ថ្នាក់ដឹកនាំក្រសួងបរិស្ថាន ជំរុញឱ្យអាជ្ញាធរថ្នាក់ក្រោមជាតិ បន្តយកចិត្តទុកដាក់អនុវត្តមុខងារវិស័យបរិស្ថាន និងពង្រឹងការអនុវត្តច្បាប់ ដើម្បីប្រសិទ្ធភាពខ្ពស់ក្នុងការអនុវត្តការងារបម្រើនិងផ្តល់សេវាជូនប្រជាពលរដ្ឋនៅមូលដ្ឋាន។
ការជំរុញនេះ បានធ្វើឡើងនៅក្នុងសិក្ខាសាលាថ្នាក់តំបន់ ស្តីពី ការផ្តល់បច្ចេកទេសអនុវត្តមុខងារវិស័យបរិស្ថានជូនរដ្ឋបាលថ្នាក់ក្រោមជាតិ កាលពីល្ងាចថ្ងៃទី២៨ ខែកញ្ញា ឆ្នាំ២០២០ នៅទីរួមខេត្តកំពត។
រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងក្នុងសិក្ខាសាលានោះថា អាជ្ញាធរថ្នាក់ក្រោមជាតិ ត្រូវបន្តយកចិត្តទុកដាក់អនុវត្តមុខងារវិស័យបរិស្ថាន ដែលក្រសួងបានធ្វើប្រតិភូកម្ម និងប្រគល់មុខងារគ្រប់គ្រងជូន ដើម្បីឱ្យការអនុវត្តការងារបម្រើ និងផ្តល់សេវាជូនប្រជាពលរដ្ឋនៅមូលដ្ឋានមានប្រសិទ្ធិភាពខ្ពស់។
លោកបានបន្តថា៖ «យើងទាំងអស់ គ្នាត្រូវបន្តខិតខំបម្រើប្រជាពលរដ្ឋឱ្យបានល្អ ជាពិសេសក្នុងវិស័យបរិស្ថាន ត្រូវបង្កើនការយកចិត្តទុកដាក់ ក្នុងកិច្ចគាំពារបរិស្ថាន ការគ្រប់គ្រងសំណល់គ្រប់ប្រភេទ ឱ្យមានប្រសិទ្ធភាព ដើម្បីធានាបាននូវគុណភាពបរិស្ថាន និងនិរន្តរភាពបរិស្ថាន»។
លោករដ្ឋមន្ត្រី ក៏បានជំរុញដល់អាជ្ញាធរថ្នាក់ក្រោមជាតិ ពង្រឹងការអនុវត្តច្បាប់ និងបង្កើនការយកចិត្តទុកដាក់បន្ថែមទៀតលើការងារអភិរក្សធនធានធម្មជាតិដែលយើងមាន ឱ្យបានគង់វង្សសម្រាប់ជាប្រយោជន៍ដល់មនុស្សរាប់ជំនាន់តទៅមុខទៀត។
គួរបញ្ជាក់ថា សិក្ខាសាលាថ្នាក់តំបន់នេះ នឹងធ្វើឡើងរយៈពេល៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែកញ្ញានេះ ដោយមានការចូលរួមពីមន្ត្រីអាជ្ញាធរពាក់ព័ន្ធចំនួន ៤ខេត្ត រួមមាន ខេត្តកំពត ព្រះសីហនុ កែប និងតាកែវ។
នេះគឺជាលើកទី២ ហើយដែលក្រសួងបរិស្ថានបានរៀបចំសិក្ខាសាលាថ្នាក់តំបន់ស្តីពីការផ្តល់បច្ចេកទេសអនុវត្តមុខងារវិស័យបរិស្ថានជូនរដ្ឋបាលថ្នាក់ក្រោមជាតិ ដើម្បីបំពាក់បំប៉ន សមត្ថភាពមន្ត្រីរដ្ឋបាលថ្នាក់ក្រោមជាតិអំពីបច្ចេកទេសអនុវត្តមុខងារវិស័យបរិស្ថានដែលក្រសួងបានធ្វើប្រតិភូកម្ម និងប្រគល់មុខងារជូនដល់រដ្ឋបាលថ្នាក់ក្រោមជាតិ។
ក្នុងរយៈពេល ៣ថ្ងៃនៃសិក្ខាសាលាថ្នាក់តំបន់នេះ មន្ត្រីជំនាញនៃក្រសួងបរិស្ថាន នឹងធ្វើបង្ហាញជូនដល់មន្ត្រីថ្នាក់ក្រោមជាតិ នូវទស្សនទាននៃការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ ការគ្រប់គ្រងសំណល់រឹងតាមទីប្រជុំជន ការគ្រប់គ្រងប្រព័ន្ធលូ និងអាងប្រព្រឹត្តកម្មទឹកកខ្វក់ ការបណ្តុះបណ្តាលបច្ចេកទេសអនុវត្តមុខងារការអភិវឌ្ឍដោយចីរភាព មុខងារផ្សព្វផ្សាយចំណេះដឹង និងព័ត៌មានបរិស្ថាន ការងារគ្រប់គ្រងសហគមន៍តំបន់ការពារធម្មជាតិ និងការគ្រប់គ្រងប្រព័ន្ធតំបន់ការពារធម្មជាតិ៕
