កម្មករ-កម្មការិនីបម្រើការងារនៅរោងចក្រ រ៉េ សាញ ខ្លូស៊ីង (RAY SHINE CLOTHING) ស្ថិតក្នុងខណ្ឌកំបូល រាជធានីភ្នំពេញ បាននាំគ្នាដេកយាមមុខរោងចក្រ ក្រោយថៅកែរត់ចោលដោយមិនបានបើកប្រាក់ឈ្នួលនិងទូទាត់អត្ថប្រយោជន៍ផ្សេងៗជូនពួកគេ។
ជាកម្មការិនីផ្នែកត្រួតពិនិត្យនៅរោងចក្រ រ៉េ សាញ ខ្លូស៊ីង រយៈពេលជាង៥ខែ អ្នកស្រី ទឹម បុប្ផា ប្រាប់វីអូឌីថា ក្រុមកម្មករបាននាំគ្នាបោះតង់ដេកយាមមុខក្រុមហ៊ុនតាំងពីថ្ងៃទី១០ ខែសីហា ដើម្បីការពារកុំឱ្យមានការដឹកសម្ភារចេញពីរោងចក្រ ខណៈរង់ចាំការជួយដោះស្រាយពីអាជ្ញាធរពាក់ព័ន្ធ។
កម្មការិនីរូបនេះអះអាងថា កន្លងមក ក្រុមកម្មករធ្លាប់រកកិច្ចអន្តរាគមន៍ពីក្រសួងការងារនិងខុទ្ទកាល័យនាយករដ្ឋមន្ត្រីឱ្យជួយដោះស្រាយដែរ ប៉ុន្តែរហូតពេលនេះមិនទាន់មានដំណោះស្រាយទេ។
អ្នកស្រី ទឹម បុប្ផា និយាយថា៖ «ពួកខ្ញុំជាកម្មករអត់លុយសម្រាប់ចំណាយផ្សេងៗ។ មន្ត្រីក្រសួងចុះដោះស្រាយ ពន្យារពេលពីមួយថ្ងៃទៅមួយថ្ងៃ។ គាត់ថា ធ្វើការតាមដំណាក់កាល។ បើគាត់ធ្វើការតាមដំណាក់កាល តើពួកខ្ញុំបានអីហូប? គាត់ចរចាពន្យារពេល ធ្វើឱ្យកម្មករគ្នាលំបាកវេទនាដេកតាមចិញ្ចើមថ្នល់ហាលភ្លៀងហាលថ្ងៃ»។
អ្នកស្រី ទឹម បុប្ផា អះអាងថា ថៅកែនៅជំពាក់ប្រាក់ឈ្នួលកម្មករ១ខែ១០ថ្ងៃ ប្រាក់ដំណាច់ឆ្នាំ ប្រាក់៥ភាគរយ ប្រាក់ថែមម៉ោង និងប្រាក់ថ្លៃបាយ។ អ្នកស្រីថា ជារួម ថៅកែជំពាក់ប្រាក់ឈ្នួលកម្មករម្នាក់ចន្លោះពី៣០០ទៅ៥០០ដុល្លារ។
កម្មករផ្នែកដេរ លោក គង់ សារ័ត្ន បម្រើការងារនៅរោងចក្រនេះ១ឆ្នាំកន្លះ និយាយថា សម្ភារក្នុងរោងចក្រអាចលក់ឡាយឡុងដើម្បីដោះស្រាយសំណងជូនកម្មករគ្រប់គ្នា ប៉ុន្តែម្ចាស់អគារបានជំទាស់ ដោយថា សម្ភារដែលនៅសេសសល់ក្នុងរោងចក្រនោះជារបស់ខ្លួន។
លោក គង់ សារ័ត្ន សុំឱ្យរដ្ឋាភិបាលបញ្ចេញកញ្ចប់ថវិកាណាមួយដោះស្រាយជូនកម្មករសិន ខណៈពួកគាត់កំពុងជួបទុក្ខលំបាកដោយសារខ្វះខាតលុយសម្រាប់ចំណាយប្រចាំថ្ងៃ បង់បន្ទប់ជួល ទឹកភ្លើង និងបង់សងធនាគារជាដើម។
លោក គង់ សារ័ត្ន និយាយថា៖ «ខ្ញុំអំពាវនាវដល់សម្តេច ហ៊ុន សែន ឱ្យគាត់ជួយដោះស្រាយដល់កម្មករ ដោយសារខាងពួកខ្ញុំហ្នឹងភាគច្រើនកំពុងជួបទុក្ខលំបាក ជំពាក់ខាងធនាគារ ហើយខាងធនគារគេអត់យោគយល់យើងទេ។ គេមកចាំទារយើងដល់ផ្ទះ ខ្លាចតែរឹបអូសផ្ទះដីធ្លីទៀត ខ្ញុំមិនដឹងទៅនៅណា?»
