អាជ្ញាធរខណ្ឌ៧មករារាជធានីភ្នំពេញ បកស្រាយថា កម្លាំងប្រជាការពារព្យាយាមទប់ស្កាត់ក្រុមស្ត្រីតវ៉ាកុំឱ្យរំខានដល់តុលការ និងការរស់នៅរបស់ប្រជាពលរដ្ឋ ទើបឈានដល់ការជ្រុលដៃរុញស្ត្រីអ្នកតវ៉ាម្នាក់ដូលលើថ្នល់។
ស្រ្តីមួយក្រុមបានតវ៉ានៅថ្ងៃសុក្រម្សិលមិញ ដើម្បីទាមទារឱ្យតុលាការដោះលែងប្តីរបស់ពួកគាត់ជាអតីតមន្ត្រីគណបក្សសង្គ្រោះជាតិឱ្យមានសេរីភាពវិញ។ ក្នុងការតវ៉ានោះមានការរុញច្រានពីកម្លាំងប្រជាការពាររហូតដល់ស្ត្រីម្នាក់ឈ្មោះសេង ចាន់ថន ដួលដល់ថ្នល់ហើយសន្លប់នៅកន្លែងនោះ។
ក្នុងសេចក្តីប្រកាសព័ត៌មានរបស់អាជ្ញាធរខណ្ឌ៧មករាចុះថ្ងៃទី៤ខែកញ្ញា លើកឡើងថា ប្រជាការពារអ្នកបង្កនោះឈ្មោះឆោម ប្រសិដ្ឋ ។ សាលាខណ្ឌបន្តថា ពេលនេះអាជ្ញាធរខណ្ឌបានអប់រំ និងពិន័យតាមច្បាប់លើប្រជាការពាររូបនេះ។
ទោះយ៉ាងណាវីឌីអូនៃហេតុការណ៍នេះ ត្រូវបានអ្នកប្រើប្រាស់បណ្តាញសង្គមចែករំលែកតគ្នា ហើយក៏មានអ្នកខ្លះចោទប្រកាន់ថា ជាសកម្មភាពបុរសពេញកម្លាំងទាញបោកដោយចេតនាលើស្ត្រីទន់ខ្សោយបែបនេះជាទង្វើមិនត្រឹមត្រូវតាមច្បាប់ និង សីលធម៌៕
