សមត្ថកិច្ចចម្រុះឃាត់ខ្លួនជនជាតិចិនជិត៤០០នាក់ ក្នុងភោជនីយដ្ឋានស៊ីនខាយសៀនមិន នាភូមិ៤ សង្កាត់លេខ៤ ខេត្តព្រះសីហនុ កាលពីយប់ថ្ងៃទី២៩ខែកញ្ញា។
អាជ្ញាធរខេត្តព្រះសីហនុបញ្ជាក់ថាបន្ទាប់ពីចុះប្រតិបត្តិការ អាជ្ញាធរបានរកឃើញភស្តុតាងល្មើសច្បាប់មួយចំនួន រួមមានអាវុធ ថ្នាំញៀន និងសកម្មភាពពេស្យាចារ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ថា សមត្ថកិច្ចកំពុងស្រាវជ្រាវស៊ើបអង្កេតនិងបន្តអនុវត្តនិតិវិធីតាមផ្លូវច្បាប់ ចំពោះអ្នកទាំងនោះ។
ប្រសាសន៍លោក ឃាង ភារម្យ បានបញ្ជាក់ថា៖«ករណីនេះកំពុងបន្តនិតិវិធីក្នុងការសួរនាំ ចំពោះរបាយការណ៍លម្អិតស្នើសុំទំនាក់ទំនងទៅកាន់សមត្ថកិច្ចអនុវត្តផ្ទាល់»។
ស្នងការនគរបាលខេត្តព្រះសីហនុ លោក ជួន ណារិន្ទ មិនទាន់អាចបញ្ជាក់លំអិតជុំវិញបញ្ហានេះ បានទេ ដោយលោកថាគណៈបញ្ជាការឯកភាពខេត្ត និងព្រះរាជអាជ្ញា ខេត្តកំពុងបន្ត នីតិវិធីតាមជំនាញ។
ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តព្រះសីហនុ លោក លឹម ប៊ុនហេង មានប្រសាសន៍ថាសំណុំរឿងនេះមិនទាន់បានបញ្ជូនមកដល់តុលាការនៅឡើយទេ ដោយនគរបាលកំពុងបន្តនីតិវិធីសាកសួរ។
ទោះជាយ៉ាងណាក្ដីគេហទំព័រBTV បានផ្សាយថា សមត្ថកិច្ចចម្រុះខេត្តព្រះសីហនុបាន ឃាត់ខ្លួនជនជាតិចិនប្រុស ស្រី ចំនួន៣៨១នាក់និងដកហូតថ្នាំញៀនមួយចំនួន ដែលមិនទាន់បានថ្លឹង នៅឡើយ។ តាមប្រភពដដែល ភោជនីយដ្ឋាននេះជាកម្មសិទ្ធិជនជាតិចិន ឈ្មោះ BAO FANGZE។
ប្រធានមជ្ឍមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា លោកគាំទ្រចំពោះចំណាត់ការរបស់សមត្ថកិច្ចប៉ុន្តែ អាជ្ញាធរកម្ពុជាគួរស្រាវជ្រាវរកឬសគល់នៃអំពើឧក្រិដ្ឋរបស់ជនជាតិចិនទាំងនោះដើម្បីបង្ក្រាប។
ប្រសាសន៍ លោក យង់ គីមអេង មានប្រសាសន៍ថា ៖«ញឹកញាប់ណាស់ដែលចិនមានបញ្ហា បង្កនូវអសន្តិសុខបង្ករការភ័យខ្លាចដល់ប្រជាពលរដ្ឋកម្ពុជា អីចឹងរដ្ឋាភិបាលគួរមាន លក្ខខណ្ឌដោយឡែក ហើយចាំបាច់ក្នុងការត្រួតពិនិត្យនិងតាមដានពួកគេទាំងនោះ បើមិនអីចឹងរដ្ឋាភិបាលនឹងចំណាយធនធានកាន់តែច្រើនថែមទៀតចំពោះ ខណៈដែល បញ្ហាកាន់តែច្រើនទៅច្រើនទៅ»។
របាយការណ៍បូកសរុបការងារប្រចាំខេត្តព្រះសីហនុ កាលពីឆ្នាំ២០១៩បង្ហាញថា បទល្មើសដែលបង្ករឡើងដោយជនជាតិចិនមានចំនួននាំមុខគេក្នុងចំណោមបទល្មើសដែលកើតឡើងនៅខេត្តព្រះសីហនុ។តួរលេខដែលផ្ដល់ដោយសាលាខេត្តព្រះសីហនុបង្ហាញថា គិតត្រឹមខែមិថុនា ឆ្នាំ២០២០ មានចិនប្រមាណ១ម៉ឺន៥ពាន់នាក់កំពុងរស់នៅធ្វើការនិងប្រកបអាជីវកម្មក្នុងខេត្តព្រះសីហនុ៕
