាធិបតេយ្យ ប៉ុន្តែច្បាប់នេះបង្កើតឡើងមកក្នុងន័យរឹតត្បិតសិទ្ធិសេរីភាពរបស់ប្រជាពលរដ្ឋ ក៏ដូចជាអង្គការសង្គមស៊ីវិល ដែលធ្វើកិច្ចការងារក្នុងន័យរួមចំណែកដែលជាដៃគូរដ្ឋាភិបាល អញ្ចឹងប្រទេសបែបហ្នឹងគឺជាប្រទេសដែលមិនមែនប្រជាធិបតេយ្យទេ»។
អ្នកស្រាវជ្រាវពីការអភិវឌ្ឍសង្គម លោក មាស នី មានប្រសាសន៍ថា នេះជាសញ្ញាល្អបើក្រសួងព្រមកែខ្លឹមសារនៃច្បាប់នេះមែន ធ្វើឱ្យម្ចាស់ជំនួយ សហគមន៍ជាតិ និងអន្តរជាតិ ជឿជាក់លើការដឹកនាំរបស់រដ្ឋាភិបាល ដើម្បីឈានទៅរកលទ្ធិប្រជាធិបតេយ្យមួយពិតប្រាកដ។
លោកនិយាយថា៖ «វាអាចបង្ហាញនូវមតិជាតិនិងអន្តរជាតិ ជាពិសេសម្ចាស់ជំនួយផងដែរថា កម្ពុជាពិតជាមានយន្តការដែលបើកឱ្យមានលំហសិទ្ធិសេរីភាពនៅក្នុងការបង្កើតសមាគមឬអង្គការនានា»។
ច្បាប់ស្តីពី «សមាគម និងអង្គការមិនមែនរដ្ឋាភិបាល» មាន៩ជំពូកនិង៣៩មាត្រា ហើយត្រូវបានប្រកាសឱ្យប្រើប្រាស់នៅថ្ងៃទី១២ ខែសីហា ឆ្នាំ២០១៥។
កាលពីថ្ងៃម្សិលមិញ អង្គការសមាគមប្រមាណជិត១០០ស្ថាប័ន ក៏បានចេញសេចក្តីថ្លែងការណ៍រួម ដោយបានស្នើយ៉ាងទទូចដល់ក្រសួងមហាផ្ទៃ ពន្លឿនការតាក់តែងសេចក្តីព្រាងច្បាប់និងធ្វើវិសោធនកម្មច្បាប់ឱ្យបានឆាប់បំផុត ផ្តល់ឱកាសដល់ពួកគេបានសិក្សាបន្ថែម និងបន្តសហការជជែកលើខ្លឹមសារជាក់ស្តែងក្នុងសេចក្តីព្រាងច្បាប់នេះ រហូតដល់សេចក្តីព្រាងច្បាប់វិសោធនកម្មទាំងមូលត្រូវបានអនុម័តដោយស្ថាប័ននីតិបញ្ញត្តិ៕
