ក្រសួងសុខាភិបាល អំពាវនាវដល់ប្រជាពលរដ្ឋទាំងអស់ អនុវត្តវិធានសុខាភិបាលក្នុងការការពារខ្លួនពីការឆ្លងជំងឺកូវីដ១៩ និងយកចិត្តទុកដាក់លើសុវត្ថិភាពចំណីអាហារ ដើម្បីជៀសវាងករណីពុលចំណីអាហារ និងស្រា ក្នុងកំឡុងពេលបុណ្យកាន់បិណ្ឌ និងភ្ជុំបិណ្ឌ។
ពិធីបុណ្យកាន់បិណ្ឌ និងភ្ជុំបិណ្ឌឆ្នាំនេះ នឹងប្រព្រឹត្តទៅចាប់ពីថ្ងៃទី៣ ខែកញ្ញា ស្អែកនេះ រហូតដល់ថ្ងៃទី១៧ ខែកញ្ញា។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងប្រាប់ក្រុមអ្នកសារព័ត៌មានតាមប្រព័ន្ធតេឡេក្រាម (Telegram) នៅថ្ងៃពុធនេះថា ពិធីបុណ្យកាន់បិណ្ឌ និងភ្ជុំបិណ្ឌ នឹងចាប់ផ្តើមពីថ្ងៃស្អែកនេះទៅ ដែលករណីនេះ ក្រសួងអំពាវនាវដល់ប្រជាពលរដ្ឋទាំងអស់ ត្រូវប្រុងប្រយ័ត្នថែរក្សាសុខភាពផ្ទាល់ខ្លួន ដើម្បីជៀសវាងកើតមានបញ្ហាសុខភាព។
លោកស្រីបានណែនាំនូវចំណុចគន្លឹះមួយចំនួនដើម្បីរក្សាសុវត្ថិភាពចំណីអាហារផងដែរ ក្នុងនោះ ត្រូវចម្អិនម្ហូបអាហារឱ្យបានឆ្អិនល្អ រក្សាទុកដាក់ចំណីអាហារឱ្យបានត្រឹមត្រូវ ដោយមិនត្រូវទុកដាក់ចំណីអាហារច្របូកច្របល់គ្នា និងជៀសវាងទុកអាហារយូរម៉ោងរហូតដល់ជូរផ្អូម។
លោកស្រី ក៏បានណែនាំឱ្យចៀសវាងប្រើប្រាស់របស់របរមិនស្អាត និងត្រូវលាងសម្អាតវត្ថុប្រើប្រាស់សម្រាប់ចម្អិនអាហារឱ្យបានស្អាត និងចៀសវាងការទទួលទានស្រាស ដែលមិនមានប្រភពច្បាស់លាស់ និងលក្ខណៈបច្ចេកទេសផលិតត្រឹមត្រូវ ជាពិសេសចៀសវាងការយកមេតាណុលមកលាយធ្វើស្រាស។
ជាមួយគ្នានេះដែរ លោកស្រី ឱ វណ្ណឌីន បានអំពាវនាវដល់ប្រជាពលរដ្ឋ ត្រូវអនុវត្តនូវវិធានការសុខាភិបាល ដើម្បីការពារការចម្លងវីរុសកូវីដ១៩ ដោយត្រូវលាងសម្អាតដៃឱ្យបានស្អាតជានិច្ច ពាក់ម៉ាស់ និងរក្សាគម្លាតសុវត្ថិភាព៕
