ប្រធានរដ្ឋសភាកម្ពុជា បានស្នើដល់បណ្តាប្រទេសក្នុងតំបន់អាស៊ាន ធ្វើសមាហរណកម្មតំបន់ឱ្យកាន់តែស៊ីជម្រៅថែមទៀត ដើម្បីសម្រួលដល់លំហូរទំនិញ សេវាកម្ម និងប្រជាជន នៅក្នុងពេលមានវិបត្តិសេដ្ឋកិច្ចធ្ងន់ធ្ងរដោយសារជំងឺកូវីដ១៩នេះ។
ការស្នើនេះបានធ្វើឡើងនៅក្នុងសុន្ទរកថាគន្លឹះរបស់លោក ហេង សំរិន ប្រធានរដ្ឋសភាកម្ពុជា ថ្លែងទៅកាន់មហាសន្និបាតអន្តរសភាអាស៊ានលើកទី៤១ តាមប្រព័ន្ធវីដេអូខនហ្វ្រឺរេន (Video Conference) នៅថ្ងៃទី៨ ខែកញ្ញានេះ ដែលសភាប្រទេសវៀតណាមធ្វើជាម្ចាស់ផ្ទះ។
លោក ហេង សំរិន បានថ្លែងថា ការរាតត្បាតនៃជំងឺកូវីដ១៩នៅលើពិភពលោក បាននាំមកនូវបញ្ហាប្រឈមជាច្រើន រួមមាន សុវត្ថិភាព សុខភាពសាធារណៈ ការបង្អាក់ការប្រមូលផ្តុំ និងដំណើរការនៃសង្វាក់ផ្គត់ផ្គង់សកល ជាពិសេសបានបង្កផលប៉ះពាល់យ៉ាងធ្ងន់ធ្ងរចំពោះសង្គមនិងសេដ្ឋកិច្ចសកលលោក។
លោកបានគូសបញ្ជាក់ថា៖ «យើងត្រូវធ្វើការរួមគ្នា បង្កើនកិច្ចសហប្រតិបត្តិការ និងសាមគ្គីភាពអន្តរជាតិ ដើម្បីផលប្រយោជន៍រួមរបស់យើង»។
ជាមួយគ្នានេះដែរ លោកក៏បានបញ្ជាក់ជំហរដែរថា សភាកម្ពុជាគាំទ្រការខិតខំប្រឹងប្រែងរបស់អាស៊ាន ក្នុងការថែរក្សានិងលើកកម្ពស់សន្តិភាព សន្តិសុខនិងស្ថិរភាពក្នុងតំបន់ ការដោះស្រាយជម្លោះដោយសន្តិវិធីឈរលើគោលការណ៍ច្បាប់អន្តរជាតិ និងយន្តការការទូតដើម្បីចៀសវាងការប្រើប្រាស់កម្លាំងប្រដាប់អាវុធ។
តាំងនាមឱ្យសភាកម្ពុជា លោក ហេង សំរិន ក៏បានលើកទឹកចិត្តឱ្យមានការចូលរួមកាន់តែច្រើនពីសមាជិកសភាវ័យក្មេងនៅក្នុងកិច្ចប្រជុំសំខាន់របស់អាយប៉ានិងជាមួយយុវជនអាស៊ានផងដែរ ខណៈយុវជនបានដើរតួនាទីយ៉ាងសំខាន់នៅក្នុងការចូលរួមអភិវឌ្ឍសង្គមជាតិ ក៏ដូចជាដំណើរការកសាងសមាគមអាស៊ានប្រកបដោយវឌ្ឍនភាពនិងវិបុលភាព។
បើតាមការជូនដំណឹងរបស់សភាកម្ពុជា មហាសន្និបាតអន្តរសភាអាស៊ានលើកទី៤១នេះ នឹងប្រារព្ធធ្វើចាប់ពីថ្ងៃទី៨ ដល់ថ្ងៃទី១០ ខែកញ្ញានេះ ក្រោមមូលបទ “ការទូតសភា ដើម្បីសម្រេចបានសហគមន៍អាស៊ាន ប្រកបដោយភាពស្អិតរមួត និងឆ្លើយតប”។
អន្តរសភាអាស៊ាន ដែលហៅកាត់ថា អាយប៉ា (AIPA) ជាអង្គការអន្តរសភា តំណាងស្ថាប័ននីតិប្បញ្ញត្តិ នៃបណ្តាប្រទេសជាសមាជិកសមាគមប្រជាជាតិអាស៊ីអាគ្នេយ៍ (ASEAN) ដែលមាន ប្រទេសកម្ពុជា ប៊្រុយណេ ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សិង្ហបុរី ថៃ វៀតណាម និងហ្វីលីពីន។
អន្តរសភាអាស៊ាន ជាការប្រមូលផ្ដុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូរបស់អាស៊ានក្នុងការជំរុញឱ្យសម្រេចបាននូវគោលដៅសហគមន៍អាស៊ានតែមួយ។
បន្ទាប់ពីពិធីបើកជាផ្លូវការនៅថ្ងៃនេះ មហាសន្និបាតនឹងមានកិច្ចប្រជុំតាមគណៈកម្មាធិការជំនាញជាច្រើនតាមប្រព័ន្ធវីដេអូខនហ្វ្រឺរេននេះ រួមមាន កិច្ចប្រជុំគណៈកម្មាធិការស្រ្តី កិច្ចប្រជុំសមាជិកសភាអាយប៉ាវ័យក្មេង កិច្ចប្រជុំគណៈកម្មាធិការនយោបាយ កិច្ចប្រជុំគណៈកម្មាធិការសេដ្ឋកិច្ច កិច្ចប្រជុំគណៈកម្មាធិការសង្គមកិច្ច និងកិច្ចប្រជុំគណៈកម្មាធិការរៀបចំ ជាដើម៕
