រដ្ឋាភិបាលកម្ពុជា បង្ហាញពីការប្តេជ្ញាចិត្តក្នុងការបន្តរក្សាស្ថិរភាពនយោបាយ និងស្ថិរភាពម៉ាក្រូសេដ្ឋកិច្ចឱ្យបានល្អប្រសើរ រួមនិងការងារជាអាទិភាពមួយចំនួនទៀត ដើម្បីសន្តិភាព សុវត្ថិភាព សុខមាលភាពប្រជាពលរដ្ឋ និងការអភិវឌ្ឍជាតិ។
ការបេ្តជ្ញាចិត្តនេះ បានធ្វើឡើងនៅក្នុងសារលិខិតរបស់លោកនាយករដ្ឋមន្ត្រី ហ៊ុន សែន ក្នុងទិវាសន្តិភាពអន្តរជាតិ ក្រោមប្រធានបទ «ការកសាងសន្តិភាពជាមួយគ្នា» ដែលប្រព្រឹត្តទៅនៅថ្ងៃទី២១ ខែកញ្ញា ឆ្នាំ២០២០នេះ។
លោកនាយករដ្ឋមន្ត្រី ហ៊ុន សែន បានលើកឡើងក្នុងសារលិខិតនោះថា កម្ពុជាបានប្រឹងប្រែងងើបឈរដោយខ្លួនឯង ក្នុងការកសាង និងអភិវឌ្ឍន៍ប្រទេសឡើងវិញ ធានាបាននូវការលើកស្ទួយកំណើនសេដ្ឋកិច្ច កាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋ។ ប៉ុន្តែដោយសារមានរលកព្យុះនៃវិបត្តិជំងឺកូវីដ១៩ បានធ្វើឱ្យប៉ះពាល់លើសេដ្ឋកិច្ច និងសង្គម នៅកម្ពុជា និងបណ្តាប្រទេសស្ទើរទាំងអស់ក្នុងពិភពលោក។
លោកបានគូសបញ្ជាក់ថា រដ្ឋាភិបាលកម្ពុជា នៅតែប្តេជ្ញាចិត្តក្នុងការថែរក្សាឱ្យបាននូវភាពជាម្ចាស់ការ លើការងារអាទិភាពមួយចំនួន ក្នុងនោះនឹងបន្តរក្សាស្ថិរភាពនយោបាយ ដែលជាមូលដ្ឋានគ្រឹះសម្រាប់ការគ្រប់គ្រងស្ថានការណ៍ និងការរក្សាស្ថិរភាពម៉ាក្រូសេដ្ឋកិច្ចឱ្យបានល្អប្រសើរ ទប់ស្កាត់អតិផរណា និងការឡើងថ្លៃទំនិញក្នុងទីផ្សារជាដើម។
សារលិខិតរបស់លោកនាយករដ្ឋមន្ត្រី ហ៊ុន សែន ក៏បានលើកឡើងដែរថា កម្ពុជា យល់ច្បាស់ថា ការគោរពសិទ្ធិមនុស្ស ការលើកកម្ពស់សេរីភាពជាមូលដ្ឋាន ការប្រកាន់ខ្ជាប់នូវលទ្ធិប្រជាធិបតេយ្យសេរីពហុបក្ស និងការលើកកម្ពស់នីតិរដ្ឋ នឹងនាំមកនូវសន្តិភាព ស្ថិរភាព ភាពសុខដុមរមនា និងយុត្តធម៌សង្គម និងការរួមចំណែកដល់ការអភិវឌ្ឍប្រកបដោយចីរភាព និងបរិយាប័ន។
តែយ៉ាងណា លោកថា បើទោះជាកម្ពុជា ខិតខំកសាង និងអភិវឌ្ឍន៍សង្គមសេដ្ឋកិច្ច ការបង្រួបបង្រួមជាតិ និងការបោះជំហានទៅមុខលើមាគ៌ានយោបាយសន្តិសហវិជ្ជមាន អព្យាក្រឹត្យ មិនចូលបក្សសម្ព័ន្ធ និងការពារអធិបតេយ្យនិងបូរណភាពទឹកដីក៏ដោយ ប៉ុន្តែកម្ពុជា នៅតែមិនទទួលបានការសាទរពីមហាអំណាច និងប្រទេសលោកខាងលិចខ្លះនោះទេ។
លោកបានបន្ថែមថា៖ «លើសពីនេះ ពួកគេមិនញញើតក្នុងការអនុវត្តនូវស្តង់ដាពីរ ចំពោះការវាយតម្លៃលើការអនុវត្តសិទ្ធិមនុស្សនៅកម្ពុជា និងប្រើប្រាស់បញ្ហាសិទ្ធិមនុស្សនេះ ជាឧបករណ៍នយោបាយ ឬជាលេសសម្រាប់ការលូកដៃចូលជ្រៀតជ្រែកចូលកិច្ចការផ្ទៃក្នុង រំលោភលើអធិបតេយ្យភាព និងឯករាជ្យភាពរបស់កម្ពុជា និងបណ្តាប្រទេសទន់ខ្សោយផ្សេងទៀត»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានគូសបញ្ជាក់ថា រដ្ឋាភិបាលកម្ពុជា ចូលរួមសាទរជាមួយបណ្តាប្រទេសសមាជិកអង្គការសហប្រជាជាតិទាំងអស់ ប្រារព្ធទិវាសន្តិភាព សំដៅលើកកម្ពស់ការយល់ដឹងពីអត្ថន័យនៃសន្តិភាពឱ្យកាន់តែទូលំទូលាយ ពង្រឹងសាមគ្គីភាព ឯកភាពជាតិ និងបន្តជំរុញកិច្ចសហការក្នុងការថែរក្សាឱ្យបាននូវសន្តិភាពសម្រាប់កម្ពុជា និងពិភពលោក៕
