សាលាខេត្តបាត់ដំបងព្រមានចាត់វិធានការច្បាប់លើប្រជាពលរដ្ឋ ដែលអាជ្ញាធរខេត្តនេះចោទថា ទន្ទ្រានយកដីរបស់រដ្ឋធ្វើជាកម្មសិទ្ធិខុសច្បាប់ក្នុងតំបន់ការពារធម្មជាតិ ស្ថិតនៅស្រុកសំឡូត។
ក្នុងលិខិតជូនដំណឹងរបស់ខ្លួនចេញផ្សាយកាលពីម្សិលមិញនេះ រដ្ឋបាលខេត្តបាត់ដំបងបាននិយាយថា ក្រុមការងារក្រសួងបរិស្ថាននិងក្រុមការងារចម្រុះខេត្ត កំពុងចុះធ្វើអត្តសញ្ញាណកម្មមនុស្សនិងអត្តសញ្ញាណកម្មដី ស្ថិតនៅភូមិសាស្ត្រស្រុកសំឡូត។
រដ្ឋបាលខេត្តនេះបញ្ជាក់ថា ខ្លួនបានរកឃើញប្រជាពលរដ្ឋមួយចំនួនបានបន្តទន្ទ្រានដីព្រៃថ្មីបន្ថែមទៀត តាមរយៈការឈូសឆាយពង្រីក ការកាប់រាន ឬការតាំងទីលំនៅថ្មីមិនស្របច្បាប់ ក្នុងតំបន់ការពារធម្មជាតិ នៃដែនជម្រកសត្វព្រៃភ្នំសំកុស និងតំបន់ប្រើប្រាស់ច្រើនយ៉ាងសំឡូត ស្ថិតនៅក្នុងភូមិសាស្ត្រស្រុកសំឡូត។
រដ្ឋបាលខេត្តបាត់ដំបង ចាត់ទុកទង្វើរបស់ប្រជាពលរដ្ឋទន្ទ្រានយកដីរដ្ឋខុសច្បាប់ និងព្រមានចាត់វិធានការរឹបអូសសម្ភារ គ្រឿងចក្រ ឬរុះរើលំនៅឋានថ្មីរបស់ប្រជាពលរដ្ឋដែលកំពុងតាំងទីលំនៅ ស្ថិតក្នុងភូមិសាស្ត្រស្រុកសំឡូត។
លិខិតសាលាខេត្តបាត់ដំបងព្រមានថា៖ «ករណី[ពលរដ្ឋ]បំពានលើសេចក្តីជូនដំណឹងនេះ នឹងត្រូវបញ្ជូនសំណុំរឿងទៅតុលាការ ដើម្បីចាត់ការតាមនីតិវិធីច្បាប់»។
សាលាខេត្តបាត់ដំបង ក៏ជូនដំណឹងទៅអាជ្ញាធរមូលដ្ឋាន កុំធ្វើលិខិតបញ្ជាក់ទីលំនៅនិងដីធ្លីជូនប្រជាពលរដ្ឋ ស្ថិតនៅក្នុងតំបន់ការពារធម្មជាតិ នៃដែនជម្រកសត្វព្រៃភ្នំសំកុស និងតំបន់ប្រើប្រាស់ច្រើនយ៉ាងសំឡូតនោះផងដែរ។
បន្ថែមពីនេះ សាលាខេត្តបាត់ដំបង អះអាងថា មិនទទួលស្គាល់ទិន្នន័យទាំងឡាយណាដែលកើតចេញដោយសារការរុករានថ្មីនោះឡើយ។
អភិបាលខេត្តបាត់ដំបង លោក ងួន រតនៈ ប្រាប់បន្ថែមថា ក្រុមការងារខេត្តកំពុងសហការជាមួយមន្ត្រីបរិស្ថាន ដើម្បីកំណត់អត្តសញ្ញាណគ្រួសារនិងអត្តសញ្ញាណដី ដើម្បីងាយស្រួលកាត់ឆ្វៀលដីផ្តល់ប្លង់កម្មសិទ្ធិជូនប្រជាពលរដ្ឋឱ្យស្របតាមគោលការណ៍របស់រដ្ឋាភិបាល។
លោក ងួន រតនៈ ប្រាប់ថា៖ «បទបញ្ជារបស់សម្តេចឱ្យឆ្វៀលដីណាដែលគាត់អាស្រ័យផល យើងឆ្វៀលឱ្យ។ មានបងប្អូនមួយចំនួនអត់បានអាស្រ័យផលទេ គាត់ចង់ទៅទន្ទ្រាន ហើយគាត់បង្ហាញថា គាត់អាស្រ័យផលដែរ។ អ៊ីចឹង យើងជូនដំណឹងកុំឱ្យគាត់កាប់ឆ្ការ ដើម្បកុំឱ្យខុសគោលការណ៍»។
នៅពេលត្រូវបានសាកសួរថា តើមានដីតំបន់ការពារប៉ុន្មានហិកតាត្រូវបានប្រជាពលរដ្ឋកាប់ឆ្ការទន្ទ្រានយកនោះ អភិបាលខេត្តរូបនេះ ប្រាប់ថា អាជ្ញាធរខេត្តមិនទាន់មានតួលេខច្បាស់លាស់នៅឡើយទេ ហើយលោកថា កិច្ចការនេះកំពុងស្ថិតក្រោមមន្ត្រីនៃមន្ទីរបរិស្ថានខេត្ត។