លោក ទុត សុគន្ធារ៉ា ដែលអះអាងថាជាតំណាងម្ចាស់អគារ បានប្រាប់វីអូឌីថា ថៅកែពិតជាបានបិទទ្វាររោងចក្ររត់ចោលកម្មករមែន។ លោកថា ម្ចាស់អគារជាជនរងគ្រោះដោយសារថៅកែរត់ចោលដោយមិនបានទូទាត់បំណុលដែរ។
តំណាងម្ចាស់អគាររូបនេះ អះអាងថា ម្ចាស់អគារសុំសម្របសម្រួលដោះស្រាយជាមួយកម្មករដែរ ក្នុងនាមជាជនរងគ្រោះដូចគ្នា ប៉ុន្តែក្រុមកម្មករមិនព្រម។
លោក ទុត សុគន្ធារ៉ា និយាយថា៖ «យើងខិតខំដោះស្រាយជាមួយពួកគាត់ណាស់ ប៉ុន្តែពួកគាត់អត់ចូលរួមដោះស្រាយទេ។ ពួកគាត់គិតតែទាមទារដូចថៅកែនៅអីចឹង។ គាត់អត់គិតថា យើងជាជនរងគ្រោះដូចគ្នា តើត្រូវសម្របសម្រួលដូចម្តេចផងហ្នឹង។ គាត់មិនស្តាប់អាជ្ញាធរនិងស្តាប់អ្នកសម្របសម្រួលដោះស្រាយផងហ្នឹង»។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ លោក វង្ស សុវណ្ណ ដែលកាន់សំណុំរឿងនេះ ប្រាប់ថា ករណីនេះ ក្រសួងកំពុងបន្តសម្របសម្រួលដោះស្រាយតាមនីតិវិធី។
លោកបន្តថា បញ្ហាប្រឈមនោះគឺសម្ភារនៅសេសសល់ក្នុងរោងចក្រជាប់ពាក់ព័ន្ធជាមួយម្ចាស់ជាច្រើននាក់ផ្សេងទៀត ដែលកម្មករពិបាកក្នុងការលក់ឡាយឡុងដើម្បីដោះស្រាយសំណង ប៉ុន្តែលោកថា កម្មករអាចប្តឹងករណីនេះទៅតុលាការបាន។
លោក វង្ស សុវណ្ណ ប្រាប់ថា៖ «ឥលូវយើងមិនអាចប៉ាន់ស្មានបាននៅឡើយទេថា ដំណោះស្រាយបានយ៉ាងម៉េច ព្រោះឥលូវនេះបងប្អូនយើងក៏មិនទាន់ជ្រើសរើសដាក់បណ្តឹងទៅតុលាការនៅឡើយ។ អ៊ីចឹង មានតែយើងសម្របសម្រួលដោះស្រាយបន្ត ហើយយើងក៏ពិនិត្យមើលថា អ្នកណាខ្លះជាម្ចាស់សម្ភារហ្នឹងខ្លះ ហើយបានពិនិត្យទៅលើលទ្ធភាពបើកជូនគាត់យ៉ាងម៉េចៗ បានគិតទៀត»។
បើតាមអ្នកស្រី ទឹម បុប្ផា រោងចក្រ រ៉េ សាញ ខ្លូស៊ីង ជារោងចក្រផលិតសម្លៀកបំពាក់មានថៅកែជាជនជាតិចិននិងមានកម្មករប្រមាណ៣២០នាក់៕
