មនុស្ស១១នាក់ បានស្លាប់ និងផ្ទះជិត២ពាន់ខ្នងបានលិចលង់ ខណៈមនុស្សជាង ៤០០នាក់ បានជម្លៀសចេញពីភូមិ ដោយសារគ្រោះធម្មជាតិជំនន់ទឹកភ្លៀង និងរន្ទះបាញ់ ដែលបង្កឡើងដោយឥទ្ធិពលព្យុះឈ្មោះថា នូល (NOUL)។
ក្រសួងធនធានទឹក និងឧតុនិយម កាលពីថ្ងៃទី១៦ ខែកញ្ញា បានប្រកាសថា កម្ពុជា នឹងរងនូវឥទ្ធិពលនៃព្យុះទី១១ ដែលមានឈ្មោះថា នូល ចាប់ពីថ្ងៃទី១៨ ដល់ថ្ងៃទី២០ ខែកញ្ញា ដែលធ្វើតំបន់ខ្លះមានភ្លៀងធ្លាក់ពីមធ្យមទៅច្រើន ហើយប្រឈមខ្ពស់ទៅនឹងជំនន់ទឹកភ្លៀង រួមជាមួយខ្យល់បក់បោកខ្លាំង។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងនៅថ្ងៃចន្ទនេះថា ឥទ្ធិពលនៃព្យុះទី១១ ដែលកើតឡើងរយៈពេលប៉ុន្មានថ្ងៃចុងក្រោយនេះ បានធ្វើឱ្យប៉ះពាល់នៅក្នុងក្រុងចំនួន១០ នៃខេត្តចំនួន៥ រួមមានខេត្តព្រះសីហនុ ពោធិ៍សាត់ ឧត្តរមានជ័យ កោះកុង និងបៃលិន។
របាយការណ៍ បន្តថា គិតត្រឹមម៉ោងជាង៧យប់ ថ្ងៃទី២០ ខែកញ្ញានេះ មានមនុស្ស ១១នាក់ បានស្លាប់ ក្នុងនោះ៨នាក់ ស្លាប់ដោយសារបាតុភូតរន្ទះបាញ់ ខណៈ៣នាក់ទៀត ស្លាប់ដោយសារជំនន់ទឹកភ្លៀង។
របាយការណ៍ឱ្យដឹងទៀតថា ផ្ទះចំនួន ១៨២៥ខ្នង និងដំណាំផ្សេងៗចំនួន ៣១២ហិកតា ត្រូវបានលិចលង់ ខណៈមនុស្សចំនួន ៤៧៥នាក់ ត្រូវបានជម្លៀសចេញ។
គណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា ខេត្តព្រះសីហនុ ប៉ះពាល់ផ្ទះ ១៧០១ខ្នង និងមនុស្ស ៤៧៥នាក់ ត្រូវបានជម្លៀសចេញ, ផ្លូវជាតិ៣កន្លែងប្រវែង៤០០ម៉ែត្រ និងផ្លូវលំ៩កន្លែងប្រវែង៣៤៧០ម៉ែត្រត្រូវបានលិច។ ចំណែកខេត្តឧត្តរមានជ័យ លិចផ្ទះ៩៣ខ្នង ស្រូវ១២០ហិកតា ដំឡូងមី៥៨ហិកតា និងផ្លូវ៦៨៣៩ម៉ែត្រ និងខេត្តផ្សេងៗរងផលប៉ះពាល់តិចតួចជាងនេះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក ឃុន សុខា មានប្រសាសន៍ថា អាជ្ញាធរពាក់ព័ន្ធបាននិងកំពុងអន្តរាគមន៍ជួយសង្គ្រោះ ខណៈស្ថានភាពទឹកជំនន់នៅបណ្តាខេត្តមួយចំនួនបានស្រកទៅវិញខ្លះហើយ។
លោកបន្តថា៖ «ការព្យាករអស់ត្រឹមថ្ងៃទី២១នេះហើយព្យុះ អីចឹងវាចាប់ផ្តើមស្រកហើយនៅតំបន់ខ្លះ ព្រោះអាហ្នឹងវាមិនមែនជាជំនន់ទន្លេទេ វាជាជំនន់ទឹកភ្លៀង»។
អ្ននាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់វីអូឌីថា គិតមកដល់ម៉ោង៣រសៀលនេះ ស្ថានភាពជំនន់ទឹកភ្លៀងមានការស្រកចុះខ្លះហើយ។ លោកបន្តថា ពលរដ្ឋ១៩៥៥គ្រួសារ (គិតជាមនុស្សចំនួន ៧៩៥៤នាក់) បានរងផលប៉ះពាល់ ក្នុងនោះ ប្រជាពលរដ្ឋ និងអ្នកទេសចរបានចំនួន ១៨៦៥នាក់ ត្រូវបានជួយសង្គ្រោះទៅកាន់ទីទួលសុវត្ថិភាព ដោយសារពួកគេរងផលប៉ះពាល់ខ្លាំង។
លោកបន្ថែមថា៖ «ដោយសារស្ថានភាពម្សិលមិញនេះ នៅចម្លោះម៉ោង១០ទៅម៉ោង៣រសៀល គឺចម្លោះពេលល្អស្ងប់ខ្យល់ យើងបានបញ្ចេញកាណូត១៨គ្រឿង ជាប្រភេទកាណូតលឿន ទៅដឹកជញ្ជូនបងប្អូនប្រជាពលរដ្ឋក៏ដូចជាភ្ញៀវទេសចររបស់យើង មកកាន់ដីគោកវិញ ដោយសុវត្ថិភាពវិញទាំងអស់គ្នា»។
ពាក់ព័ន្ធនឹងបញ្ហាអាកាសធាតុដោយសារឥទ្ធិពលព្យុះនូលនេះ មន្ទីរទេសចរណ៍ខេត្តបាត់ដំបង បានចេញសេចក្តីជូនដំណឹងមួយកាលពីថ្ងៃអាទិត្យ ដោយណែនាំដល់ម្ចាស់រមណីយដ្ឋានដែលស្ថិតនៅជ្រោះជ្រលងភ្នំ ដងស្ទឹងបឹងបួរ ឱ្យផ្អាកដំណើរការជាបណ្តោះអាសន្នជាបន្ទាន់ ចាប់ពីថ្ងៃទី២០ ខែកញ្ញា រហូតដល់ថ្ងៃជូនដំណឹងជាថ្មី ដើម្បីជៀសវាងការកើតមាននៅគ្រោះថ្នាក់ផ្សេងៗ៕