ប្រជាពលរដ្ឋប្រមាណ៦០នាក់ដែលអះអាងថា កំពុងមានជម្លោះដីធ្លីជាមួយក្រុមហ៊ុនចិន ញូញៀន (Union Development Group ឬ UDG) ក្នុងខេត្តកោះកុង បានប្រមូលផ្តុំគ្នាតវ៉ាមុខសាលាខេត្តជាថ្មីទៀតនៅថ្ងៃចន្ទនេះ ដើម្បីជំរុញទៅអាជ្ញាធរពន្លឿនការដោះស្រាយបញ្ចប់វិវាទដីធ្លីជូនពួកគេ ដោយសារជម្លោះនោះអូសបន្លាយជាង១០ឆ្នាំមកហើយ។
អ្នកស្រី ឆៃ គឹមធុច អះអាងជាតំណាងពលរដ្ឋមកពីឃុំភ្ញីមាស បានប្រាប់វីអូឌីថា ពលរដ្ឋដែលតវ៉ានេះ មកពីឃុំចំនួន៣ រួមមាន ឃុំព្រែកខ្សាច់ ឃុំភ្ញីមាស និងឃុំកោះស្តេច ដែលភាគច្រើនប្រកបរបរធ្វើស្រែ ចម្ការ និងនេសាទ។ អ្នកស្រីបន្តថា ពួកគាត់មានជម្លោះដីធ្លីរ៉ាំរ៉ៃជាមួយក្រុមហ៊ុនចិន ញូញៀន រយៈពេល១២ឆ្នាំហើយ នៅពុំទាន់ទទួលបានដំណោះស្រាយនៅឡើយ ដោយកន្លងមក អាជ្ញាធរបានត្រឹមសន្យាថានឹងដោះស្រាយ។
អ្នកស្រីបន្ថែមថា៖ «ការពន្យារពេលមិនដោះស្រាយនេះ បានធ្វើឱ្យពលរដ្ឋខាតបង់យ៉ាងធ្ងន់ធ្ងរ គឺពួកខ្ញុំបានបាត់បង់មុខរបរ កូនៗបាត់បង់ការសិក្សា បាត់បង់ដីអាស្រ័យផល និងពុំបានរក[រកស៊ី]អ្វីទាំងអស់ ដោយសារតែរវល់ដើរតវ៉ា។ អ៊ីចឹងការអភិវឌ្ឍនេះ មិនបានផ្តល់ចំណេញអ្វីដល់ពួកខ្ញុំនោះទេ មានតែខាតបង់»។
អ្នកស្រីបានអះអាងថា គោលបំណងការតវ៉ានេះ គឺប្រជាពលរដ្ឋស្នើសុំឱ្យអាជ្ញាធរខេត្ត កាត់ឆ្វៀលដីរបស់ប្រជាពលរដ្ឋដែលមានបណ្ណកម្មសិទ្ធិត្រឹមត្រូវ ចេញពីគម្រោងអភិវឌ្ឍន៍របស់ក្រុមហ៊ុន ឬផ្តល់សំណងតាមតម្លៃទីផ្សារ។
អភិបាលខេត្តកោះកុង លោកស្រី មិថុនា ភូថង មានប្រសាសន៍ថា ជម្លោះដីធ្លីរវាងពលរដ្ឋនិងក្រុមហ៊ុនចិន ញូញៀន នេះ ក្រសួងរៀបចំដែនដីនិងអាជ្ញាធរខេត្ត កំពុងដំណើរការសិក្សាបន្ថែមលើអត្តសញ្ញាណរបស់ប្រជាពលរដ្ឋនិងអត្តសញ្ញាណផ្សេងៗទៀត ដើម្បីឈានទៅរកការដោះស្រាយបញ្ចប់។
លោកស្រីថ្លែងថា៖ «អ៊ីចឹងយើងមិនទាន់បានសម្រេចអ្វីនៅឡើយទេ ដោយសារកិច្ចការនេះស្ថិតក្នុងការសិក្សានៅឡើយ»។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា ក្រោមគម្រោងអភិវឌ្ឍន៍របស់ក្រុមហ៊ុន UDG នេះ មានពលរដ្ឋប្រហែលខ្ទង់ពាន់គ្រួសារទៀត ដែលពុំទាន់ទទួលបានការដោះស្រាយ។ លោកបន្តថា ការពន្យារពេលមិនដោះស្រាយឱ្យបានឆាប់នេះ នឹងធ្វើឱ្យពលរដ្ឋដែលជាម្ចាស់ឆ្នោតអស់ជំនឿលើការដឹកនាំរបស់អាជ្ញាធរ ក៏ដូចជារដ្ឋាភិបាល។
លោកបន្ថែមថា៖ «បើសិនជាអាជ្ញាធរមិនយកចិត្តទុកដាក់ដោះស្រាយឱ្យឆាប់ចប់ទេ វានឹងធ្វើឱ្យប៉ះពាល់ដល់មុខមាត់របស់ពួកគាត់វិញទេ ក្នុងការទទួលខុសត្រូវចំពោះប្រជាពលរដ្ឋដែលពួកគាត់ជាម្ចាស់ឆ្នោត។ នៅពេលដែលពួកគាត់រងគ្រោះយូរឆ្នាំហើយ ហើយអាជ្ញាធរមិនបានយកចិត្តដោះស្រាយជូនពួកគាត់ អ៊ីចឹងអាហ្នឹងវានឹងធ្វើឱ្យពួកគាត់បាត់បង់ទំនុកចិត្តពីប្រជាពលរដ្ឋ ហើយពួកគាត់លែងទុកចិត្តលើអាជ្ញាធរនិងរដ្ឋាភិបាលទៀត»។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ទៅដល់ក្រុមហ៊ុនចិន UDG ដើម្បីធ្វើការអភិវឌ្ឍពាណិជ្ជកម្មនិងរមណីយដ្ឋានទេសចរណ៍។
របាយការណ៍និងការវិភាគផ្លូវច្បាប់របស់អង្គការសង្គមស៊ីវិលឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ១១៤៣គ្រួសារ ត្រូវបង្ខំឱ្យបោះបង់ដីធ្លីប្រមាណជាង១ម៉ឺនហិកតា រួមទាំងផ្ទះ១៥០០ខ្នង ត្រូវបង្ខំឱ្យរុះរើនិងឈូសឆាយ។
កាលពីថ្ងៃទី១៥ ខែកញ្ញា ឆ្នាំ២០២០ ក្រសួងរតនាគារអាមេរិកសម្រេចដាក់ទណ្ឌកម្មលើក្រុមហ៊ុន UGD ដែលកំពុងវិនិយោគលើគម្រោងអភិវឌ្ឍន៍រមណីយដ្ឋានទេសចរណ៍តារាសាគរ នៅខេត្តកោះកុងនេះ ដោយលើកឡើងថា ក្រុមហ៊ុនចិនមួយនេះកំពុងរំលោភបំពានសិទ្ធិមនុស្ស និងបញ្ហាមិនប្រក្រតីមួយចំនួនទៀត ប៉ុន្តែត្រូវបានក្រុមហ៊ុនមួយនេះច្រាលចោលការលើកឡើងនេះ៕
