មេនគរបាលខេត្តស្វាយរៀង បានឱ្យដឹងថា មន្ត្រីនគរបាលមូលដ្ឋានម្នាក់នៅស្រុកស្វាយជ្រំ ត្រូវបានសមត្ថកិច្ចចាប់ខ្លួននៅថ្ងៃនេះ ក្រោមបណ្ដឹងចោទថា បានបំពានផ្លូវភេទកេ្មងស្រីអនីតិជនមួយរូបកាលពីខែកក្កដាកន្លងមកនេះ។
ស្នងការនគរបាលខេត្តស្វាយរៀង លោក កឹង ឃន បានប្រាប់វីអូឌីនៅថ្ងៃនេះថា សមត្ថកិច្ចបានឃាត់ខ្លួនមន្ត្រីនគរបាលប៉ុស្តិ៍ឃុំអង្គតាសូរ លោក ម៉ៅ វីរៈ នៅថ្ងៃនេះ ហើយកសាងសំណុំរឿងតាមនីតិវិធីទៅតាមបណ្ដឹងរបស់ក្រុមគ្រួសារក្មេងស្រីរងគ្រោះ។
នៅពេលវីអូឌីព្យាយាមសាកសួរបន្ថែមអំពីការចាប់ខ្លួនមន្ត្រីនគរបាលរូបនេះ លោក កឹង ឃន បានបដិសេធផ្ដល់ព័ត៌មានលម្អិត។
ប៉ុន្តែចំណាត់ការទៅលើមន្ត្រីនគរបាលមូលដ្ឋាន បានកើតឡើងជាង២ខែក្រោយករណីបំពានផ្លូវភេទលើក្មេងស្រីអនីតិជន និងក្រោយពីក្រុមគ្រួសារក្មេងស្រីរងគ្រោះបានព្យាយាមដាក់ពាក្យបណ្ដឹងទៅសមត្ថកិច្ចនានា។
លោក កែវ សុខាន វ័យ៦០ឆ្នាំ ដែលអះអាងជាឪពុកបង្កើតក្មេងស្រីអនីតិជន បានឱ្យដឹងថា កូនស្រីរបស់លោកអាយុ១៥ឆ្នាំ នៅផ្ទះម្នាក់ឯង ហើយលោកនិងភរិយាបានទៅចូលរួមពិធីមង្គលការកូនអ្នកភូមិ នៅពេលមន្ត្រីនគរបាលប៉ុស្តិ៍បានបំពានផ្លូវភេទកូនស្រីរបស់លោក។
បុរសរូបនេះបានរៀបរាប់បន្តថា នៅម៉ោងប្រហែល៧និង៣០នាទីយប់ កូនស្រីរបស់គាត់ប្រាប់ថា មន្ត្រីនគរបាលឈ្មោះ ម៉ៅ វីរៈ រស់នៅផ្ទះជិតគ្នា បានលួចចូលទៅក្នុងផ្ទះចាប់ឱបកូនស្រីរបស់គាត់និងស្ទាបគ្រប់សព្វលើរាងកាយ។ ក្រោយមក មានម៉ូតូអ្នកភូមិធ្វើដំណើរឆ្លងកាត់ ទើបជនល្មើសឈប់ធ្វើសកម្មភាព ហើយកូនស្រីគាត់បានរត់ទៅផ្ទះអ្នកភូមិដែលនៅជិតគ្នា ពឹងឱ្យជួយប្ដឹងទៅសមត្ថកិច្ចអន្តរាគមន៍ភ្លាមៗផងដែរ។ ប៉ុន្តែមិនមានចំណាត់ការពីនគរបាលរូបនោះទេ បានត្រឹមតែសម្របសម្រួលឱ្យជនល្មើសទៅផ្ទះវិញ។
លោកបន្តថា គាត់បានដាក់ពាក្យប្តឹងទៅប៉ុស្តិ៍នគរបាលក្រោលគោ កាលពីថ្ងៃទី២០ ខែកក្កដា ហើយ២ថ្ងៃបន្ទាប់មកទៀត លោកក៏បានដាក់ពាក្យប្តឹងទៅអធិការស្រុកស្វាយជ្រំ មុននឹងដាក់បណ្ដឹងមួយទៀតទៅតុលាការខេត្តស្វាយរៀងនៅថ្ងៃទី១២ ខែសីហាកន្លងមក ប៉ុន្តែលោកថា មិនមានចំណាត់ការនោះទេ បានត្រឹមតែសម្របសម្រួលតែប៉ុណ្ណោះ។
លោកប្រាប់ថា តុលាការបញ្ជាទៅសមត្ថកិច្ចឱ្យចាប់ខ្លួនជនល្មើសយកទៅចាត់វិធានការច្បាប់នៅថ្ងៃទី២៥ ខែកញ្ញានេះ។
លោក សុខាន អំពាវនាវទៅសមត្ថកិច្ចឱ្យបញ្ជូនជនល្មើសទៅតុលាការចាត់វិធានការច្បាប់ ដើម្បីផ្តល់យុត្តិធម៌ដល់ក្រុមគ្រួសារលោក។
លោកអំពាវនាវដូច្នេះថា៖ «ឱ្យយកទៅដោះស្រាយតាមច្បាប់ ដើម្បីសុំឱ្យកែប្រែ កុំឱ្យថ្ងៃក្រោយមិនចោលក្បួន បានខ្ញុំមិនចង់ដោះស្រាយជាសំណងសម្រុះសម្រួលតាំងពីថ្នាក់ក្រោមទៅដល់លើ ទៅដល់តុលាការ»។
មន្ត្រីឃ្លាំមើលសិទ្ធិមនុស្សនៃអង្គការលីកាដូ លោក មុំ លីដា ដែលអះអាងថា តាមដានករណីនេះផ្ទាល់ បានបញ្ជាក់ថា មន្ត្រីនគរបាល ម៉ៅ វីរៈ ពិតជាប៉ុនប៉ងរំលោភក្មេងស្រីនោះប្រាកដមែន។ លោកជំរុញទៅតុលាការចាត់វិធានការច្បាប់លើបុគ្គលនោះឱ្យបានតឹងរ៉ឹង ដើម្បីកុំឱ្យមានវប្បធម៌និទណ្ឌភាពនៅកម្ពុជា។
លោកជំរុញដូច្នេះថា៖ «បើសិនជាសមត្ថកិច្ចមិនអនុវត្តតួនាទីរបស់ខ្លួនក្នុងការមានវិធានការផ្លូវច្បាប់ទៅលើជនល្មើសទេ ធ្វើឱ្យបញ្ហាក្រោយៗទៀត វាអាចកើតមានទៀត។ ប្រសិនបើមានបទល្មើសអញ្ចឹងកើតឡើង វាអាចរួចខ្លួន ជនល្មើសវាបានចិត្ត អញ្ចឹងអំពើនិទណ្ឌភាពវានៅតែមាន ធ្វើឱ្យអយុត្តិធម៌ដល់ជនរងគ្រោះ»។
ប្រសិនបើរកឃើញទោស មន្ត្រីនគរបាលរូបនេះនឹងត្រូវជាប់ពន្ធនាគារចន្លោះពី១ឆ្នាំទៅ៣ឆ្នាំ ហើយរងពិន័យជាប្រាក់ចន្លោះពី២លានទៅ៦លានរៀល លើបទល្មើសប្រទូសកេរ្តិ៍ភេទ ដែលមានចែងក្នុងមាត្រា២៤៦នៃក្រមព្រហ្មទណ្ឌកម្ពុជា៕
