មន្ត្រីអគ្គស្នងការនគរបាលជាតិបានឲ្យដឹងថា តាមការស៊ើបអង្កេតបឋម ជនសង្ស័យដែលបាញ់សម្លាប់ជាងកាត់សក់នៅជិតសាលារៀនទួលគោក នៅយប់ថ្ងៃទី២៦ ខែកញ្ញា ទំនងជាមន្ត្រីនគរបាល។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់វីអូឌីនៅថ្ងៃនេះថា កម្លាំងសមត្ថកិច្ចកំពុង ស្រាវជ្រាវ ស្វែងរកជនដៃដល់ដែលបានបាញ់សម្លាប់ជាងកាត់សក់ នៅជិតសាលារៀនទួលគោក ស្ថិតនៅសង្កាត់បឹងកក់២ ខណ្ឌទួលគោក កាលពីថ្ងៃទី២៦ ខែកញ្ញា ឆ្នាំ២០២០ វេលាម៉ោងជាង១០យប់ ។
លោក គឹមខឿន អះអាងថា តាមការស៊ើបអង្កេតបឋម ជនសង្ស័យដែលបាញ់សម្លាប់ជាងកាត់សក់ទំនងជាមន្ត្រីនគរបាលខណ្ឌ។ ប៉ុន្តែលោកមិនបានបញ្ជាក់ថា ខណ្ឌណានោះទេ ដោយថា ទុកឲ្យសមត្ថកិច្ចស្រាវជ្រាវឲ្យច្បាស់លាស់ជាមុនសិន។
ជាងកាត់សក់ដែលត្រូវបានជនល្មើសបាញ់សម្លាប់ ឈ្មោះ សុខ សុកេន អាយុជាង ៣០ឆ្នាំ ។ ក្រោយពីស្លាប់ ជាងកាត់សក់រូបនោះ បានបន្សល់ទុកកូនស្រី៤នាក់ កូនស្រីទី១ អាយុ១១ឆ្នាំ, កូនស្រីទី២ អាយុ ៩ឆ្នាំ, កូនស្រីទី៣ អាយុ៥ឆ្នាំ, កូនស្រីទី៤ អាយុ១ឆ្នាំ៕
