សមត្ថកិច្ចរាជធានីភ្នំពេញ បានឃាត់ខ្លួនយុវជនម្នាក់ក្នុងអំឡុងពេលដែលរូបគាត់និងពលរដ្ឋប្រមាណជិត៥០នាក់ព្យាយាមទៅប្រមូលផ្តុំនៅទីលានប្រជាធិបតេយ្យ ក្នុងខណ្ឌឫស្សីកែវ នៅព្រឹកនេះ។
តាមគម្រោង ក្រុមពលរដ្ឋសកម្មដើម្បីយុត្តិធម៌ គ្រោងធ្វើបាតុកម្មនៅទីលានប្រជាធិបតេយ្យ ចាប់ពីថ្ងៃទី៧ដល់ថ្ងៃទី១៥ ខែកញ្ញា ដើម្បីទាមទារឱ្យមានយុត្តិធម៌នៅក្នុងសង្គមនិងទាមទារឱ្យដោះលែងលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា និងមនុស្ស៤នាក់ទៀតដែលជាប់ពន្ធនាគារបណ្តោះអាសន្នពាក់ព័ន្ធនឹងរឿងព្រំដែន។
ជាមួយគ្នានេះដែរ កម្លាំងសមត្ថកិច្ចក៏បានដាក់ពង្រាយកម្លាំងនិងដាក់របាំងហ៊ុមព័ទ្ធមិនឱ្យមានការប្រមូលផ្តុំផងដែរ។
កញ្ញា សូ មេត្តា យុវជនខ្មែរថាវរៈ ដែលចូលរួមបាតុកម្មនោះ បានឱ្យដឹងថា នៅព្រឹកមិញនេះ សមត្ថកិច្ចបានឃាត់ខ្លួនសមាជិកពួកគេម្នាក់ឈ្មោះ ថា ឡាវី នៅពេលដែលរូបគាត់និងពលរដ្ឋផ្សេងទៀតព្យាយាមទៅប្រមូលផ្តុំនៅទីលានប្រជាធិបតេយ្យ។ កញ្ញាបានចាត់ទុកសកម្មភាពរារាំងរបស់អាជ្ញាធរថា ជាការបំបិទសិទ្ធិសេរីភាពសម្តែងមតិរបស់ពលរដ្ឋ។
កញ្ញាថា៖ «គាត់[សមត្ថកិច្ចខណ្ឌ]ចាប់ចងគ្នាខ្ញុំម្នាក់ព្រឹកមិញហើយ មិនឱ្យយើងមានមាត់និយាយ ដូច្នេះតើឯណាទៅសិទ្ធិសេរីភាពប្រជាពលរដ្ឋ ហើយនេះជាទីសាធារណៈរបស់ប្រជាពលរដ្ឋ ខ្ញុំសុំសួរថា ហេតុអ្វីយើងមកសម្តែងមតិមិនបាន មកដាក់កងកម្លាំងរារាំងពួកយើង ហើយរុញច្រានពួកយើងទៀត»។
លោក មួង សុភ័ក្រ ជាយុវជនម្នាក់ក្នុងចំណោមអ្នកដែលទៅប្រមូលផ្តុំនោះ បាននិយាយថា ទីតាំងប្រជាធិបតេយ្យជាកន្លែងសម្រាប់ឱ្យពលរដ្ឋប្រមូលផ្តុំសម្តែងមតិ ហើយពួកគេក៏បានជូនដំណឹងរួចហើយទៅសាលារាជធានីភ្នំពេញពីការធ្វើបាតុកម្មដោយសន្តិវិធីនេះ។
លោកថា៖ «ខ្ញុំមកសម្តែងមតិដោយសន្តិវិធី ខ្ញុំបានជូនដំណឹងទៅសាលារាជធានីភ្នំពេញហើយ»។
ទោះជាយ៉ាងណា សមត្ថកិច្ចខណ្ឌឫស្សីដែលមិនបញ្ជាក់ឈ្មោះ បានប្រាប់ក្រុមអ្នកតវ៉ាថា សាលារាជធានីភ្នំពេញបានជូនដំណឹងរួចហើយ ថាមិនអនុញ្ញាតឱ្យមានការប្រមូលផ្តុំនៅទីលានប្រជាធិបតេយ្យនោះទេ។ លោកបន្តថា ការរារាំងនេះក៏ដើម្បីការពារសន្តិសុខសណ្តាប់ធ្នាប់សាធារណៈនិងការកកស្ទះចរាចរណ៍។
ចំណែក អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានបញ្ជាក់កាលពីសប្តាហ៍មុនថា បើក្រុមយុវជនទាំងនោះនៅតែជួបជុំគ្នាសម្តែងមតិមិនស្របតាមច្បាប់ ពួកគេនឹងប្រឈមនឹងវិធានការរបស់អាជ្ញាធរ។
លោកមានប្រសាសន៍ថា៖ «វាអត់មានអ្វីចម្លែកទេ [បើធ្វើបាតុកម្មមិនគោរពច្បាប់] សម្រាប់អាជ្ញាធរក្នុងការចាត់វិធានការ ដើម្បីថែរក្សាសន្តិសុខសណ្តាប់ធ្នាប់សាធារណៈ»។
កាលពីថ្ងៃអាទិត្យម្សិលមិញ អាជ្ញាធររាជធានីភ្នំពេញក៏បានចាប់ឃាត់ខ្លួនយុវជនម្នាក់ឈ្មោះ មាន ព្រហ្មមុនី ទៅតាមដីការបស់សាលាដំបូងរាជធានីភ្នំពេញ ក្រោមបទចោទ «ញុះញង់ឱ្យមានភាពវឹកវរដល់សន្តិសុខសង្គម» ពាក់ព័ន្ធរឿងព្រំដែន។
យុវជនរូបនោះជាយុវជនម្នាក់ក្នុងចំណោមមនុស្ស៣នាក់ ក្នុងនោះមានលោក ថា ឡាវី ផងដែរដែលបានប្រកាសពីការធ្វើបាតុកម្មនៅទីលានប្រជាធិបតេយ្យនៅព្រឹកថ្ងៃចន្ទនេះ៕
