កម្ពុជាបានប្រកាសនៅថ្ងៃនេះពីការរកឃើញអ្នកឆ្លងវីរុសកូរ៉ូណា ២ករណីទៀត ដែលនាំឲ្យចំនួនអ្នកឆ្លងសរុបនៅទូទាំងប្រទេសកើនឡើងដល់ ២៨០នាក់។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានប្រកាសថា ករណីឆ្លងវីរុសកូរ៉ូណា ២ករណីថ្មីនេះ ត្រូវបានរកឃើញនៅលើបុរសជនជាតិបារាំងម្នាក់អាយុ ២៧ឆ្នាំ និងស្ត្រីជនជាតិឥណ្ឌាអាយុ ៣៤ឆ្នាំ។
ក្រសួងសុខាភិបាលអះអាងថា បុរសជនជាតិបារាំងនោះ ត្រូវបានដាក់ឲ្យស្ថិតក្រោមការព្យាបាលដាច់ដោយឡែកនៅមន្ទីរពេទ្យបង្អែកខេត្តសៀមរាបតាំងថ្ងៃសៅរ៍សប្ដាហ៍មុន ហើយស្ត្រីជនជាតិឥណ្ឌា ត្រូវបានដាក់ឲ្យសម្រាកព្យាបាលដាច់ដោយឡែកនៅមន្ទីរពេទ្យមិត្តភាពខ្មែរ-សូវៀត។
បើតាមក្រសួងសុខាភិបាល បុរសជនជាតិបារាំងដែលស្នាក់នៅក្នុងខេត្តសៀមរាបនោះ បានវិលត្រឡប់ពីប្រទេសបារាំងឆ្លងកាត់ប្រទេសសិង្ហបុរីមុននឹងមកដល់កម្ពុជានៅថ្ងៃទី២០ ខែកញ្ញា ហើយស្ត្រីជនជាតិឥណ្ឌាបានធ្វើដំណើរពីប្រទេសឥណ្ឌាមកដល់កម្ពុជានៅថ្ងៃទី២០ ខែកញ្ញាផងដែរ។
គិតត្រឹមថ្ងៃនេះ មនុស្សដល់ទៅ ២៨០នាក់ហើយ ត្រូវបានរកឃើញឆ្លងវីរុសកូរ៉ូណានៅក្នុងប្រទេសកម្ពុជាគិតចាប់តាំងពីចុងខែមករាមក៕
