ក្រសួងមហាផ្ទៃសម្រេចតែងតាំងស្នងការនគរបាលថ្មី សម្រាប់គ្រប់គ្រងកម្លាំងនគរបាលនៅក្នុងខេត្តកំពង់ធំ បន្ទាប់ពីស្នងការនគរបាលមុនត្រូវបានដកចេញពីតំណែងដោយរងការចោទថា បៀតបៀនកេរ្តិ៍ខ្មាស់មន្ត្រីនគរបាលជាស្ត្រីស្ថិតនៅក្រោមការគ្រប់គ្រងរបស់ខ្លួន។
លិខិតរបស់លោក ស ខេង រដ្ឋមន្ត្រីក្រសួងមហាផ្ទៃចុះថ្ងៃទី៧ខែកញ្ញាឆ្នាំ២០២០ បានបញ្ជាក់ថា លោក ម៉ែន លី ស្នងការនៃស្នងការដ្ឋាននគរបាលខេត្តឧត្តរមានជ័យ ផ្ទេរទៅជាស្នងការនៃស្នងការដ្ឋាននគរបាលខេត្តកំពង់ធំវិញ។
ចំណែកលោក ហួត សុធី ជាស្នងការរងទទួលបន្ទុកផែនការងារសន្តិសុខនៃស្នងការដ្ឋានខេត្តសៀមរាបផ្ទេរទៅជាស្នងការនៃស្នងការដ្ឋានខេត្តឧត្តរមានជ័យវិញ។
កាលពីខែសីហា ឆ្នាំ២០២០ ក្រសួងមហាផ្ទៃបានចាត់ក្រុមមន្ត្រីជំនាញស៊ើបអង្កេតលើលោក អ៊ុក កុសល អតីតស្នងការខេត្តកំពង់ធំដែលរងការចោទថា បានបៀតបៀនកេរ្តិ៍ខ្មាស់មន្ត្រីនគរបាលជាស្ត្រីដែលស្ថិតនៅក្រោមការគ្រប់គ្រងរបស់ខ្លួន។
ក្រោយមកក៏សម្រេចដកតួនាទី និងបន្ថយឋានន្តរសក្តិពីថ្នាក់ឧត្តមសេនីយ៍ទោ(ផ្កាយ២)មកត្រឹមវរសេនីយ៍ឯក(សក្តិ៥)វិញ ក្រោយពីរកឃើញថា មន្ត្រីរូបនេះ ពិតជាបានបៀតបៀនកេរ្តិ៍ខ្មាស់នគរបាលជាស្ត្រីនៅក្រោមការគ្រប់គ្រងរបស់ខ្លួនមែន៕
វីអូឌី សូមកែតម្រូវកឋាខណ្ឌទី២៖ «លិខិតរបស់លោក ស ខេង រដ្ឋមន្ត្រីក្រសួងមហាផ្ទៃចុះថ្ងៃទី៧ខែកញ្ញាឆ្នាំ២០២០ បានបញ្ជាក់ថា លោក ម៉ែន លី ស្នងការនៃស្នងការដ្ឋាននគរបាលខេត្តបន្ទាយមានជ័យ…»។ ខ្លឹមសារដែលត្រឹមត្រូវគឺ៖ «លិខិតរបស់លោក ស ខេង រដ្ឋមន្ត្រីក្រសួងមហាផ្ទៃចុះថ្ងៃទី៧ខែកញ្ញាឆ្នាំ២០២០ បានបញ្ជាក់ថា លោក ម៉ែន លី ស្នងការនៃស្នងការដ្ឋាននគរបាលខេត្តឧត្តរមានជ័យ…»។
