គណៈកម្មាធិការប្រយុទ្ធប្រឆាំងផលិតផលក្លែងក្លាយ បានប្រកាសចាត់វិធានការតឹងរឹងលើការលក់ផលិតផលក្លែងក្លាយ និងខុសច្បាប់ តាមប្រព័ន្ធអនឡាញ ខណៈរបាយការណ៍បញ្ជាក់ថា ការបង្ក្រាបផលិតផលក្លែងក្លាយដែលចរាចរលក់លើទីផ្សារនៅកម្ពុជាមានការកើនឡើង។
ការប្រកាសនេះ បានធ្វើឡើងនៅក្នុងសន្និសីទសារព័ត៌មាន ស្ដីពី ការចុះបង្ក្រាប និងរឹបអូសបានផលិតផល ដែលហាមឃាត់ ក្លែងក្លាយ អន់គុណភាព ផុតសុពលភាព និងខុសច្បាប់ ដូចជា ផលិតផលស៊ីហ្សា បារីអេឡិចត្រូនិច ភេសជ្ជៈ ឱសថ និងផលិតផលផ្សេងៗទៀត សរុបប្រមាណជាង ៥០០តោន កាលពីរសៀលថ្ងៃទី១៥ ខែកញ្ញា ឆ្នាំ២០២០ នៅក្រសួងមហាផ្ទៃ។
ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀច សុផាន់ណា បានថ្លែងក្នុងសន្និសីទនោះថា នៅដើមឆ្នាំ២០២០នេះ សមត្ថកិច្ចជំនាញ បានបង្ក្រាបផលិតផលក្លែងក្លាយ អន់គុណភាព ផុតសុពលភាព និងខុសច្បាប់ បានជាង៥៣០តោន ដូចជា ផលិតផលស៊ីហ្សា បារីអេឡិចត្រូនិច ភេសជ្ជៈ ឱសថ និងផលិតផលផ្សេងៗទៀត នៅរាជធានីភ្នំពេញ ខេត្តកណ្តាល សៀមរាប បន្ទាយមានជ័យ និងបណ្តារខេត្តមួយចំនួនទៀត ។
លោកបន្តថា៖ «យើងនឹងបំផ្លាញ[ផលិតផលក្លែងក្លាយ និងខុសច្បាប់]ក្នុងពេលឆាប់ៗនេះ ហើយនៅមានករណីដែលកំពុងតែបន្តដំណើរការនីតិវិធីនៅតុលាការ ប្រហែលរាប់រយតោនទៀត។ ចាប់ឃុំឃាំងអ្នកដែលប្រព្រឹត្តបទល្មើសជាង ២៨នាក់ ចំនួនករណីមានការឡើង និងចំនួនជនល្មើសដែលយើងចាប់បានផងដែរ»។
លោកបន្ថែមថា៖«ក្នុងរយៈពេលក្រោយនេះ យើងបានបង្កើនសកម្មភាពយ៉ាងច្រើន…យើងចាប់បានជនដៃដល់ បញ្ជូនទៅតុលាការ ហើយមានអ្នកខ្លះក៏កាត់ទោស ជាប់ពន្ធនាគារ អ្នកខ្លះក៏កាត់ទោសឲ្យស្ថិតនៅក្រោមការត្រួតពិនិត្យរបស់តុលាការ អ្នកខ្លះទៀតក៏ត្រូវបានផាកពិន័យ មួយចំនួនត្រៀមនឹងបណ្តេញចេញផងដែរ គឺជនបរទេសមួយចំនួនទៀត តាមច្បាប់ប្រឆាំងផលិតផលក្លែងក្លាយ និងច្បាប់អន្តោប្រវេសន៍»។
លោក មៀច សុផាន់ណា បានឱ្យដឹងទៀតថា សមត្ថកិច្ចប្រយុទ្ធប្រឆាំងផលិតផលក្លែងក្លាយ ក៏នឹងចាប់ផ្តើមបង្ក្រាបទៅការលក់ផលិតផលក្លែងក្លាយតាមប្រព័ន្ធអនឡាញផងដែរ បន្ទាប់ពីពិធីបុណ្យភ្ជុំបិណ្ឌរួច ដោយសារតែជនខិលខូចមួយចំនួនបាន លក់ផលិតផលក្លែងក្លាយ ដែលអាចធ្វើឱ្យប៉ះពាល់ដល់សុខភាពរបស់ប្រជាពលរដ្ឋ។
លោកបានបញ្ជាក់ថា៖ «អ្នកជំនួញគាត់ប្រើឱកាស ដោយប្រើប្រាស់បណ្តាញសង្គម និងបណ្តាញអនឡាញ ដើម្បីលក់ផលិតផលរបស់គាត់ ប៉ុន្តែចំណុចផ្តេសផ្តាស់ នោះគឺគាត់បំប៉ោងពីគុណភាព ខ្លះគឺឆ្លៀតឱកាសលក់របស់ដែលក្លែងក្លាយ បើគាត់លក់របស់ពិតប្រាកដ វាការល្អណាស់។ រឿងអាក្រក់គឺគាត់ភូត និងគាត់បំប៉ោងពីគុណភាពទំនិញ ឬគាត់បោកអតិថិជនតែម្តងដូចជារឿងថ្នាំ កែរសម្ភស្ស គ្រឿងសម្អាង ទឹកអប់មួយដបរបស់គេ[ផលិតផលពិត] គេលក់១០០ដុល្លារ តែគាត់លក់តែ៥ដុល្លារឬ២០ដុល្លារជាដើម»។
