រដ្ឋាភិបាល សម្រេចកាត់ដីបឹងតាមោក ៨ហិកតា ឱ្យទៅក្រសួងយុត្តិធម៌ ដែលធ្វើឱ្យចំនួនផ្ទៃដីបឹងធម្មជាតិមួយនេះសរុបជិត ៦០០ហិកតាហើយ ត្រូវរដ្ឋកាត់យកទៅប្រើប្រាស់។
ក្នុងអនុត្រឹក្យចុះថ្ងៃទី២៥ ខែកញ្ញា ឆ្នាំ២០២០ លោកនាយករដ្ឋមន្ត្រី ហ៊ុន សែន បានសម្រេចកាត់ផ្ទៃដីបឹងតាមោក ទំហំ ៨ហិកតា នៅសង្កាត់គោករកា ខណ្ឌព្រែកព្នៅ រាជធានីភ្នំពេញ ទៅឱ្យក្រសួងយុត្តិធម៌ ចាប់ពីថ្ងៃចុះហត្ថលេខានេះទៅ។
អ្នកនាំពាក្យក្រសួងយុត្តិធម៌ លោក ជិន ម៉ាលីន នៅថ្ងៃពុធនេះ សុំមិនអត្ថាធិប្បាយជុំិវញករណីនេះ ដោយលោកជំរុញឱ្យសួរទៅទីស្ដីការគណៈរដ្ឋមន្ត្រីវិញ។
លោកថា៖ «ជាការសម្រេចរបស់រដ្ឋាភិបាល សូមទាក់ទងទៅខាងគណៈរដ្ឋមន្រ្តី»។
ប្រធានអង្គភាពអ្នកនាំពាក្យរាជរដ្ឋាភិបាលនៃទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា ការកាត់ផ្ទៃដីបឹងតាមោកឱ្យទៅក្រសួងយុត្តិធម៌ គឺដើម្បីឱ្យស្ថាប័ននេះ សាងសង់ការិល័យរបស់ខ្លួន ខណៈទីតាំងក្រសួងបច្ចុប្បន្នមានភាពតូចចង្អៀត។
លោកថា៖ «ក្រសួងសព្វថ្ងៃហ្នឹង វាចង្អៀត ដល់យកទៅធ្វើរបៀបជាទីស្ដីការរបស់ក្រសួងយុត្តិធម៌ ដែលពួកយើងត្រូវការការិយាល័យច្រើន ត្រូវការលំហបន្ទប់ធ្វើការច្រើន។ ដូច្នេះ យើងគ្មានដីសាធារណៈណាមួយ ដែលអាចសម្រួលបាន ដូច្នេះហើយបានយើងយកដីសាធារណៈដែលទំនេរ[នៅបឹងតាមោក]»។
លោកបន្តថា ការកាត់ដីផ្ទៃបឹងតាមោកមួយផ្នែកនេះ ដោយសារ រដ្ឋគ្មានដីសាធារណៈណាសម្រាប់ផ្ដល់ឱ្យ ទៅក្រសួង និងសា្ថប័នពាក់ព័ន្ធក្រៅពីទីតាំងនោះទេ។
លោកផៃ ស៊ីផាន ថ្លែងថា៖ «សារៈសំខាន់ទី២ យើងឈរក្នុងន័យគឺអភិរក្សជាមួយនឹងការអភិវឌ្ឍ យើងដឹងហើយបឹងតាមោក ជាអាំងទឹកសម្រាប់ទទួលទឹកចេញពីទីក្រុងភ្នំពេញនៅជាយរាជធានីភ្នំពេញ។ ដូច្នេះ ក្នុងការលុបមួយចំណែក ដើម្បីធ្វើការអភិវឌ្ឍ ក៏ប៉ុន្តែយើងនៅតែរក្សានៅតែអភិរក្សនៅតំបន់នោះ គ្រាន់តែទំហំវាតូចបន្តិច ប៉ុន្តែសេចក្ដីត្រូវការជាអាទិភាពយើងត្រូវផ្ដល់តម្លៃជាអាទិភាព»។
