សាលាឧទ្ធរណ៍រាជធានីភ្នំពេញ សម្រេចច្រានចោលបណ្ដឹងសុំនៅក្រៅឃុំរបស់មេធាវីការពារក្ដីសកម្មជនបក្សប្រឆាំងពីររូប ដោយសម្អាងថា ដើម្បីរក្សាជនត្រូវចោទទុកជូនតុលាការចាត់ការតាមនីតិវិធីច្បាប់។
សហមេធាវីការពារក្ដីឱ្យអតីតសកម្មជនបក្សប្រឆាំង លោក ឡោ ជុនធី ប្រាប់វីអូឌីថា បន្ទាប់ពីសវនាការសួរដេញដោលនៅព្រឹកមិញនេះ ក្រុមប្រឹក្សាជំនុំជម្រះនៃសាលាឧទ្ធរណ៍ លោក លាង សំណាត់ បានសម្រេចមិនអនុញ្ញាតឱ្យកូនក្ដីរបស់លោកនៅក្រៅឃុំបណ្ដោះអាសន្ននោះទេ។
លោកថា៖ «គេតម្កល់ គេខ្លាចប៉ះពាល់ដល់ការស៊ើបអង្កេត ប៉ះពាល់សាក្សីហ្នឹង ម៉េចៗយើងប្ដឹងសាទុក្ខបន្តទៀត ឱ្យតុលាការកំពូលពិនិត្យមើល តើការសម្រេចហ្នឹង វាសមហេតុផលទេ»។
លោក ឡោ ជុនធី បានបញ្ជាក់ដែរថា ក្នុងសវនាការព្រឹកមិញនេះ តុលាការមិនបានយកកូនក្ដីរបស់លោកមកចូលរួមសួរដេញដោលនោះទេ។
វីអូឌី មិនអាចសុំការបញ្ជាក់ពីក្រុមប្រឹក្សាជំនុំជម្រះនៃសាលាឧទ្ធរណ៍ លោក លាង សំណាត់ បានទេនៅថ្ងៃសុក្រនេះ។
អតីតសមាជិកក្រុមប្រឹក្សាស្រុកបវេលមកពីគណបក្សសង្គ្រោះជាតិ លោក លាស់ ឆេងឡាយ និងមេឃុំឃ្លាំងមាស ស្រុកបវេល លោក អ៊ុក ឆុំ ត្រូវបានសមត្ថកិច្ចចាប់ខ្លួនកាលពីថ្ងៃទី១០ ខែកក្កដា ឆ្នាំ២០២០ ខណៈដែលពួកគេកំពុងធ្វើការងារនៅផ្ទះ។ សមត្ថកិច្ចបានបញ្ជូនអ្នកទាំងពីរមកឃុំខ្លួននៅពន្ធនាគាររាជធានីភ្នំពេញ ក្រោមបទចោទ «ញុះញង់ឱ្យប្រព្រឹត្តអំពើដែលបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ខណៈដែលតុលាការកំពុងសវនាការនាព្រឹកថ្ងៃសុក្រនេះ ក្រុមគ្រួសាររបស់អតីតសកម្មជនបក្សប្រឆាំងជិត២០នាក់ បាននាំគ្នាប្រមូលផ្ដុំនៅមុខសាលាឧទ្ធរណ៍ ដើម្បីទាមទារឱ្យដោះលែងនិងទម្លាក់បទចោទប្រកាន់លើគ្រួសាររបស់ពួកគេ។
ភរិយាលោក លាស់ ឆេងឡាយ គឺអ្នកស្រី ឡេង ឡី បានបង្ហាញការសោកស្តាយដែលតុលាការ មិនអនុញ្ញាតឱ្យប្ដីរបស់គាត់នៅក្រៅឃុំ។ អ្នកស្រីចាត់ទុកការចាប់ឃុំខ្លួនប្ដីរបស់គាត់និងអតីតសកម្មជនបក្សសង្គ្រោះជាតិដទៃទៀត ថាជារឿងអយុត្តិធម៌សម្រាប់ក្រុមគ្រួសាររបស់ពួកគាត់។
អ្នកស្រីថា៖ «យើងអត់មានបានធ្វើអីខុសសោះ បើខុសក៏ខ្ញុំមិនថាដែរ គាត់នៅតែចម្ការសោះ អត់មានបានទៅធ្វើអី អត់មានទៅញុះញង់ជួបជុំគ្នាបង្ក អត់មានទាំងអស់។ នៅធ្វើចម្ការ ឡើងមកផ្ទះមើលប្អូនឈឺ គេចាប់ហ្នឹង»។
ចាប់តាំងពីដើមឆ្នាំ២០២០មក មានសកម្មជនបក្សប្រឆាំងចំនួន២៣នាក់ហើយដែលអាជ្ញាធរបានចាប់ខ្លួន ក្នុងនោះមនុស្ស១៥នាក់ត្រូវបានដាក់ឃុំនៅពន្ធនាគារព្រៃស។ មន្ត្រីគណបក្សប្រឆាំងទាំងនោះ ត្រូវបានចោទប្រកាន់ដូចៗគ្នាពីបទ «រួមគំនិតក្បត់ ញុះញង់កុំឱ្យយោធិនស្ដាប់បង្គាប់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍»៕
