ប្រជាសហគមន៍រស់នៅតាមបណ្តោយផ្លូវរថភ្លើងជិត៣០គ្រួសារ នៅខណ្ឌទួលគោក អះអាងថា ពួកគេប្រឈមនឹងការបណ្តេញចេញពីលំនៅឋាន បើសាលារាជធានីភ្នំពេញធ្វើការអភិវឌ្ឍផ្លូវបេតុងនិងអាងស្តុកទឹកនៅតំបន់នោះនាពេលឆាប់ៗខាងមុខនេះ។
ការអះអាងនេះបានធ្វើឡើងនៅពេលដែលពួកគេបានទៅប្រមូលផ្តុំនៅមុខសាលារាជធានីភ្នំពេញ នៅថ្ងៃទី០៣ ខែកញ្ញានេះ ដើម្បីសួរនាំពាក់ព័ន្ធនឹងគម្រោងអភិវឌ្ឍន៍របស់អាជ្ញាធរ។
តំណាងប្រជាសហគមន៍អភិវឌ្ឍន៍ថ្មី សង្កាត់ទឹកល្អក់ទី១ ខណ្ឌទួលគោក អ្នកស្រី មាស ស្រីភាព និយាយថា កាលពីថ្ងៃទី១២ ខែសីហាថ្មីៗនេះ អាជ្ញាធរខណ្ឌបានជូនដំណឹងដល់ប្រជាសហគមន៍ដែលរស់នៅតាមបណ្តោយផ្លូវរថភ្លើង ក្នុងសង្កាត់ទឹកល្អក់ទី១ សង្កាត់បឹងកក់ទី១ និងសង្កាត់បឹងកក់ទី២ ដោយទុកពេល១ខែចាប់ពីថ្ងៃជូនដំណឹងឱ្យពួកគេត្រៀមរុះរើផ្ទះចេញពីតំបន់នោះ ដើម្បីទុកលទ្ធភាពឱ្យអាជ្ញាធរស្ថាបនាផ្លូវនិងកែលម្អអាងស្តុកទឹកឱ្យបានល្អប្រសើរឡើងវិញ។
ករណីនេះ អ្នកស្រីថា សាលារាជធានីភ្នំពេញមិនបានបញ្ជាក់ពីទីតាំងថ្មីដែលត្រូវដោះដូរឱ្យពួកគេនោះទេ ប៉ុន្តែពួកគាត់បានដាក់សំណើស្នើសុំពីរចំណុច គឺធ្វើការអភិវឌ្ឍនៅនឹងកន្លែងឬដោះដូរទីតាំងដីថ្មីនៅក្រោយវត្ត«ទួលអស់លោក»ដែលនៅក្បែរតំបន់នោះ។
អ្នកស្រីបាននិយាយថា៖ «ខ្ញុំថា ខ្ញុំអត់ទទួលយកសំណងទេ ខ្ញុំសុំដូរដីខ្ញុំវិញ ទាំងភូមិ១៥, ១៦ និងភូមិ១៧ គេសុំស្នើដូចគ្នាទាំងអស់ គឺដីនៅ[វត្ត]ទួលអស់លោក និងខណ្ឌទួលគោក គឺដីកន្លែងណា[ផ្សេង]ក៏ពួកខ្ញុំអត់យកដែរ»។
បន្ថែមពីនេះ អ្នកស្រីថា សាលារាធានីភ្នំពេញស្នើឱ្យប្រជាសហគមន៍ទាំងនោះធ្វើលិខិតដាក់ពាក្យស្នើសុំកម្មសិទ្ធិដីនោះជាថ្មី ដោយបញ្ជាក់ទីតាំងឱ្យបានច្បាស់លាស់ ដើម្បីជូនទៅថ្នាក់លើពិនិត្យនិងសម្រេច។
តំណាងប្រជាសហគមន៍អភិវឌ្ឍន៍ថ្មីម្នាក់ទៀត អ្នកស្រី ហ៊ុយ សាខឿន និយាយថា បើសាលារាជធានីភ្នំពេញមិនព្រមអភិវឌ្ឍនិងដោះដូរទីតាំងថ្មីឱ្យពួកគេទេ នឹងធ្វើឱ្យប៉ះពាល់ដល់ជីវភាពគ្រួសារកាន់តែខ្លាំង។
