ក្រសួងសុខាភិបាលភិបាលបានព្យាបាលអ្នកឆ្លងជំងឺផ្តាសាយធំនៅក្នុង៨ខេត្ត បានជាសះស្បើយជិត៦០០អង្គ/នាក់ ខណៈ៥៧នាក់ទៀតជាអ្នកទោសត្រូវបានដាក់ឲ្យសម្រាកព្យាបាលនៅមន្ទីរពេទ្យខេត្តកំពង់ធំ។
ក្នុងលិខិតរបស់ក្រសួងសុខាភិបាលចេញផ្សាយកាលពីថ្ងៃទី១៨ ខែកញ្ញាថា មុនពេល កំឡុងពេលកាន់បិណ្ឌ និងភ្ជុំបិណ្ឌ ចាប់ពីថ្ងៃទី១៥ ខែសីហា ដល់ថ្ងៃ១៨ ខែកញ្ញា ឆ្នាំ២០២០នេះ ក្រសួងសុខាសង្កេតឃើញមានចម្លងជំងឺគ្រុនផ្តាសាយធំ ដែលភាសាបច្ចេកទេសពេទ្យហៅថា «Influenza A» ចំនួន៦៤២នាក់ នៅក្នុងខេត្តចំនួន៨ និងព្យាបាលជាសះស្បើយចំនួន៧ខេត្ត គឺមានចំនួន៥៧៥អង្គ/នាក់ (ស្ត្រី៧២នាក់) ខណៈ៥៧នាក់ទៀតជាអ្នកទោស ត្រូវបានដាក់ឲ្យសម្រាកព្យាបាលនៅមន្ទីរសុខាភិបាលខេត្តកំពង់ធំ។
ខេត្តទាំង៨ដែលមានអ្នកឆ្លងជំងឺគ្រុនផ្តាសាយធំរួមមាន ខេត្តតាកែវ ព្រះវិហារ បាត់ដំបង ត្បូងឃ្មុំ បន្ទាយមានជ័យ កោះកុង រតនគិរី និងខេត្តកំពង់ធំ។
លិខិតដដែលបានអំពាវនាវឲ្យប្រជាពលរដ្ឋ ព្រះសង្ឃ តាអាចារយ្យ យាយជី និងគណៈកម្មការវត្តទាំងអស់នៅទូទាំងប្រទេសចូលរួមអនាម័យខ្លួនប្រាណ កន្លែងរស់នៅ នៅពេលទៅទីប្រជុំជន វត្តអារាម ត្រូវពាក់ម៉ាស់ ប្រើកន្សែង ឬក្រម៉ា ហើយពេលក្អកឬកណ្តាសត្រូវខ្ទប់មាត់ និងច្រមុះ ឬកែងដៃ ហើយត្រូវរក្សាគម្លាតពីគ្នាពី១ម៉ែត្រកន្លះឡើងទៅ និងជៀសវៀងប៉ះពាល់សត្វបំប៉ៅកូនដោយទឹកដោះ ឬសត្វបក្សី ដោយផ្ទាល់ ត្រូវលាងដៃជាមួយសាប៊ូ មុនកាន់របស់របរញាំ ឬប៉ះពាល់ផ្ទៃមុខខ្លួនឯង ត្រូវពិសារទឹកក្តៅអ៊ុនៗ បរិភោគអាហារឆ្អិនល្អ ជៀសវាងនៅកន្លែងម៉ាស៊ីនត្រជាក់ខ្លាំង និមន្ត ឬដើរចេញក្រោមទឹកភ្លៀងជាដើម។
បន្ថែមពីនេះ បើសិនជាមានបញ្ហាសុខភាពប្រជាពលរដ្ឋ និងព្រះសង្ឃមិនត្រូវចូលរួមក្នុងកម្មវិធីណាមួយឡើយ ត្រូវគង់ ឬស្នាក់នៅដាច់ដោយឡែកពីអ្នកដទៃ ស្វែងរកកន្លែងព្យាបាលនៅមន្ទីរពេទ្យជិតបំផុត ឬរាយការណ៍ទៅលេខ១១៥ ដើម្បីកុំឲ្យចម្លងបន្តទៅអ្នកដទៃទៀត៕
