ក្រសួងសុខាភិបាលបានលើកឡើងថា អ្នកជំងឺកូវីដ១៩ចំនួន៥នាក់បានជាសះស្បើយ ក្នុងនោះមានជនជាតិចិន៤នាក់និងជនជាតិខ្មែរម្នាក់ និងមិនមានករណីឆ្លងថ្មីនោះទេ។
សេចក្តីជូនព័ត៌មានរបស់ក្រសួងសុខាភិបាលនៅថ្ងៃព្រហស្បតិ៍នេះ បានឱ្យដឹងថា ជនជាតិខ្មែរម្នាក់ដែលជាសះស្បើយពីជំងឺកូវីដ១៩នោះ មានអាយុ២៦ឆ្នាំ នៅខណ្ឌដង្កោ រាជធានីភ្នំពេញ បានធ្វើដំណើរមកពីប្រទេសរុស្សី បន្តជើងហោះហើរនៅប្រទេសម៉ាឡេស៊ី មកដល់កម្ពុជា កាលពីថ្ងៃទី១៩ ខែកក្កដា។
ចំណែកជនជាតិចិនចំនួន៤នាក់ទៀតដែលជាសះស្បើយដែរនោះ ក្រសួងបញ្ជាក់ថា ពួកគេបានធ្វើដំណើរមកពីប្រទេសហ្វីលីពីន មកកម្ពុជា កាលពីថ្ងៃទី០៩ ខែសីហា។
សេចក្តីប្រកាសព័ត៌មានដដែលបន្តថា គិតត្រឹមព្រឹកថ្ងៃទី០៣ ខែកញ្ញា ឆ្នាំ២០២០នេះ មានមនុស្សចំនួន២៧៤នាក់ហើយដែលត្រូវបានរកឃើញឆ្លងជំងឺកូវីដ-១៩នៅក្នុងប្រទេសកម្ពុជា ក្នុងនោះអ្នកជំងឺ២៧១នាក់ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅមណ្ឌលសុខភាពចាក់អង្រែនិងមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ចំនួន៣នាក់ ជាបុរស៕