ប្រធានមន្ទីរបរិស្ថានប្រចាំខេត្តបាត់ដំបង លោក កត បូរ៉ាន ប្រាប់ថា បច្ចុប្បន្ននេះ មន្ត្រីជំនាញបានសហការជាមួយអាជ្ញាធរពាក់ព័ន្ធ ដើម្បីស្រាវជ្រាវពីអត្តសញ្ញាណកម្មគ្រួសារនិងអត្តសញ្ញាណកម្មដីនៅតំបន់អភិរក្ស ស្ថិតនៅក្នុងឃុំសំឡូតនិងឃុំតាសោក បានចំនួនជាង៦ពាន់ក្បាលដីនិងជាង ២ពាន់គ្រួសារ ពោលបានពាក់កណ្តាល ដើម្បីងាយស្រួលកាត់ឆ្វៀលដីជូនប្រជាពលរដ្ឋ។ ប៉ុន្តែលោកថា នៅពេលចុះស្រាវជ្រាវ អាជ្ញាធរបានរកឃើញពលរដ្ឋមួយចំនួនបានយកបង្គោលបោះលើដីព្រៃបន្ថែម លើសដីកំពុងអាស្រ័យផល ដែលខុសពីគោលការណ៍របស់រដ្ឋាភិបាល។
លោក កត បូរ៉ាន ប្រាប់ថា៖ «ពួកគាត់ធ្វើខុសការណែនាំរបស់គោលការណ៍សម្តេច [ហ៊ុន សែន] ហើយយើងកំពុងសិក្សារឿងហ្នឹងបន្តទៀត»។
កាលពីខែកក្កដាកន្លងមក ឧកញ៉ា សន ថន ត្រូវបានសមត្ថកិច្ចចាប់ខ្លួននិងចោទប្រកាន់ពីបទផ្ដើមគំនិតក្នុងបទបំផ្លាញដោយចេតនា និងកេងបំបាត់ដោយទុច្ចរិត និងបទសូកប៉ាន់ ហើយអភិបាលរងខេត្តបាត់ដំបង លោក ស៊ូ អារ៉ាហ្វាត់ ត្រូវបានចោទប្រកាន់ពីបទបំផ្លាញដោយចេតនា និងបទកេងបំបាត់ដោយទុច្ចរិត និងបទស៊ីសំណូកពាក់ព័ន្ធនឹងជម្លោះដីធ្លីនៅស្រុកគាស់ក្រឡ ខេត្តបាត់ដំបង។
មន្ត្រីអង្កេតរបស់អង្គការអាដហុកប្រចំាខេត្តបាត់ដំបង លោក យិន ម៉េងលី ប្រាប់ថា អាជ្ញាធរពាក់ព័ន្ធត្រូវចុះស្រាវជ្រាវឱ្យបានគ្រប់ជ្រុងជ្រោយ រកអ្នកមានអំណាចនៅពីក្រោយការឈូសឆាយដីនោះ មុនធ្វើការកាត់ឆ្វៀលដីនិងចោទប្រកាន់លើប្រជាពលរដ្ឋ។
លោក យិន ម៉េងលី ប្រាប់ថា៖ «អាជ្ញាធរត្រូវធ្វើការត្រួតពិនិត្យឱ្យបានច្បាស់លាស់ឡើងវិញពីបញ្ហានេះ។ ខ្ញុំទទួលបានព័ត៌មានថា មានអ្នកនៅពីក្រោយខ្នង ឱ្យប្រជាពលរដ្ឋទៅកាប់ឆ្ការ [ដីព្រៃ] ហើយឱ្យប្រជាពលរដ្ឋគ្រាន់តែបានទទួលឈ្នួលទេ ហើយអ្នកមានអំណាចនៅពីក្រោយខ្នងនៅក្នុងរឿងហ្នឹងដែលមិនចេញមុខ។ ពេលមានបញ្ហាប៉ះពាល់ជាមួយប្រជាពលរដ្ឋ ចេះតែចោទ ចេះតែលាបពណ៌ដល់ប្រជាពលរដ្ឋ។ យើងត្រូវធ្វើការអង្កេតវែកញែកឱ្យបានច្បាស់លាស់»។
ឆ្លើយតបនឹងបញ្ហានេះ លោក បូរ៉ាន ប្រាប់ថា ក្រុមមន្ត្រីជំនាញនឹងសហការជាមួយស្ថាប័នពាក់ព័ន្ធ ដើម្បីស្រាវជ្រាវនិងចាត់វិធានការលើអ្នកដែលប្រព្រឹត្តខុសច្បាប់និងផ្ទុយពីគោលការណ៍រដ្ឋាភិបាល។
លោក កត បូរ៉ាន ប្រាប់ថា៖ «ពួកគាត់ធ្វើខុសតាមការណែនាំរបស់គោលការណ៍សម្តេច [ហ៊ុន សែន] ហើយយើងកំពុងសិក្សារឿងហ្នឹងបន្តទៀត! [ប្រសិនបើរកឃើញមន្ត្រីណាដែលនៅពីក្រោយឱ្យពលរដ្ឋឈូសឆាយដីព្រៃបន្ថែមទៀតនោះ តើអាជ្ញាធរនឹងចាត់វិធានការដូចម្តេច?] យើងចាត់ការផ្លូវច្បាប់ហើយ មិនទុកទេ»៕
