ក្រសួងសុខាភិបាលបានឱ្យដឹងថា អ្នកជំងឺកូវីដ១៩ចំនូួន១នាក់ទៀតត្រូវបានព្យាបាលជាសះស្បើយ ដែលធ្វើឱ្យអ្នកជាសះស្បើយសរុបឡើងដល់២៧២នាក់ ក្នុងចំណោមអ្នកជំងឺដែលបានរកឃើញសរុបចំនួន២៧៤នាក់។
សេចក្តីប្រកាសរបស់ក្រសួងសុខាភិបាល នៅថ្ងៃទី៤ ខែកញ្ញា ឆ្នាំ២០២០នេះ បានលើកឡើងថា អ្នកដែលគ្រូពេទ្យព្យាបាលជាសះស្បើយនោះគឺជាបុរសជនជាតិចិន អាយុ២២ឆ្នាំ ស្នាក់នៅសណ្ឋាគារមួយក្នុងរាជធានីភ្នំពេញ ជាអ្នកធ្វើដំណើរមកពីប្រទេសហ្វីលីពីន មកដល់កម្ពុជា កាលពីថ្ងៃទី៩ ខែសីហា។
ក្រសួងសុខាភិបាលបានបញ្ជាក់ដែរថា មិនមានករណីឆ្លងជំងឺកូវីដ១៩ថ្មីទេ នៅថ្ងៃទី០៣ ខែកញ្ញា។
បើតាមសេចក្តីប្រកាសព័ត៌មានដដែល គិតត្រឹមព្រឹកថ្ងៃទី០៤ ខែកញ្ញា ឆ្នាំ២០២០នេះ មានមនុស្សចំនួន២៧៤នាក់ហើយដែលត្រូវបានរកឃើញឆ្លងវីរុសកូវីដ-១៩នៅក្នុងប្រទេសកម្ពុជា ក្នុងនោះអ្នកជំងឺ២៧២នាក់ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅមណ្ឌលសុខភាពចាក់អង្រែនិងមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ មានចំនួន២នាក់ ជាបុរស៕