យោងតាមលិខិតរបស់ រដ្ឋលេខាធិការទីស្តីការគណៈរដ្ឋមន្ត្រីលោក កែន សត្ថា ដែលផ្ញើទៅរដ្ឋមន្ត្រីក្រសួងពាក់ព័ន្ធ និងអភិបាលរាជធានីភ្នំពេញ កាលពីថ្ងៃទី២៥ ខែកញ្ញា ឆ្នាំ២០២០ ឱ្យដឹងថា ផ្ទៃដីបឹងតាមោក ទំហំ៨ ហិកតានោះ ត្រូវកាត់ទៅឱ្យក្រសួងយុត្តិធម៌ សាលាឧទ្ធរណ៍ និងសាលាដំបូងរាជធានីភ្នំពេញ ដើម្បីរៀបចំធ្វើជាឃ្លាំងរក្សាទុកនូវឯកសារនិងសម្ភារៈ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គីមអេង បង្ហាញការសោកស្តាយចំពោះការកាត់ផ្ទៃដីបឹងធម្មជាតិមួយនេះ ទៅឱ្យស្ថាប័នផ្សេងៗ។ លោកបានស្នើទៅរដ្ឋាភិបាលរកទីតាំងផ្សេងអភិវឌ្ឍន៍ស្ថាប័នរដ្ឋទាំងនោះ ជាជាងកាត់ផ្ទៃបឹងតាមោកនេះ និងគួររក្សាបឹងធម្មជាតិនេះ សម្រាប់ប្រើប្រាស់ជាប្រយោជន៍ផ្សេងៗ និងគួរបង្កើតជាតំបន់ទេសចរណ៍ផងដែរ។
លោកថា៖ «ខ្ញុំថាមិនគួរនឹងកាត់ដីបឹងតាមោក គួរតែរកកន្លែងផ្សេងក្នុងការអភិវឌ្ឍ ធ្វើការិយាល័យរបស់រដ្ឋអីហ្នឹង។ បើសិនជាកាត់ដីបឹងតាមោកម្ដងហើយម្ដងទៀត អាហ្នឹងជាការប្រឈមការធ្វើឱ្យរាជធានីភ្នំពេញ ជួបនៅការលិចលង់ដោយសារគ្មានកន្លែងរំដោះទឹក»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជា បានចេញអនុក្រឹត្យស្ដីពីការកំណត់ផ្ទៃបឹងតាមោក ជាសម្បតិ្តរបស់រដ្ឋ ដែលមានផ្ទៃដីសរុបប្រមាណ ៣ ២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។
ចាប់តាំងពីឆ្នាំ២០១៨ ដល់ឆ្នាំ២០២០ រដ្ឋាភិបាលបានកាត់ផ្ទៃបឹងតាមោកសរុបជាង ៥៨០ហិកតា ទៅឱ្យស្ថាប័នរដ្ឋ និងក្រុមហ៊ុនឯកជន សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ។
របាយការណ៍ដែលចេញផ្សាយដោយសមាគមធាងត្នោត កាលពីថ្ងៃទី២៦ ខែធ្នូ ឆ្នាំ២០១៩ បង្ហាញថា បឹងធម្មជាតិទាំងអស់ នៅរាជធានីភ្នំពេញ កំពុងប្រឈមនឹងការចាក់ដីលុបអស់ទាំងស្រុង។
របាយការណ៍បញ្ជាក់ថា គិតចាប់ពីឆ្នាំ១៩៩០មក បឹងចំនួន១៦ ហើយត្រូវបានចាក់ដីលុបទាំងស្រុង ខណៈបឹងចំនួន ១០ទៀត ត្រូវគេចាក់លុបមួយផ្នែកៗជាបណ្ដើរៗ៕
