ស្ថានទូតកម្ពុជាប្រចាំប្រទសថៃ អំពាវនាវដល់ពលរដ្ឋខ្មែរនៅប្រទេសថៃបន្តចូលរួមអនុវត្តវិធានការនានារបស់រដ្ឋាភិបាលថៃ ខណៈដែលរដ្ឋាភិបាលថៃបន្តដាក់ប្រទេសក្នុងគ្រាមានអាសន្នរយៈពេលមួយខែទៀត ដោយសារវិបត្តិជំងឺកូវីដ១៩។
សេចក្តីជូនដំណឹងរបស់ស្ថានទូតព្រះរាជាណាចក្រកម្ពុជាប្រចាំប្រទេសថៃ ដែលបានផ្សព្វផ្សាយនៅថ្ងៃចន្ទនេះ បានឱ្យដឹងថា រដ្ឋាភិបាលថៃបានប្រកាសបន្តដាក់ប្រទេសក្នុងគ្រាអាសន្ន រយៈពេលមួយខែទៀត ចាប់ពីថ្ងៃទី១ ដល់ថ្ងៃទី៣០ ខែកញ្ញា ឆ្នាំ២០២០ ដើម្បីបន្តទប់ស្កាត់និងការពារការរីករាលដាលនៃជំងឺកូវីដ១៩ក្នុងប្រទេសនេះ។
សេចក្តីជូនដំណឹងបានបន្តដោយអំពាវនាវដល់ប្រជាពលរដ្ឋខ្មែរទាំងអស់ដែលកំពុងស្នាក់នៅ សិក្សា និងធ្វើការនៅក្នុងប្រទេសថៃ បន្តចូលរួមសហការបន្ថែមទៀត ដើម្បីអនុវត្តនូវវិធានការនានារបស់រដ្ឋាភិបាលថៃនិងរក្សាសុខភាពអនាម័យ ដើម្បីបង្ការនិងទប់ស្កាត់ការរីករាលដាលនៃជំងឺកូវីដ១៩បន្តទៀត៕
