សាលារាជធានីភ្នំពេញជូនដំណឹងទៅបុគ្គលិកក្រុមហ៊ុន ស៊ីនទ្រី ឱ្យឈប់ធ្វើកូដកម្ម និងចាប់ផ្តើមប្រមូលសំរាមឡើងវិញនៅថ្ងៃស្អែកនេះ ដោយចាត់ទុកការធ្វើកូដកម្មទាមទារលក្ខខណ្ឌការងារកន្លងមកនោះ មិនស្របតាមច្បាប់ការងារ។
ក្នុងសេចក្តីជូនដំណឹងរបស់សាលារាជធានីភ្នំពេញ កាលពីថ្ងៃ៣ ខែតុលាម្សិលមិញនេះ បានជូនដំណឹងទៅកម្មកររបស់ក្រុមហ៊ុន ស៊ីនទ្រី ដែលកំពុងធ្វើកូដកម្មមិនចេញប្រមូលសំរាម ដែលធ្វើឲ្យសំរាមកកស្ទះនៅតាមដងផ្លូវនានាក្នុងរាជធានីភ្នំពេញ។
ករណីនេះសាលារាជធានីភ្នំពេញបញ្ជាក់ថា ការធ្វើកូដកម្មទាមទារលក្ខខណ្ឌការងារ៥ចំណុច ធ្វើឡើងខុសច្បាប់ស្តីពីការងារ និងលិខិតបទដ្ឋានគតិយុត្តិជាធរមាន ដោយសារការទាមទារនោះ ក្រុមហ៊ុនមិនបានបញ្ចប់ការងារពួកគេ ហើយក្រុមហ៊ុនក៏ដំណើរការងារធម្មតាផងដែរ។
លក្ខខណ្ឌការងារដែលកម្មករទាមទារនោះមានចំនួន៥ចំណុច រួមមាន ទាមទារឱ្យផ្តល់ប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់។
សេចក្តីជូនដំណឹងដដែល អំពាវនាវទៅកម្មករដែលធ្វើកូដកម្ម ឈប់យកសំរាមធ្វើជាចំណាប់ខ្មាំង ដើម្បីទាមទារលក្ខខណ្ឌការងារខុសច្បាប់ ហើយត្រូវចូលធ្វើការងារប្រមូលសំរាមវិញនៅថ្ងៃទី៥ ខែតុលា ឆ្នាំ២០២០នេះ បើពុំដូច្នេះទេ សាលារាជធានីនិងប្រកាសជ្រើសរើសបុគ្គលិកថ្មី។
បន្ថែមពីនេះ សាលារាជធានីភ្នំពេញ បានអំពាវនាវទៅប្រជាពលរដ្ឋទាំងអស់នៅក្នុងរាជធានីភ្នំពេញ វេចខ្ចប់ ទុកដាក់ និងបញ្ចេញសំរាមរបស់ខ្លួនឲ្យបានត្រឹមត្រូវ តាមពេលវេលាកំណត់ ដើម្បីបញ្ចៀសការកកស្ទះសំរាម សំណល់រឹង ខណៈសាលារាជធានី បានឲ្យអាជ្ញាធរទាំង១៤ខណ្ឌ បញ្ចេញម៉ូតូកង់បី និងកម្លាំងប្រមូលសំរាមតាមមូលដ្ឋានខណ្ឌរៀងៗខ្លួនជាដើម៕
