អតីតមេដឹកនាំបក្សប្រឆាំង លោក កឹម សុខា ក្នុងរយៈពេលប៉ុន្មានថ្ងៃចុងក្រោយនេះ បានចុះចែកអំណោយដល់ប្រជាពលរដ្ឋដែលរងគ្រោះដោយទឹកជំនន់ នៅខេត្តព្រះសីហនុ និងខេត្តពោធិ៍សាត់ បើទោះជាលោកនៅជាប់បំរាមតុលាការនៅឡើយ។
លោក កឹម សុខា បានលើកឡើងនៅលើទំព័រហ្វេសប៊ុករបស់លោក កាលពីថ្ងៃចន្ទម្សិលមិញថា កាលដែលរូបលោក និងសហការី បានយកអំណោយចែកជូនប្រជាពលរដ្ឋក្រីក្រ រងគ្រោះដោយទឹកជំនន់នៅខេត្តព្រះសីហនុ និងខេត្តពោធិ៍សាត់ កាលពីថ្ងៃអាទិត្យ និងថ្ងៃចន្ទ ក្នុងគោលបំណងដើម្បីជួយរំលែកទុក្ខលំបាក និងការខ្វះខាតរបស់ប្រជាពលរដ្ឋ ទៅតាមលទ្ធភាពដែលលោកអាចធ្វើបាន។
លោកបានបន្តថា ការធ្វើសកម្មភាពមនុស្សធម៌ ជាសម្បជញ្ញៈរបស់អ្នកមានគុណធម៌ ចំពោះប្រជាពលរដ្ឋ និងប្រទេសជាតិ ប្រសើរជាងការចោទប្រកាន់មួលបង្កាច់នាំឱ្យមានគ្រោះថ្នាក់ដល់អ្នកដទៃ និងសង្គមជាតិ។
លោកក៏បានគូសបញ្ជាក់ថា៖ «អ្វីដែលអាចធ្វើបាន មិនប៉ះពាល់ដល់ផលប្រយោជន៍ជាតិ មិនរំលោភសិទ្ធិអ្នកដទៃ ហើយច្បាប់មិនហាមឃាត់ ទោះបីសេរីភាពត្រូវបានកម្រិតក៏ដោយ ខ្ញុំនៅតែព្យាយាមធ្វើទៅតាមលទ្ធភាព និងកាលៈទេសៈ ដើម្បីចូលរួមជាប្រយោជន៍ដល់សង្គមជាតិ ជាពិសេសដើម្បីប្រជាពលរដ្ឋខ្មែរ»។
សហមេធាវីការពារក្តីឱ្យ លោក កឹម សុខា គឺលោក ចាន់ ចេន ឱ្យដឹងតាមបណ្តាញសង្គមតេឡេក្រាមថា ការចុះចែកអំណោយរបស់លោក កឹម សុខា ជារឿងមនុស្សធម៌សុទ្ធសាត និងមិនប៉ះពាល់ដល់បំរាមរបស់តុលាការទេ។
លោកបន្តថា៖ «នរណាក៏មានសិទ្ធិធ្វើដែរ ជួយពលរដ្ឋដែលកំពុងមានការលំបាក ក្រៅពីបំរាម លោក កឹម សុខា មានសិទ្ធិធ្វើកិច្ចការផ្សេងទៀត»។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង មិនអាចសុំអត្ថាធិប្បាយបានទេ នៅថ្ងៃអង្គារនេះ។
ចំណែក អ្នកនាំពាក្យក្រសួងយុត្តិធម៌ លោក ជីន ម៉ាលីន ថ្លែងថា លោកមិនអាចបកស្រាយជំនួសតុលាការបាន។
លោកថា៖ «សកម្មភាពមនុស្សធម៌នេះ គ្មាននរណាអាចបកស្រាយបានថា តើជាសកម្មភាពនយោបាយដែលត្រូវហាមប្រាមឬក៏អត់ទេ មានតែខាងតុលាការទេដែលអាចធ្វើការបកស្រាយបាន សូម្បីតែមេធាវីគាត់ក៏មិនអាចបកស្រាយជំនួសតុលាការបានដែរ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា តុលាការបានដាក់បម្រាមលើអតីតមេដឹកនាំបក្សប្រឆាំងតែសកម្មភាពនយោបាយ និងមិនឱ្យចេញទៅក្រៅប្រទេស ប៉ុន្តែការចែកអំណាយបែបមនុស្សធម៌ មិនជាប់ពាក់ព័ន្ធទៅនឹងបំរាមរបស់តុលាការទេ។
លោកថា៖ «ការចែកអំណោយនរណាក៏ធ្វើបានដែរ ទាក់ទងនឹងសប្បុរសធម៌ឱ្យតែគាត់[កឹម សុខា ]មានទឹកចិត្តហើយមានធនធាន ទ្រព្យសម្បត្តិក្នុងការចែកដល់ជនរងគ្រោះ ទាក់ទងនឹងគ្រោះធម្មជាតិឬក៏សប្បុរសធម៌ផ្សេងៗអត់មាននរណាហាមឃាត់ទេ ពីព្រោះបំរាមគេហាមតែធ្វើសកម្មភាពនយោបាយ»។
លោក កឹម សុខា ត្រូវបានតុលាការដកសិទ្ធិធ្វើនយោបាយជាង ៣ឆ្នាំមកហើយ គិតចាប់ពីថ្ងៃដែលសមត្ថកិច្ចចាប់ខ្លួនលោកកាលពីថ្ងៃទី៣ ខែកញ្ញា ឆ្នាំ២០១៧ ក្រោមការចោទពីបទល្មើសថា បានឃុបឃិតជាមួយបរទេសចង់ផ្តួលរំលំរដ្ឋាភិបាលកម្ពុជា។
បច្ចុប្បន្ន មេបក្សប្រឆាំងរូបនេះ មិនទាន់ត្រូវបានអនុញ្ញាតឱ្យធ្វើនយោបាយឡើងវិញនៅឡើយទេ បើទោះបីសហរដ្ឋអាមេរិក និងសហភាពអឺរ៉ុបបាននំាមុខគេ ទាមទារទៅរដ្ឋាភិបាលកម្ពុជា ឱ្យអតីតបក្សប្រឆាំងធំមួយនេះ បានដំណើរការឡើងវិញក៏ដោយ៕