មន្ត្រីក្រសួងសុខាភិបាល ឱ្យដឹងថា មានករណីជនជាតិចិន ២នាក់ បានរត់គេចចេញពីការធ្វើចត្តាឡីស័កនៅសណ្ឋាគារមួយ ក្នុងរាជធានីភ្នំពេញ នៅរសៀលថ្ងៃពុធនេះ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានប្រាប់ក្រុមអ្នកសារព័ត៌មានតាមតេឡេក្រាម (Telegram)ថា ជនជាតិចិនទាំងពីរនាក់ ដែលលួចរត់ចេញពីមណ្ឌលចត្តាឡីស័កនោះ បានធ្វើដំណើរមកពីប្រទេសចិន មកដល់កម្ពុជា នៅម៉ោងប្រហែល ១១ថ្ងៃត្រង់ថ្ងៃទី៨ ខែកញ្ញា ម្សិលមិញ។
លោកស្រី បន្តថា ក្រោយពីបានចូលស្នាក់នៅសណ្ឋាគារមួយ ដែលជាទីតាំងធ្វើចត្តាឡីស័ក្កនោះ ដើម្បីរងចាំលទ្ធផលតេស្តរកវីរុសកូវីដ១៩ ប៉ុន្តែដោយសារមានទំនាស់ក្នុងក្រុមរបស់ពួកគេនោះ ជនជាតិចិនទាំងពីរនាក់នេះ ក៏បានរត់ចេញពីសណ្ឋាគារនោះតែម្តង នៅរសៀលថ្ងៃទី៩ ខែកញ្ញានេះ។
អ្នកនាំពាក្យរូបនេះ បានបញ្ជាក់ថា៖«បច្ចុប្បន្ន អាជ្ញាធរមានសមត្ថកិច្ចបាន និងកំពុងតែស្រាវជ្រាវរកបុគ្គលទាំងពីរនាក់នេះ ហើយលទ្ធផលតេស្តរបស់ពួកគាត់ទាំងពីរនាក់ គឺអវិជ្ជមានវីរុសកូវីដ-១៩ ដែលតម្រូវឲ្យបន្តធ្វើចត្តាឡីស័កបន្តទៀត»។
ក្រសួងសុខាភិបាល កាលពីថ្ងៃទី២៨ ខែសីហា ឆ្នាំ២០២០ ធ្លាប់បានចេញលិខិតណែនាំដល់អភិបាលរាជធានី-ខេត្តទាំងអស់ ត្រូវដាក់កម្លាំងសមត្ថកិច្ចយាមកាមឱ្យបានម៉ត់ចត់ ដើម្បីពង្រឹងសន្តិសុខ និងសណ្ដាប់ធ្នាប់ នៅតាមមណ្ឌលចត្តាឡីស័កទាំងអស់នៅទូទាំងប្រទេស ជាពិសេសកុំឱ្យអ្នកកំពុងធ្វើចត្តាឡីស័ក រត់ចេញពីមណ្ឌលចត្តាឡីស័ក មុនកាលកំណត់។
លិខិតរបស់ក្រសួង បានបញ្ជាក់ដែរថា ប្រសិនបើមានបុគ្គលណា មិនអនុវត្តតាមវិធានការចត្តាឡីស័ករបស់ក្រសួងសុខាភិបាល សមត្ថកិច្ចគ្រប់ជាន់ថ្នាក់ ត្រូវអនុវត្តច្បាប់និងបទដ្ឋានគតិយុត្តដែលមានជាធរមាន។
កាលពីថ្ងៃទី១៦ ខែសីហា ជនជាតិវៀតណាមពីរនាក់ ក៏បានលួចចេញពីការធ្វើចត្តាឡីស័កនៅក្នុងមន្ទីរពេទ្យបង្អែកព្រះស្តេច ខេត្តព្រៃវែង ទៅកាន់ខេត្តកំពង់ឆ្នាំង ប៉ុន្តែក្រសួងបានរកឃើញវិញ និងតម្រូវឱ្យពួកគេធ្វើចត្តាឡីស័កឡើងវិញនៅថ្ងៃដដែលនោះ។
កាលពីថ្ងៃទី៣ ខែសីហា មានបុរសខ្មែរពីរនាក់ដែលបន្តជើងហោះហើរមកពីប្រទេសម៉ាឡេស៊ី បានរត់ចេញពីមណ្ឌលចត្តាឡីស័កនៅវិទ្យាល័យ ហ៊ុន សែន កំពង់លាវ ខេត្តព្រៃវែង ដែរ ប៉ុន្តែត្រូវបានអាជ្ញាធរខេត្តរកឃើញនៅផ្ទះរបស់ពួកគេនៅយប់ថ្ងៃដដែលនោះ។ ទោះយ៉ាងណា ពួកគេពុំត្រូវបានពិន័យជាប្រាក់នោះទេ ដោយសារជីវភាពក្រីក្រ ប៉ុន្តែក្រុមការងារក្រសួងបានតម្រូវឱ្យពួកគេធ្វើចត្តាឡីស័កឡើងវិញ១៤ថ្ងៃ។
ដោយឡែក កាលពីថ្ងៃទី១៧ ខែកក្កដា ក៏មានស្ត្រីខ្មែរសញ្ជាតិអាមេរិកម្នាក់ទៀត ធ្លាប់បានរត់ចេញពីមណ្ឌលចត្តាឡីស័កនៅសណ្ឋាគារមួយក្នុងរាជធានីភ្នំពេញនិងត្រូវបានមន្ត្រីសុខាភិបាលរកឃើញវិញនៅខេត្តកំពង់ចាម ហើយស្ត្រីរូបនោះត្រូវបានមន្ត្រីសុខាភិបាលខេត្តសម្រេចផាកពិន័យអន្តរការណ៍ចំនួន១លានរៀល៕