លោកមៀច សុផាន់ណា បានបន្តទៀតថា មន្ត្រីជំនាញរបស់គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ក៏បានសហការជាមួយនាយកដ្ឋានប្រឆាំងបទល្មើសបច្ចេកវិទ្យា និងសមត្ថកិច្ចជំនាញពាក់ព័ន្ធ រួមនិងម្ចាស់ផលិតផលដើម ដើម្បីធ្វើការស្រាវជ្រាវរកប្រភពអ្នកលក់ផលិតផលក្លែងក្លាយតាមអនឡាញនេះផងដែរ ដើម្បីចាត់វិធានការផ្លូវច្បាប់ទៅលើជនល្មើសទាំងនោះ។
លោកថា៖ «តាមរបាយការណ៍ មាន១០ករណី ដែលយើងប្រមូលព័ត៌មានគ្រប់គ្រាន់ ហើយយើងនឹងចាប់ផ្តើមការងារបង្ក្រាបបន្ទាប់ពីបុណ្យភ្ជុំបិណ្ឌ»។
តែយ៉ាងណា មន្ត្រីរូបនេះ ពុំបានបញ្ជាក់ពីរបាយការណ៍លទ្ធផលដែលគណៈកម្មាធិការជាតិ បានបង្ក្រាបបទល្មើសផលិតផលក្លែងក្លាយ បន្លំគុណភាព ខូចគុណភាព ផុតសុពលភាព និងផលិតផលខុសច្បាប់ ក្នុងរយៈពេល ៨ខែដើមឆ្នាំនេះទេ ដោយគ្រាន់តែបញ្ជាក់ថា ការបង្ក្រាបមានការកើនឡើង។
មន្ត្រីរូបនោះ បានអះអាងថា កន្លងមក អាជ្ញាធរមានសមត្ថកិច្ច មានការលំបាកក្នុងការបង្ក្រាបជនល្មើសដែលចែកចាយផលិតផលក្លែងក្លាយទាំងនោះ ដោយសារតែជនល្មើសមានការយល់ដឹង និងមានល្បិចខ្ពស់ ខណៈផលិតផលថ្មីៗបន្តចេញជាហូរហែរ ដែលទាមទារឱ្យអាជ្ញាធរមានសមត្ថកិច្ច ត្រូវពង្រឹងសមត្ថភាព និងចំណេះដឹងបន្ថែម ដើម្បីធ្វើការបង្ក្រាបបទល្មើសឱ្យកាន់តែមានប្រសិទ្ធភាព។
លោកបានបន្ថែមថា៖ «កន្លងមកនេះ ដោយសារតែមូលហេតុខ្លះ ករណីធំៗខ្លះ គឺមេក្លោងដែលចែកចាយ ឬក៏ផលិត មិនបានមានវត្តមាននៅក្នុងប្រទេសកម្ពុជាទេ គឺគេធ្វើតាមរយៈជួលកម្មករខ្មែរ ជួលមេការខ្មែរ ដើម្បីឱ្យមើលការខុសត្រូវ មុខរបរជំនួញ ឬរោងចក្ររបស់គេ ដែលធ្វើឱ្យអាជ្ញាធរមានសមត្ថកិច្ចជួបបញ្ហាលំបាកក្នុងការបង្ក្រាប»។
កាលពីថ្ងៃទី១៣ ខែកញ្ញាថ្មីៗនេះ សមត្ថកិច្ចចម្រុះ ដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ បានចុះបង្ក្រាបទីតាំងផលិតឡេក្លែងក្លាយមួយកន្លែង ស្ថិតនៅមុខវិទ្យាល័យទួលអំពិល ភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ដោយបានឃាត់ខ្លួនមនុស្សចំនួន៤នាក់ដើម្បីសាកសួរ ខណៈម្ចាស់ទីតាំងឈ្មោះ វីង ជីហេង បានរត់គេចខ្លួនមុនសមត្ថកិច្ចចុះបង្ក្រាប។
បើតាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយហើយដុតបំផ្លាញចោលបន្តបន្ទាប់ដែលមានជាង២០០តោន ខណៈនៅដើមឆ្នាំ២០១៩នេះ សមត្ថកិច្ចក៏បានចុះបង្រ្កាបបានទំនិញក្លែងក្លាយរាប់រយតោនផងដែរ៕
