ក្រសួងសុខាភិបាលបានឱ្យដឹងថា មានករណីជាសះស្បើយពីជំងឺកូវីដ១៩ចំនួន១នាក់និងមិនមានករណីឆ្លងថ្មី ដែលធ្វើឱ្យចំនួនអ្នកមានជំងឺកូវីដ១៩សរុបនៅកម្ពុជានៅដដែល គឺមានចំនួន២៧៣នាក់។
សេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃពុធនេះ បានលើកឡើងថា ករណីជាសះស្បើយពីជំងឺកូវីដ១៩ ជាបុរសជនជាតិខ្មែរ អាយុ២៧ឆ្នាំ មានទីលំនៅនៅភូមិត្នោត ឃុំពង្រ ស្រុកឆ្លូង ខេត្តក្រចេះ បានធ្វើដំណើរមកពីប្រទេសអារ៉ាប់ ដោយឆ្លងកាត់ប្រទេសម៉ាឡេស៊ី តាមជើងហោះហើរ។
សេចក្តីប្រកាសព័ត៌មានដដែលបន្តថា គិតត្រឹមព្រឹកថ្ងៃទី២៦ ខែសីហា ឆ្នាំ២០២០នេះ មានមនុស្សចំនួន២៧៣នាក់ហើយដែលត្រូវបានរកឃើញឆ្លងវីរុសកូវីដ-១៩នៅក្នុងប្រទេសកម្ពុជា ក្នុងនោះអ្នកជំងឺ២៦៤នាក់ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ ចំនួន៩នាក់ ជាបុរស៕
