អគ្គស្នងការនគរបាលជាតិ ណែនាំដល់មន្ត្រីនគរបាលរាជធានី-ខេត្តទាំងអស់ ការពារសន្តិសុខ សណ្តាប់ធ្នាប់ និងសុវត្ថិភាពសង្គម ព្រមទាំងបន្តផ្សព្វផ្សាយដល់ពលរដ្ឋពីវិធានការទប់ស្កាត់ការឆ្លងជំងឺកូវីដ១៩ ក្នុងពិធីបុណ្យកាន់បិណ្ឌ និងភ្ជុំបិណ្ឌ។
សេចក្តីណែនាំរបស់អគ្គស្នងការដ្ឋាននគរបាលជាតិ កាលពីថ្ងៃម្សិលមិញ បានណែនាំដល់នាយកដ្ឋានកណ្តាល អង្គភាពជំនាញ និងស្នងការដ្ឋាននគរបាលរាជធានី-ខេត្តទាំងអស់ ត្រូវយកចិត្តទុកដាក់ ពាក់ព័ន្ធសន្ដិសុខ និងសណ្ដាប់ធ្នាប់សង្គម ជាពិសេស សកម្មភាពភេរវកម្ម ឧក្រិដ្ឋកម្ម និងសកម្មភាពល្មើសច្បាប់ផ្សេងៗទៀត ដើម្បីចាត់វិធានការបង្ការ ទប់ស្កាត់ និងបង្ក្រាបឲ្យមានប្រសិទ្ធភាពទាន់ពេលវេលា។
អគ្គស្នងការ បានបន្តជំរុញឱ្យមន្ត្រីនគរបាលទាំងអស់ ត្រូវអនុវត្តគោលនយោបាយភូមិឃុំមានសុវត្ថិភាព, រឹតបន្តឹងការអនវុត្តច្បាប់ចរាចរណ៍, ប្រុងប្រយ័ត្នគ្រោះអគ្គិភ័យ និងចាត់វិធានការការពារ គ្រប់គោលដៅប្រារព្ធពិធីបុណ្យ និងគោលដៅកម្សាន្ដសប្បាយនានា ព្រមទាំងយាមកាម ល្បាតការពារផ្ទះសម្បែង និងទ្រព្យសម្បត្តិរបស់ប្រជាពលរដ្ឋ ដែលធ្វើដំណើរទៅកាន់ស្រុកកំណើត ឬទៅសម្រាកកម្សាន្ដនៅតាមតំបន់នានា។
ជាមួយគ្នានេះដែរ អគ្គស្នងការដ្ឋាននគរបាលជាតិ ក៏បានណែនាំឱ្យមន្ដ្រីបន្ដចុះធ្វើការផ្សព្វផ្សាយអប់រំបន្ថែមទៀត អំពីវិធានសុខាភិបាល ដល់ប្រជាពលរដ្ឋ ដើម្បីចូលរួមបង្ការជំងឺកូវីដ១៩ ហើយក្នុងករណីសង្ស័យមានអ្នកផ្ទុកជំងឺនេះ ត្រូវរាយការណ៍បន្ទាន់ទៅអាជ្ញាធរមានសមត្ថកិច្ចដែលនៅជិតបំផុត។
ពិធីកាន់បិណ្ឌ និងភ្ជុំបិណ្ឌនៅឆ្នាំនេះ នឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី១៧ ខែកញ្ញា៕
