អតីតមន្រ្តីជាន់ខ្ពស់បក្សសង្រ្គោះជាតិ បានអះអាងថាអតីតសមាជិករបស់ខ្លួនចំនួន២៨នាក់ត្រូវបានតុលាការខេត្តកំពង់ចាមកោះហៅឱ្យចូលខ្លួនឆ្លើយបំភ្លឺជុំវិញការចោទប្រកាន់ញុះញង់ឱ្យប្រព្រឹត្តបទឧក្រិដ្ឋជាអាទិ៍ ខណៈអតីតប្រឹក្សាខណ្ឌម្នាក់របស់បក្សនេះក៏ត្រូវរងបទចោទញុះញង់ឱ្យមានចលាចលក្នុងរាជធានីភ្នំពេញផងដែរ។
អតីតមន្រ្តីជាន់ខ្ពស់គណបក្សសង្រ្គោះជាតិដែលកំពុងរស់នៅក្រៅប្រទេសបានបង្ហាញបញ្ជីឈ្មោះអតីតមន្រ្តីរបស់ខ្លួនចំនួន២៨នាក់មកពីស្រុកចំនួននៃខេត្តកំពង់ចាម ដែលពួកគេទាំងនោះធ្លាប់ជាសមាជិកបក្ស ក្រុមប្រឹក្សាឃុំ សមាជិកយុវជនបក្សថ្នាក់ខេត្ត អនុប្រធានភូមិម្នាក់ មេឃុំ និងអតីតបេក្ខជនក្រុមប្រឹក្សាឃុំជាដើម។ យោងតាមបញ្ជីនេះ អតីតសមាជិកបក្សប្រឆាំងទាំងនោះត្រូវបានតុលាការបង្គាប់ឱ្យចូលខ្លួនចន្លោះពីថ្ងៃទី៣ ខែសីហា ដល់ថ្ងៃទី២ ខែកញ្ញា ដែល២៧នាក់ត្រូវហៅមកសាកសួរក្រោមបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងម្នាក់ទៀតក្រោមបទរួមគំនិតក្បត់។
លោក ឈន ចាន់ដែត ប្រធានស្តីទីលេខាធិការដ្ឋានសាលាដំបូងខេត្តកំពង់ចាម បានប្រាប់វីអូឌីថាលោកបានដឹងថាមានមនុស្ស១១នាក់ត្រូវបានចោទប្រកាន់ ឬហៅមកសាកសួរក្នុងនាមជាសាក្សីកាលពីចុងខែសីហា នៅពេលដែលអ្នកសារព័ត៌មានសួរពាក់ព័ន្ធនឹងករណីអតីតមន្រ្តីបក្សសង្រ្គោះជាតិ។ ទោះយ៉ាងណាក៏ដោយ លោកថាលោកមិនអាចប្រាប់ឈ្មោះអ្នកទាំងនោះទេ ប៉ុន្តែលោកបានបញ្ជាក់បន្ថែមថាពិតជាមានឈ្មោះមនុស្ស២នាក់ក្នុងចំណោម២៨នាក់ដែលស្ថិតក្នុងបញ្ជីរបស់អតីតមន្រ្តីជាន់ខ្ពស់បក្សសង្រ្គោះជាតិមែន។ ពួកគេទាំង២នាក់នោះរួមមានឈ្មោះ ឡុច សុខផល និងមុត សុខខែម ដែលជាអតីតសមាជិកបក្សសង្រ្គោះជាតិក្នុងឃុំស្រង៉ែ ស្រុកព្រៃឈរ ហើយត្រូវចូលខ្លួនឆ្លើយបំភ្លឺនៅសាលាដំបូងខេត្តនៅថ្ងៃពុធ។
លោកបានបន្ថែមថាមនុស្ស៨នាក់ផ្សេងទៀតក៏ត្រូវបានចោទប្រកាន់ឬហៅមកឆ្លើយក្នុងនាមជាសាក្សីករណីញុះញង់ឱ្យប្រព្រឹត្តបទឧក្រិដ្ឋជាអាទិ៍កាលពីចុងខែកក្កដា។
លោកស្រី មួរ សុខហួរ អនុប្រធានអតីតគណបក្សសង្រ្គោះជាតិ បានបញ្ជាក់ថាអ្នកដែលបានចូលខ្លួនតាមការកោះហៅរបស់តុលាការត្រូវបានសាកសួរដោយតុលាការ ប៉ុន្តែមិនត្រូវបានឃុំខ្លួននោះទេ។
