សមត្ថកិច្ចខេត្តបន្ទាយមានជ័យ បានចាប់ឃាត់ខ្លួនបុរសម្នាក់ពេលដែលរូបគាត់កំពុងឡាយផ្ទាល់(Facebook Live) ពាក់ព័ន្ធរឿងអាជីវករប្រមូលផ្តុំគ្នាដើរហែក្បួនទាមទារឱ្យបើកច្រកទ្វារអន្តរជាតិប៉ោយប៉ែតឡើងវិញ។
នៅព្រឹកថ្ងៃព្រហស្បតិ៍នេះ អាជីវករប្រមាណ៣០នាក់ បានប្រមូលផ្តុំគ្នាតវ៉ានៅម្តុំផ្សារត្រី ក្រុងប៉ោយប៉ែត ទាមទារឱ្យអាជ្ញាធរបើកច្រកអន្តរជាតិកម្ពុជា-ថៃ (ប៉ោយប៉ែត) ឡើងវិញ ដើម្បីឱ្យពួកគាត់បានប្រកបរបរចិញ្ចឹមជីវិត ក្រោយពីច្រកទ្វារនេះបានបិទជាច្រើនខែអំឡុងពេលមានវិបត្តិជំងឺកូវីដ១៩។
មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ចាន់គា ដែលតាមដានការតវ៉ានេះ ប្រាប់វីអូឌីថា ក្នុងអំឡុងពេលប្រមូលផ្តុំនោះ សមត្ថកិច្ចខេត្តបន្ទាយមានជ័យ បានចាប់ខ្លួនអាជីវករម្នាក់ឈ្មោះ ស៊ីម វណ្ណៈ អាយុ២៦ឆ្នាំ និងដកទូរសព្ទដៃពីរគ្រឿង របស់លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ខណៈពួកគេកំពុងថតសកម្មភាពតវ៉ានោះ។
លោកមានប្រសាសន៍ថា៖ «ព្រឹកមិញ ពួកគាត់បាតុកម្ម គោលបំណងរបស់គាត់សុំឱ្យអាជ្ញាធរបើកច្រក [ប៉ោយប៉ែត] ឡើងវិញ សមត្ថកិច្ចឃាត់ខ្លួនមនុស្សម្នាក់ ដកទូរសព្ទពីលោក ឌិន ពុទ្ធី អស់ពីរគ្រឿង ហើយសមត្ថកិច្ចនិយាយថា ថតដោយគ្មានការអនុញ្ញាត ព្រោះអ្នកឯងមិនមែនជាអ្នកសារព័ត៌មាន។ បើអ្នកឯងជាអ្នកសារព័ត៌មាន បានឱ្យថត»។
មន្ត្រីសិទ្ធិមនុស្សរូបនោះបញ្ជាក់ថា បច្ចុប្បន្ននេះ សមត្ថកិច្ចបានបញ្ជូនអាជីវករម្នាក់នោះទៅអធិការដ្ឋាននគរបាលក្រុងប៉ោយប៉ែត ដើម្បីសាកសួរ។
ក្នុងការប្រមូលផ្តុំតវ៉ានោះ អាជីវករបានពាក់អាវដែលមានសរសេរសារថា «អរគុណសន្តិភាព ខ្ញុំសុំរស់ផង»។
វីអូឌី មិនអាចសុំការបំភ្លឺពីអធិការនគរបាលក្រុងប៉ោយប៉ែត លោក ធិន ស៊ិនដេត និងអភិបាលរងក្រុងប៉ោយប៉ែត លោក កែវ តារារស្មី បានទេនៅព្រឹកនេះ។
សេចក្តីជូនដំណឹងរបស់ស្ថានអគ្គកុងស៊ុលកម្ពុជាប្រចាំខេត្តស្រះកែវ កាលពីចុងខែមីនា ឆ្នាំ២០២០នេះ បានឱ្យដឹងថា កម្ពុជា-ថៃ សម្រេចបិទច្រកព្រំដែនអន្តរជាតិនិងច្រកទ្វារទាំងអស់នៃប្រទេសទាំងពីរជាបណ្តោះអាសន្ន ដើម្បីទប់ស្កាត់ការរីករាលដាលនៃជំងឺកូវីដ-១៩។ ច្រកទ្វារអន្តរជាតិនិងច្រកទ្វារតំបន់រវាងកម្ពុជា-ថៃ មានចំនួន២៤ច្រក៕
