អាជ្ញាធរខេត្តឧត្តរមានជ័យអះអាងថា អាជ្ញាធរថៃបានដោះលែងពលរដ្ឋខ្មែរចំនួន៧នាក់មកកម្ពុជាវិញកាលពីម្សិលមិញ តាមច្រកទ្វារអន្តរជាតិជាំ ស្រុកអន្លុងវែង ក្រោយពេលអនុវត្តន៍ទោសចប់ពាក់ព័ន្ធលួចឆ្លងដែនកាប់ឈើ។
ស្នងការខេត្តឧត្តរមានជ័យ លោក ហួត សុធី ប្រាប់វីអូឌីនៅថ្ងៃនេះ ប្រជាពលដ្ឋខ្មែរចំនួន៧នាក់ ដែលអាជ្ញាធរថៃចាប់ខ្លួនពាក់ព័ន្ធលួចឆ្លងដែនចូលទឹកដីថៃកាប់ឈើក្រញូងចន្លោះឆ្នាំ២០១៧ ដល់ឆ្នាំ២០១៩ ត្រូវបានអាជ្ញាធរថៃអនុវត្តទោសរួច នឹងបញ្ជូនអ្នកទាំងនោះឲ្យមកអាជ្ញាធរកម្ពុជាតាមច្រកទ្វារអន្តរជាតិជាំ ស្ថិតក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ កាលពីព្រឹកថ្ងៃទី៣ តុលា ២០២០។
ស្នងការរូបនោះបញ្ជាក់ថា ក្រោយពីទទួលអ្នកទោសទាំងខ្មែរ៧នាក់នោះពីអាជ្ញាធរថៃ គឺអាជ្ញាធរកម្ពុជាប្រចាំការនៅច្រកទ្វារអន្តរជាតិជាំ បានធ្វើការណែនាំ និងឱ្យធ្វើកិច្ចសន្យា ឈប់ធ្វើដំណើរឆ្លងដែនដោយខុសច្បាប់បន្តទៀត ហើយបានឱ្យវិលត្រឡប់ទៅលំនៅឋានជួបជុំក្រុមគ្រួសារក្នុងថ្ងៃដដែល ដោយមិនបានឃាត់ទុកធ្វើចត្តឡីស័ក្ត១៤ថ្ងៃ តាមការណែនាំរបស់ក្រសួងសុខាភិបាលនោះទេ៕
