មេដឹកនាំថៃ លោក ប្រាយុទ្ធ នៅថ្ងៃម្សិលមិញ បានចេញសេចក្តីថ្លែងការណ៍មួយប្រាប់ទៅក្រុមអ្នកតវ៉ាដែលទាមទារឱ្យលោកចុះចេញពីតំណែង ដោយលើកឡើងក្តីបារម្ភថា ពួកគេកំពុងបង្កើតការបែងចែកកាន់តែជ្រាលជ្រៅក្នុងសង្គមថៃ ដែលអាចបង្កឱ្យដួលរលំឬបែកបាក់ជាតិធ្ងន់ធ្ងរ។
ក្នុងសម្រង់សម្តីពីសារព័ត៌មាន Reuters នាយករដ្ឋមន្រ្តីថៃ លោក ប្រាយុទ្ធ ចាន់អូចារ ថ្លែងថា ប្រសិនក្រុមបាតុករបន្តធ្វើការតវ៉ាតទៅមុខទៀត នោះជាតិនឹងដួលរលំ ហើយថា បើរឿងនោះកើតឡើងមែន គ្រប់គ្នានឹងឋិតក្នុងទឹកដីមួយដែលហ៊ុមព័ទ្ធដោយភ្លើងកំហឹង។
តាមប្រភពដដែល មេដឹកនាំរដ្ឋប្រហារយោធាឆ្នាំ២០១៤ បន្ថែមថា លោកបារម្ភជាខ្លាំងចំពោះបញ្ហាកំពុងកើតឡើង ដែលមិនដឹងពេលណានឹងអាចបញ្ចប់។ ការព្រមាននេះ ធ្វើឡើងបន្ទាប់ពីចលនាបាតុកម្មដឹកនាំដោយក្រុមនិស្សិតបានបន្តអស់រយៈពេល១ខែនិងកើនអ្នកចូលរួមដល់ជាង១ម៉ឺននាក់ ដើម្បីទាមទារឱ្យមេដឹកនាំយោធាថៃចុះចេញពីតំណែងប្រមុខរដ្ឋាភិបាល ហើយបង្កើតរដ្ឋធម្មនុញ្ញនិងការបោះឆ្នោតថ្មីមួយ។
តាមប្រភពដដែល បាតុករមួយចំនួនក៏អំពាវនាវជាចំហឱ្យមានការកែទម្រង់របបរាជានិយមក្នុងប្រទេស ដែលបានបង្កើតច្បាប់រឹតត្បិតសេរីភាពបញ្ចេញមតិលើរាជវង្ស ដោយដាក់ទោសទណ្ឌជាប់ពន្ធនាគារដល់១៥ឆ្នាំលើជនណាហ៊ានប្រមាថមហាក្សត្រ។
ដោយឡែក ក្រុមអ្នកតវ៉ាផ្សេងទៀត បានប្តេជ្ញាបន្តចលនាទាមទារទៅមុខទៀតតាមការគ្រោងទុកដែលថា នឹងប្រមូលផ្តុំគ្នាធ្វើបាតុកម្មនៅថ្ងៃទី១៩ ខែកញ្ញា ចំថ្ងៃខួបព្រឹត្តិការណ៍រដ្ឋប្រហារយោធាឆ្នាំ២០០៦ ទម្លាក់លោក ថាក់ស៊ីន ចេញពីតំណែងនាយករដ្ឋមន្រ្តី។
នៅថ្ងៃម្សិលមិញនោះដែរ សមត្ថកិច្ចថៃបានបង្កើនការបង្ក្រាបទៅលើក្រុមមេដឹកនាំបាតុកម្ម ដោយការចាប់ខ្លួនសមាជិកក្រុមយុវជនដើម្បីសេរីភាព ឈ្មោះ ថាតធីប រឿងប្រាផៃកិតសេរី (Tattep Ruangprapaikitseree) និងដៃគូឈ្មោះ ផានូម៉ាស់ ស៊ីងព្រំ (Panumas Singprom)។
ផាតធីប ត្រូវបានគេមើលឃើញថា បានលើកម្រាមដៃបីឡើងនៅពេលរូបគេត្រូវបាននាំខ្លួនដល់ស្ថានីយប៉ូលិស ដែលសញ្ញាម្រាមដៃ៣នោះតំណាងឱ្យចលនាទាមទារ៣ចំណុចរបស់ពួកគេ។ យ៉ាងណា រូបគេនិងដៃគូម្នាក់ទៀតត្រូវបានដោះលែងឱ្យនៅក្រៅឃុំ។
បើតាមមេធាវីការពារក្តីឱ្យអ្នកទាំងពីរ អាជ្ញាធរថៃបានចោទប្រកាន់ពួកគេពីបទបំពានច្បាប់សន្តិសុខជាតិ និងច្បាប់ដាក់ប្រទេសក្នុងគ្រាអាសន្នដែលហាមឃាត់មិនឱ្យមានការជួបជុំជាសាធារណៈដើម្បីទប់ស្កាត់និងបង្ការការរីករាលដាលនៃជំងឺផ្លូវដង្ហើមថ្មី។
ផាតធីប និង ផានូម៉ាស់ គឺជាមនុស្ស២នាក់ក្នុងចំណោម១៥នាក់ដែលបានរងបទចោទប្រកាន់ពាក់ព័ន្ធនឹងចលនាបាតុកម្មកាលពីថ្ងៃទី១៨ ខែកក្កដា។ កាលពីថ្ងៃអង្គារ មេធាវីការពារសិទ្ធិមនុស្ស លោក អានំ ណាំផា (Anon Nampa) ត្រូវបានចាប់ខ្លួនជាលើកទី៣ ក្រោមបទចោទប្រកាន់ស្រដៀងគ្នា ជុំវិញការចូលរួមរបស់លោកក្នុងការតវ៉ាប្រឆាំងរដ្ឋាភិបាល។
ដោយឡែក នៅប៉ុន្មានសប្តាហ៍ចុងក្រោយនេះ មេដឹកនាំនិស្សិត អ្នកចម្រៀង និងសកម្មជននយោបាយមួយចំនួនត្រូវបានចាប់ខ្លួនពាក់ព័ន្ធនឹងការចូលរួមរបស់ពួកគេក្នុងសកម្មភាពបាតុកម្ម។ ពួកគេមួយចំនួនបានអំពាវនាវឱ្យមានការផ្លាស់ប្តូរតួនាទីរបស់ព្រះមហាក្សត្រ បើទោះជាគ្មានជនណាម្នាក់ត្រូវបានចោទក្រោមច្បាប់ប្រមាថព្រះរាជាក្តី។
ឆ្លើយតបបញ្ហានេះ នាយករដ្ឋមន្រ្តីថៃ លោក ប្រាយុទ្ធ លើកឡើងថា ក្សត្របច្ចុប្បន្នមិនបានស្នើសុំការកាត់ទោសណាមួយលើពលរដ្ឋដែលហ៊ានប្រមាថព្រះអង្គនោះទេ ខណៈអ្នកដែលត្រូវបានចាប់ខ្លួនកន្លងមកត្រូវបានដោះលែងអស់ហើយ។
ថៃជាប្រទេសដែលមានការធ្វើរដ្ឋប្រហារច្រើនក្នុងតំបន់ គិតពីឆ្នាំ១៩៣២ដល់ឆ្នាំ២០១៤ ប្រទេសនេះធ្លាប់រងការធ្វើរដ្ឋប្រហារដូររដ្ឋាភិបាលចំនួន១៩ដងហើយ៕