ស្នងការនគរបាលខេត្តកំពង់ចាម លោក ឯម កុសល បានឆ្លើយថាលោកកំពុងជាប់ប្រជុំ ខណៈអធិការនគរបាលស្រុកកងមាសលោក ជា ជួន ថាលោករវល់ខ្លាំងណាស់មិនអាចធ្វើការអត្ថាធិប្បាយជុំវិញបញ្ហានេះបានទេ។ អ្នកនាំពាក្យសាលាដំបូងខេត្តកំពង់ចាម លោក ហាក់ ហន បាននិយាយថាគាត់មិនមានព័ត៌មានជុំវិញករណីទាំងនេះទេនៅពេលនេះ។
ក្នុងដីការកោះមួយទៀតចុះថ្ងៃទី១៤ ខែសីហា ព្រះរាជអាជ្ញារងសាលាដំបូងរាជធានីភ្នំពេញ លោក សេង ហៀង បានបង្គាប់ឱ្យកម្លាំងមានសមត្ថកិច្ចនាំខ្លួនលោក ប៉ែន ច័ន្ទសង្រ្គាម អតីតក្រុមប្រឹក្សាខណ្ឌមកពីបក្សសង្រ្គោះជាតិ ក្នុងរាជធានីភ្នំពេញ មកបង្ហាញខ្លួនឱ្យបានមុនថ្ងៃទី៧ ខែកញ្ញានៅការិយាល័យប្រឆាំងភេរវកម្ម និងឧក្រិដ្ឋកម្មឆ្លងដែន ដើម្បីសាកសួរពីដំណើររឿងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
លោក សំ សុខគង់ មេធាវី ការពាក្តីឱ្យលោក ច័ន្ទសង្រ្គាម បានបញ្ជាក់កាលពីថ្ងៃអាទិត្យថាកូនក្តីរបស់លោក ត្រូវបានកោះហៅឱ្យឆ្លើយបំភ្លឺនៅសាលាដំបូងរាជធានីភ្នំពេញមែន។ នៅពេលដែលសួរថាតើកូនក្តីរបស់លោកចូលខ្លូនតាមការកោះហៅរបស់តុលាការមុនពេលកំណត់ដែរឬទេ លោក សុខគង់និយាយថាគាត់រង់ចាំមើលសិន។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង នៅថ្ងៃចន្ទនេះមិនអាចបញ្ជាក់លំអិតជុំវិញករណីលោក ច័ន្ទសង្រ្គាមបានទេ។
លោក ច័ន្ទសង្រ្គាម ត្រូវបានគេមើលឃើញថាជាអ្នកមានជំហរិះគន់រដ្ឋាភិបាលជុំវិញបញ្ហាព្រំដែនជាមួយវៀតណាម ក៏ដូចជាគោលនយោបាយអន្តោប្រវេសន៍ តាមរយៈវីដេអូដែលត្រូវបានថតពេលបាតុកម្មឱ្យដោះលែងលោក រ៉ុង ឈុន កាលពីថ្ងៃទី១៣ ខែសីហា ដែលពេលនោះសកម្មជន៦នាក់ត្រូវបានចាប់ខ្លួន ដោយក្នុងនោះអាជ្ញាធរបានឃុំខ្លួនសកម្មជន២នាក់ក្រោមញុះញង់ឱ្យប្រព្រឹត្តបទឧក្រិដ្ឋជាអាទិ៍ ខណៈ៤នាក់ទៀតត្រូវបានដោះលែងវិញ។
នៅក្នុងវីដេអូនោះ លោក ច័ន្ទសង្រ្គាម បាននិយាយថាលោកចូលរួមធ្វើបាតុកម្មដើម្បីបញ្ចេញមតិ ក៏ដូចជាតាមដានការអនុវត្តច្បាប់ ដោយលោកថាអាជ្ញាធរកំពុងរំលោភច្បាប់។
លោកបានលើកឡើងក្នុងវីដេអូដដែលនោះថា លោកធ្លាប់ត្រូវបានគេគំរាមកំហែងនៅពេលដែលបញ្ចេញមតិ ហើយលោកក៏បានប្រាប់ករណីនេះទៅអង្គការសហប្រជាជាតិឱ្យយកចិត្តទុកដាក់ពីរឿងនេះដែរ ប៉ុន្តែលោកថាលោកហ៊ានបូជាជីវិតចំពោះការងាររបស់លោក៕
រាយការណ៍បន្ថែមដោយ លោក Matt Surrusco
ប្រែសម្រួលពីអត្ថបទដើមជាភាសាអង់គ្លេសដោយ ស៊ុន សុខេន