អ្នកស្រីនិយាយថា៖ «បើដេញចេញទៅ ខ្ញុំមិនដឹងទៅនៅកន្លែងណាទេ ហើយណាកូនខ្ញុំរៀននៅទីនេះ ហើយកន្លែងខ្ញុំធ្វើការរកស៊ីក៏នៅទីហ្នឹងដែរ បើឱ្យខ្ញុំទៅនៅកន្លែងណាឆ្ងាយ បើចង់ដោះស្រាយ ខ្ញុំចង់នៅកន្លែងហ្នឹង [អភិវឌ្ឍនៅនឹងកន្លែង] ក៏បាន ងាយស្រួលយើងធ្វើការ កូនរៀន ខ្ញុំរកស៊ីនៅទីហ្នឹង ខ្ញុំរកស៊ីនៅទីហ្នឹងដែរ»។
រីឯតំណាងសហគមន៍ភូមិ១៧ ស្ថិតនៅសង្កាត់បឹងកក់ទី២ ខណ្ឌទួលគោក លោក គា ភារ៉ា អះអាងថា ពួកគាត់នឹងបន្តការតវ៉ារហូតដល់មានដំណោះស្រាយ។
លោកព្រមានថា៖ «បើអត់មានដំណោះស្រាយ មានតែពួកខ្ញុំធ្វើការដាក់ញត្តិជូនទៅសាលារាជធានីភ្នំពេញម្តងទៀត ដើម្បីឱ្យគាត់រកដំណោះស្រាយឱ្យខ្ញុំ ដំណោះស្រាយដូរដីឱ្យខ្ញុំដែលនៅក្នុងខណ្ឌទួលគោក»។
វីអូឌីមិនអាចសុំការបញ្ជាក់ពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេនៅរសៀលថ្ងៃនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ប្រសិនបើរដ្ឋាភិបាលមានគម្រោងអភិវឌ្ឍន៍នៅតំបន់នោះមែន អាជ្ញាធរពាក់ព័ន្ធគួររកវិធីដោះស្រាយជូនប្រជាពលរដ្ឋជាមុន មុននឹងធ្វើការអភិវឌ្ឍ ដើម្បីកុំឱ្យមានការតវ៉ារឿងដីធ្លី នៅអំឡុងពេលអភិវឌ្ឍន៍នោះ។
លោកមានប្រសាសន៍ថា៖ «បើសិនជាគ្មានដំណោះស្រាយ វាអាចមានបញ្ហាប្រឈមជាបន្តបន្ទាប់ មានន័យថា ពលរដ្ឋអាចនឹងរងផលប៉ះពាល់ រងនូវការបណ្តេញចេញ ហើយអាជ្ញាធរក៏អាចរងនូវការតវ៉ា នូវការទាមទារពីប្រជាពលរដ្ឋដែរ បើសិនជាមិនមានដំណោះស្រាយណាមួយឈានដល់ការព្រមព្រៀងគ្នាហើយធ្វើការអភិវឌ្ឍ»។
កាលពីថ្ងៃទី១៧ ខែកក្កដា ឆ្នាំ២០២០ ប្រជាសហគមន៍ទាំងនោះក៏បានដាក់លិខិតទៅសាលារាជធានីភ្នំពេញ ដើម្បីស្នើសុំជួបពិភាក្សាគ្នាស្វែងរកដំណោះស្រាយលើករណីនេះដែរ ប៉ុន្តែមកដល់ពេលនេះនៅមិនទាន់មានការឆ្លើយតបនៅឡើយ៕
